୨୦୨୪, ଜୁନ୍ ୧୨ । ଅଢ଼େଇ ଦଶନ୍ଧିର ଶାସନ ବ୍ୟବସ୍ଥାକୁ ହଟାଇ ଜନ୍ମ ନେଲା ନୂଆ ସରକାର-“ମୋହନ ସରକାର” । ସଭିଙ୍କ ମନରେ ଥିଲା ଗୋଟିଏ ପ୍ରଶ୍ନ, ଜଣେ ସାଦାସିଧା ଗରିବ ଆଦିବାସୀ ପୁଅଙ୍କ ନେତୃତ୍ୱରେ ଅଧିକାଂଶ ନବାଗତ ମନ୍ତ୍ରୀଙ୍କୁ ନେଇ ଏ ସରକାର କେମିତି ଚାଲିବ? କିନ୍ତୁ, ପ୍ରଥମ ଓଭର ପ୍ରଥମ ବଲ୍ରୁ ମୋହନ ମାରିଲେ ଛକା । ଶପଥ ଗ୍ରହଣରୁ କ୍ୟାବିନେଟ ଟିମ୍ର ଗାଡ଼ି ସିଧା ଛୁଟିଲା ଲୋକସେବା ଭବନକୁ । ଶୁଭେଚ୍ଛା ଫୁଲଗୁଚ୍ଛ ଗ୍ରହଣ ପୂର୍ବରୁ ପ୍ରତିଶ୍ରୁତି ପୂରଣର ପର୍ବ ଆରମ୍ଭ କରିଦେଲେ ମୋହନ ସରକାର ।
ଓଡ଼ିଆ ଅସ୍ମିତାକୁ ବନ୍ଦେ କହି ଖୋଲିଦେଲେ ଶ୍ରୀମନ୍ଦିରର ଚାରିଦ୍ୱାର । ଘୋଷଣା ହେଲା ଶ୍ରୀମନ୍ଦିର ପାଇଁ କର୍ପସ ପାଣ୍ଠି । ଧାନ କୁଇଣ୍ଟାଲ ୩୧୦୦ ଟଙ୍କା କରି ଚାଷୀ ଅଣ୍ଟାରେ ଭରିଲେ ବଳ । ନାରୀ ଶକ୍ତିକୁ ସଶକ୍ତ କରିବାକୁ ଐତିହାସିକ ସୁଭଦ୍ରା ଯୋଜନାର ହେଲା ଶୁଭାରମ୍ଭ । ୨୪ ଘଣ୍ଟାରେ ମୋହନ ସରକାର ଦେଖାଇଥିଲେ ନିଜ ଦମ୍ଭ, ଦକ୍ଷ ନେତୃତ୍ୱ ଓ ଓଡ଼ିଶା ପାଇଁ କିଛି ବଡ଼ କରିବାର ମନୋବୃତ୍ତି ଏବଂ ସଂକଳ୍ପ । ସବୁ ଆକଳନକୁ ଟପି ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସରକାର ଗୋଟିଏ ପରେ ଗୋଟିଏ ସଫଳତା ଲେଖି ଚାଲିଲା । ୨୪ ବର୍ଷର ସରକାରଙ୍କ ଶଗଡ଼ ଗୁଳାରୁ ବାହାରକୁ ଯାଇ ମୋହନ ଖୋଲିଦେଲେ ଜନତାଙ୍କ ପାଇଁ ଦ୍ୱାର । ଜନତା-ସରକାର ମଝିରୁ ହଟାଇ ଦେଲେ ପାଚେରି। ସମାଜର ଶେଷ ଧାଡ଼ିରେ ଥିବା ଲୋକ ଆଜି ମୁଖ୍ୟମନ୍ତ୍ରୀଙ୍କୁ ଭେଟି ନିଜ ଗୁହାରୀ ଜଣାଇ ପାରୁଛି । କେବଳ ଗୁହାରୀ ନୁହେଁ, ସମସ୍ୟାର ତତ୍କାଳ ସମାଧାନ ବି କରୁଛନ୍ତି ମୁଖ୍ୟମନ୍ତ୍ରୀ । ଏମିତି ମୁଖ୍ୟମନ୍ତ୍ରୀଙ୍କୁ ପାଇ ଲୋକେ କହୁଛନ୍ତି, ଆମ ମୁଖ୍ୟମନ୍ତ୍ରୀ, ଲୋକଙ୍କ ମୁଖ୍ୟମନ୍ତ୍ରୀ... ।
