ଭୁବନେଶ୍ୱର,୩୧/୧୦: ଓଡ଼ିଶାରେ ଲାଗୁ ହେବ ଜାତୀୟ ଶିକ୍ଷାନୀତି ୨୦୨୦ । ଆସନ୍ତା ଶିକ୍ଷାବର୍ଷରୁ ଏହା ରାଜ୍ୟରେ ଲାଗୁ ହେବ । ରାଜ୍ୟ ସରକାର ଧାର୍ଯ୍ୟ ସମୟ ସୁଦ୍ଧା ଏଥିପାଇଁ ସମସ୍ତ ପ୍ରାରମ୍ଭିକ ପ୍ରସ୍ତୁତି ସାରିବାକୁ ଅଣ୍ଟା ଭିଡ଼ିଛନ୍ତି । ଆସନ୍ତା ମାର୍ଚ୍ଚ ୧୫ ସୁଦ୍ଧା ଶିକ୍ଷକ, ଶିକ୍ଷା ନିର୍ଦ୍ଦେଶାଳୟ ଏବଂ ରାଜ୍ୟ ଶିକ୍ଷା ଗବେଷଣା ଓ ପ୍ରଶିକ୍ଷଣ ପ୍ରତିଷ୍ଠାନ ପକ୍ଷରୁ ରାଜ୍ୟ ଚିଠା ଶିକ୍ଷା ନୀତି ପ୍ରସ୍ତୁତ ହେବ । ରାଜ୍ୟ କ୍ୟାବିନେଟ୍ ଏହା ଉପରେ ମୋହର ମାରିବା ପରେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଏହା କାର୍ଯ୍ୟକାରୀ ହେବ । ଉଚ୍ଚଶିକ୍ଷା ବିଭାଗ ମଧ୍ୟ ଏ ଦିଗରେ ବେଶ ତତ୍ପରତା ପ୍ରକାଶ କରୁଛି । ମୋଟାମୋଟି ରାଜ୍ୟ ସରକାର ୨୦୨୫-୨୬ ଶିକ୍ଷାବର୍ଷରେ ନୂଆ ଶିକ୍ଷାନୀତି ଲାଗୁ କରିବାକୁ ପ୍ରସ୍ତୁତିକୁ ତେଜିଛନ୍ତି ।
ଡବଲ ଇଞ୍ଜିନ ସରକାର । ତ୍ୱରିତ ନିଷ୍ପତ୍ତି । କେନ୍ଦ୍ର ସରକାର ପ୍ରଣୟନ କରିଥିବା ଜାତୀୟ ଶିକ୍ଷା ନୀତିକୁ ବହୁ ରାଜ୍ୟ ଗ୍ରହଣ କରି କାର୍ଯ୍ୟକାରୀ କରିଥିଲା ବେଳେ ଓଡ଼ିଶାରେ ଏହା ଏଯାଏଁ ଲାଗୁ ହୋଇନି । ବିଜେପି ସରକାର ଆସିବା ପରେ ଏ ନେଇ ତତ୍ପରତା ଜୋର ଧରିଛି । ଜାତୀୟ ଶିକ୍ଷା ନୀତି କାର୍ଯ୍ୟକାରୀ କରିବାକୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ଉନ୍ନୟନ କମିଶନରଙ୍କ ଅଧ୍ୟକ୍ଷତାରେ ଟାସ୍କ ଫୋର୍ସ ଗଠନ କରିଛି । ଏହାସହ ୬ଟି ବିଷୟଗତ ସବ୍ କମିଟି ଗଠନ ହୋଇଛି । ଶିକ୍ଷା ନିର୍ଦ୍ଦେଶାଳୟ ସମ୍ମିଳନୀ କକ୍ଷରେ ବୁଧବାର ସବ୍ କମିଟି ବୈଠକ ବସିଥିଲା । ଯଥାଶୀଘ୍ର ରାଜ୍ୟ ଶିକ୍ଷାନୀତିର ଚିଠା ପ୍ରସ୍ତୁତ କରିବା ସଂପର୍କରେ ବୈଠକରେ ଚର୍ଚ୍ଚା ହୋଇଥିଲା । ସଦସ୍ୟମାନେ ଏନେଇ ଲିଖିତ ପ୍ରସ୍ତାବ ଆସନ୍ତା ମାସ ୩୦ ସୁଦ୍ଧା ଦେବେ । ତାହାକୁ ସଂକଳନ କରାଯାଇ ଟାସ୍କଫୋର୍ସକୁ ସୁପାରିଶ କରାଯିବ ।
