ଭୁବନେଶ୍ୱର, ୧୦/୧୦ : ଦେଶରେ ୧୦ ନୂଆ ଏମ୍ପ୍ଲଇଜ୍ ଷ୍ଟେଟ୍ ଇନ୍ସ୍ୟୁରାନ୍ସ କର୍ପୋରେସନ୍(ଇଏସ୍ଆଇ) ମେଡିକାଲ କଲେଜ ସ୍ଥାପନ ହେବ ବୋଲି କେନ୍ଦ୍ର ସରକାର ଘୋଷଣା କରିଥିଲେ । ହେଲେ ଓଡ଼ିଶା ଭାଗ୍ୟରେ ଇଏସ୍ଆଇ ମେଡିକାଲ କଲେଜ ନାହିଁ । କାରଣ ଗତ ୧୦ ବର୍ଷ ହେଲାଣି ଏହି ପ୍ରସ୍ତାବ ଅନିଶ୍ଚିତତା ଭିତରେ ରହିଛି । ରାଜ୍ୟରେ କେବେ ପ୍ରତିଷ୍ଠା ହେବ ମେଡିକାଲ କଲେଜ, ତାହାର ଉତ୍ତର ନା ରାଜ୍ୟ ଶ୍ରମ ବିଭାଗ ନା କେନ୍ଦ୍ର ଇଏସ୍ଆଇ କର୍ତ୍ତୃପକ୍ଷଙ୍କ ପାଖରେ ଅଛି । ରାଜ୍ୟର ୧ କୋଟି ୩୦ ଲକ୍ଷ ଇଏସ୍ଆଇ ଚିକିତ୍ସା ଆଶା ମଉଳିଛି । ୟୁପିଏ ସରକାର ସମୟରେ ଏ ନେଇ ନିଷ୍ପତ୍ତି ହୋଇଥିଲା । ଭୁବନେଶ୍ୱରର ଅନ୍ଧାରୁଆ ବା ରାଉରକେଲାରେ ଏହି କଲେଜ ପ୍ରତିଷ୍ଠା ନେଇ ବିବାଦ ଦେଖା ଦେଇଥିଲା । ଶେଷରେ ଏକ କେନ୍ଦ୍ରୀୟ କମିଟି ଉଭୟ ସ୍ଥାନକୁ ପରିଦର୍ଶନ କରିଥିଲେ । କମିଟି ରିପୋର୍ଟ ଏବେ ଶୀତଳଭଣ୍ଡାରରେ ପଡ଼ି ରହିଛି ।
ପଶ୍ଚିମବଙ୍ଗ, କର୍ଣ୍ଣାଟକ, ହିମାଚଳ ପ୍ରଦେଶ ଆଦି ରାଜ୍ୟରେ ଇଏସ୍ଆଇ ମେଡିକାଲ କଲେଜ ପ୍ରତିଷ୍ଠା ହୋଇସାରିଲାଣି । ପୁଣି ଗତକାଲି ମହାରାଷ୍ଟ୍ର, ଦିଲ୍ଳୀ, ଆସାମ, ମଧ୍ୟ ପ୍ରଦେଶ, ରାଜସ୍ଥାନ, ପଞ୍ଜାମ, ଗୁଜରାଟ, ଉତ୍ତରପ୍ରଦେଶ, ଝାଡ଼ଖଣ୍ଡରେ ୧୦ ମେଡିକାଲ କଲେଜ ପ୍ରତିଷ୍ଠା ହେବ ବୋଲି ଘୋଷଣା ହୋଇଛି । ହେଲେ ଓଡ଼ିଶାରେ ଇଏସଆଇ ହସ୍ପିଟାଲ ସ୍ଥାପନା ନେଇ ଅନିଶ୍ଚିତତା ଲାଗିରହିଛି । ଅନ୍ୟପଟରେ ଓଡ଼ିଶାରେ ଇଏସ୍ଆଇସି ୧୨ଟି ‘ସୁପର ସ୍ପେସିଆଲିଟି’ ହସ୍ପିଟାଲ ସ୍ଥାପନ ନେଇ ଲକ୍ଷ୍ୟ ରଖିଛି । ବର୍ତ୍ତମାନ ରାଜ୍ୟରେ ୬ଟି ହସ୍ପିଟାଲ୍ରେ ରୋଗୀ ସେବା ମିଳୁଥିବା ବେଳେ ଆହୁରି ନୂତନ ଭାବେ ୬ଟି ସୁପର ସ୍ପେସିଆଲିଟି ହସ୍ପିଟାଲ କାର୍ଯ୍ୟକ୍ଷମ ପାଇଁ ପାଖାପାଖି ୧୦୦୦ କୋଟି ଟଙ୍କା ବ୍ୟୟ ବରାଦ ହୋଇଛି ।