ଡବଲ୍ ଇଞ୍ଜିନର ବଳରେ ଶିକ୍ଷା, ସ୍ୱାସ୍ଥ୍ୟ, ପରିବହନ, ଗମନାଗମନ, ଗାଁର ବିକାଶ, ସହରୀ ଭିତ୍ତିଭୂମି ସବୁ ଦ୍ରୁତ ବେଗରେ ଧାଉଁଛି । ନିବେଶର ସୁଅ ମୁହାଁଇଛି ଓଡ଼ିଶାକୁ । ଆଇଟିରୁ ନେଇ ଏଆଇ ପର୍ଯ୍ୟନ୍ତ ସବୁ କ୍ଷେତ୍ରରେ ବୈପ୍ଳବିକ ଅଭିବୃଦ୍ଧି । ସବୁଠାରୁ ବଡ଼ କଥା, ଯୁବବର୍ଗଙ୍କ ପାଇଁ ଖୋଲିଛି ନିଯୁକ୍ତିର ଦ୍ୱାର । ଦୁଇ ବର୍ଷ ଭିତରେ ବିଭିନ୍ନ ବିଭାଗରେ ହଜାର ହଜାର ସରକାରୀ ପଦ ପୂରଣ ହୋଇଛି । ବୃତ୍ତିଗତ ଶିକ୍ଷାରେ ସଂରକ୍ଷଣ ବୃଦ୍ଧି କରି ସବ୍କା ସାଥ୍ ସବ୍କା ବିକାଶର ନାରା ଦେଇଛନ୍ତି ମୁଖ୍ୟମନ୍ତ୍ରୀ । ଶାସନ ପ୍ରଶାସନରେ ବାବୁଗିରିର ଅନ୍ତ ଘଟିଛି । ଦୁର୍ନୀତି ବିରୋଧରେ ଜାରି ରହିଛି କଠୋର ଅଭିଯାନ । ଅନେକ ନୂଆ ଯୋଜନା ଯୋଡ଼ି ହୋଇଛି ରାଜ୍ୟର ପ୍ରଗତିରେ । ପ୍ରମାଣିତ ହୋଇଛି-ପୂର୍ବ ସରକାର ଯାହା ୨୪ ବର୍ଷରେ କରିପାରିନଥିଲେ, ତାହାକୁ ୨୪ ମାସରେ କରି ଦେଖାଇଛନ୍ତି ମୋହନ ସରକାର ।
ସୁଭଦ୍ର ଶକ୍ତି, ଲକ୍ଷପତି ଦିଦି
କଥା ଦେଇଥିଲେ, କଥା ରଖିଲେ । ସରକାରକୁ ଆସିବା ମାତ୍ରେ ମୋହନ ସରକାର ମହିଳାଙ୍କୁ ଆର୍ଥିକ ଭାବେ ସଶକ୍ତ କରିବାକୁ ସୁଭଦ୍ରା ଯୋଜନାର ଶୁଭାରମ୍ଭ କଲେ । ୫ ହଜାର ଟଙ୍କା ଲେଖାଏଁ ବର୍ଷକୁ ୨ଟି କିସ୍ତି ପାଇ ୧ କୋଟିରୁ ଅଧିକ ମହିଳା ଖୁସ୍ । ମହିଳାଙ୍କୁ ମିଳିଛି ଆର୍ଥିକ ସ୍ୱାଧୀନତା । ଏବେ ସୁଦ୍ଧା ୪ଟି କିସ୍ତିରେ ପ୍ରାୟ ୨୦ ହଜାର ୬ଶହ କୋଟିରୁ ଅଧିକ ଟଙ୍କା ଦେଇ ସାରିଲେଣି ସରକାର । ଲକ୍ଷପତି ଦିଦି ସୃଷ୍ଟି କରିବାରେ ଓଡ଼ିଶା ଦେଶରେ ସବୁଠୁ ଅଗାରେ । ଏବେ ସୁଦ୍ଧା ୨୩ ଲକ୍ଷ ୪୬ ହଜାର ମହିଳାଙ୍କୁ ଲକ୍ଷପତି ଦିଦି କରି ଓଡ଼ିଶା ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛି । ଜୀବିକା ଅର୍ଜନରେ ସହଯୋଗ ଦେବା ପାଇଁ ରାଜ୍ୟ ସରକାର ଗତ ଦୁଇ ବର୍ଷରେ ୪ ଲକ୍ଷରୁ ଅଧିକ ଏସଏଚଜିଙ୍କୁ ପ୍ରାୟ ୧୦୨୪ କୋଟି ଟଙ୍କାର ସୁଧ ରିହାତି ପ୍ରଦାନ କରିଛନ୍ତି । ବିଭିନ୍ନ ସରକାରୀ ବିଭାଗ ପ୍ରାୟ ୭୯୭୩ କୋଟି ଟଙ୍କାର ବ୍ୟବସାୟ ଏସଏଚଜିଙ୍କୁ ଯୋଗାଇ ଦେଇଛନ୍ତି ।
ଅଧିକ ପଢ଼ନ୍ତୁ :- Mohan Government: ଆଜି ରାଜ୍ୟ ସରକାରଙ୍କ ୨ ବର୍ଷ ପୂର୍ତ୍ତି: ସାଢେ ୧୧ଟାରେ ଲୋକସେବା ଭବନରୁ ସମ୍ବୋଧିତ କରିବେ ମୁଖ୍ୟମନ୍ତ୍ରୀ
ଶିଳ୍ପ ହବ୍
ଶିଳ୍ପ ଆଉ ଘୋଷଣାରେ ଅଟକିଯାଇନି । ମୋହନ ସରକାର ଶିଳ୍ପ ନିବେଶ ପ୍ରସ୍ତାବକୁ ବାସ୍ତବ କ୍ଷେତ୍ରରେ ରୂପାୟନ ନେଇ ବ୍ୟାପକ ପଦକ୍ଷେପ ନେଇଛନ୍ତି । ନିଜେ ମୁଖ୍ୟମନ୍ତ୍ରୀ ଦେଶର ବିଭିନ୍ନ ଶିଳ୍ପ ହବ୍ ଓ ବିଦେଶ ଯାଇ ନିବେଶକଙ୍କୁ ଓଡ଼ିଶା ମାଟିକୁ ଆମନ୍ତ୍ରଣ କରିଛନ୍ତି । ଗତ ୨ ବର୍ଷରେ ୪୩୩ଟି ଶିଳ୍ପ ପ୍ରସ୍ତାବକୁ ମଞ୍ଜୁରି ମିଳିଛି । ଏଥିରେ ୮.୬୮ ଲକ୍ଷ କୋଟି ଟଙ୍କାର ନିବେଶ ଆସିଛି । ଏହାଦ୍ୱାରା ୫.୨୫ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି କରାଯାଇଛି । ସେହିଭଳି ଶିଳାନ୍ୟାସ ଏବଂ ଶୁଭାରମ୍ଭ ହୋଇଥିବା ପ୍ରକଳ୍ପ ସଂଖ୍ୟା ହେଉଛି ୧୪୮ । ଏଥିରେ ୨.୮୪ ଲକ୍ଷ କୋଟି ଟଙ୍କାର ନିବେଶ ୨.