ଟାସ୍କଫୋର୍ସ ଜାନୁଆରୀ ୧୫ ସୁଦ୍ଧା ଟାସ୍କଫୋର୍ସ ଏହି ସୁପାରିଶକୁ ମୋହର ମାରିବା ପରେ ଶିକ୍ଷକ, ଶିକ୍ଷା ନିର୍ଦ୍ଦେଶାଳୟ ଏବଂ ରାଜ୍ୟ ଶିକ୍ଷା ଗବେଷଣା ଓ ପ୍ରଶିକ୍ଷଣ ପ୍ରତିଷ୍ଠାନ ଚିଠା ନୀତି ପ୍ରସ୍ତୁତ କରିବ । ସରକାର ଏହାକୁ ଅନୁମୋଦନ କରିବା ପରେ ରାଜ୍ୟରେ ଲାଗୁ କରାଯିବ । ଜାତୀୟ ଶିକ୍ଷା ନୀତି-୨୦୨୦ର ବିଭିନ୍ନ ଉପାଦାନକୁ ଅନୁଧ୍ୟାନ ପାଇଁ ୬ଟି ବିଷୟଗତ ସବ୍ କମିଟି ଗଠନ କରାଯାଇଛି । ଏହି ସବ୍ କମିଟିରେ ବିଦ୍ୟାଳୟ ଓ ଗଣଶିକ୍ଷା ବିଭାଗର ବିଭିନ୍ନ ନିର୍ଦ୍ଦେଶାଳୟର ମୁଖ୍ୟଙ୍କ ସମେତ ଶିକ୍ଷା କ୍ଷେତ୍ରର ବିଶେଷଜ୍ଞ ଓ ଶିକ୍ଷାବିତ୍ଙ୍କୁ ସାମିଲ କରାଯାଇଛି । ୨୦୨୦ ମସିହାରେ ଉଚ୍ଚଶିକ୍ଷା ବିଭାଗ କ୍ଷେତ୍ରରେ ଜାତୀୟ ଶିକ୍ଷା ନୀତି ୨୦୨୦ ଲାଗୁ ପାଇଁ ଏକ ଟାସ୍କ ଫୋର୍ସ ଗଠନ କରାଯାଇଥିଲା । ସେଥିରେ ଉନ୍ନୟନ କମିଶନର ଅଧ୍ୟକ୍ଷ ଭାବେ ନିଯୁକ୍ତି ପାଇଥିଲେ ।
ଚଳିତ ମାସ ପ୍ରଥମ ସପ୍ତାହରେ ବିଶ୍ୱବିଦ୍ୟାଳୟ କୁଳପତି ଏବଂ କଲେଜ ଅଧ୍ୟକ୍ଷଙ୍କୁ ନେଇ ଦିଗ୍ଦର୍ଶନ କାର୍ଯ୍ୟକ୍ରମ କରାଯାଇଛି । ଉଚ୍ଚଶିକ୍ଷା ବିଭାଗ ପାଦେ ଆଗରେ ରହି ଜାତୀୟ ଶିକ୍ଷା ନୀତି ପାଇଁ ପ୍ରାୟ ପ୍ରସ୍ତୁତି ସାରିଛି । ତେଣୁ ସରକାର ଆସନ୍ତା ଶିକ୍ଷାବର୍ଷରୁ ଏହାକୁ ଲାଗୁ କରିବାକୁ ପୂର୍ଣ୍ଣ ପ୍ରସ୍ତୁତ ହେଉଛନ୍ତି ବୋଲି ଗଣଶିକ୍ଷା ବିଭାଗର ଜଣେ ଅଧିକାରୀ ସୂଚନା ଦେଇଛନ୍ତି । ଉଲ୍ଲେଖଯୋଗ୍ୟ, ପୋଥିଗତ ଜ୍ଞାନ ବଦଳରେ ଜୀବିକା ନିର୍ବାହ ପାଇଁ ଛାତ୍ରଛାତ୍ରୀଙ୍କୁ କୁଶଳୀ କରିବାକୁ ଦୃଷ୍ଟିରେ ରଖି ଜାତୀୟ ଶିକ୍ଷା ନୀତି ପାଠ୍ୟକ୍ରମରେ ଜୋର ଦିଆଯାଇଛି । ଭାରତର ପାରମ୍ପରିକ ଜ୍ଞାନ, କଳା, ସଂସ୍କୃତି ଏବେ ସିଲାବସ୍ରେ ସ୍ଥାନ ପାଇବ । ନୂଆ ଢ଼ାଞ୍ଚାରେ ଆରମ୍ଭ ହେବ ସ୍କୁଲ ଶିକ୍ଷା । ପରୀକ୍ଷାର ଚାପ ହଟିବ । ଆନନ୍ଦମୟ ଶିକ୍ଷାର ନୂଆ ଧାରାରେ ବାଟ ଚାଲିବେ ଛାତ୍ରଛାତ୍ରୀ, ଶିକ୍ଷକ ଶିକ୍ଷୟିତ୍ରୀ । ପିଲାଙ୍କ ନିଜ ପସନ୍ଦକୁ ମିଳିବ ଅଗ୍ରାଧିକାର । ମାତୃଭାଷାରେ ୫ମ ଶ୍ରେଣୀ ଯାଏ ଶିକ୍ଷା ମିଳିବ । ଷଷ୍ଠ ଶ୍ରେଣୀରୁ ବାଧ୍ୟତାମୂଳକ ହେବ ଧନ୍ଦାମୂଳକ ଶିକ୍ଷା । ‘ଭାଷାଭୟ’ରେ ପିଲା ସ୍କୁଲ ଯିବାକୁ କୁନ୍ଥକୁନ୍ଥ ହେବନି । ଗଣିତ, ବିଜ୍ଞାନ, ଇଂରାଜୀରେ ରଖିଥବା ମାର୍କ କେବଳ ଯୋଗ୍ୟତାର ମାପକାଠି ହେବନି । ରିପୋର୍ଟକାର୍ଡ ବଦଳରେ ଛାତ୍ରଛାତ୍ରୀଙ୍କ ଦକ୍ଷତା ହେବ ଅଗ୍ରାଧିକାରର ମାପଦଣ୍ଡ।