୩୭ ଲକ୍ଷର ନିଯୁକ୍ତି ସୁଯୋଗ ସୃଷ୍ଟି ହୋଇଛି । ଗତ ୨ ବର୍ଷରେ ଦେଶ ବିଦେଶରେ ୧୦ଟି ରୋଡ ସୋ ସମେତ ନିବେଶକଙ୍କ ସହ ୱାନ ଟୁ ୱାନ ୬୩୦ଟି ବୈଠକ, ୨୦ଟି ସେକ୍ଟରାଲ ରାଉଣ୍ଡ ଟେବୁଲ ଆୟୋଜିତ ହୋଇଛି । କେନ୍ଦ୍ରରୁ ମିଳିଛି ପର୍ଯ୍ୟାପ୍ତ ସହଯୋଗ । ଓଡ଼ିଶା ମାଟିରେ ନିବେଶ ପାଇଁ ପ୍ରଧାନମନ୍ତ୍ରୀ ନିବେଶକଙ୍କୁ ଆମନ୍ତ୍ରଣ କରିଛନ୍ତି । ମେକ୍ ଇନ୍ ଓଡ଼ିଶା କନକ୍ଲେଭରୁ ରାଜ୍ୟ ୧୬.୭୩ ଲକ୍ଷ କୋଟି ଟଙ୍କାର ନିବେଶ ପ୍ରସ୍ତାବ ପାଇଛି । ଜଗତସିଂହପୁରରୁ ନେଇ ଖୋର୍ଦ୍ଧା, ସମ୍ବଲପୁର, ଯାଜପୁର ଆଦି ସ୍ଥାନରେ ବୃହତ ଶିଳ୍ପର ନିଅଁ ପଡ଼ିଛି । ଆଇଟି କ୍ଷେତ୍ରରେ ଡବଲ୍ ଇଞ୍ଜିନ ସରକାରର ଫାଇଦା ମିଳିଛି ଓଡ଼ିଶାକୁ। ଆଗାମୀଦିନରେ ଓଡ଼ିଶା ସେମି କଣ୍ଡକ୍ଟର ହବ୍ ହେବାକୁ ଯାଉଛି ।
ସରକାରୀ ନିଯୁକ୍ତି ବର୍ଷା
ମୋହନ ସରକାରରେ ନିଯୁକ୍ତିର ବର୍ଷା । ମାତ୍ର ୨୨ ମାସରେ ୪୪ ହଜାର ୮୨ଜଣଙ୍କୁ ସରକାରୀ ଚାକିରି ମିଳିଛି । ବେସରକାରୀ କ୍ଷେତ୍ରରେ ୯୨ ହଜାର ନିଯୁକ୍ତି ଦିଆଯାଇଛି । କଥା ଦେଇଥିଲେ ୫ ବର୍ଷରେ ଦେଢ଼ ଲକ୍ଷ ସରକାରୀ ଚାକିରି ଦେବେ । ଏ ପ୍ରତିଶ୍ରୁତି ପୂରଣ ଦିଗରେ ସରକାର ପୂରା ଦମ୍ ଲଗାଇ ଦେଇଛନ୍ତି । ଖାଲି ପଦବୀ ପୂରଣ ନେଇ ସର୍ବାଧିକ ପ୍ରାଧାନ୍ୟ ଦିଆଯାଉଛି । ସରକାରୀ ଚାକିରି ଆଶାୟୀଙ୍କ ପାଇଁ ବଡ଼ ନିଷ୍ପତ୍ତି ନେଇଛନ୍ତି ସରକାର । ସରକାରୀ ଚାକିରି ବୟସ ସୀମା ୪୨କୁ ବୃଦ୍ଧି କରାଯାଇଛି । ଖାଲି ଏତିକି ନୁହେଁ, ଶିଳ୍ପାୟନ, ଆଇଟି କ୍ଷେତ୍ରରେ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି ପାଇଁ ପଦକ୍ଷେପ ନିଆଯାଉଛି । ରୋଜଗାର ବୃଦ୍ଧି ପାଇଁ ଶ୍ରମିକଙ୍କ ଦୈନିକ ମଜୁରୀ ବୃଦ୍ଧି କରାଯାଇଛି ।
ବୃତ୍ତିଗତ ଶିକ୍ଷାର ବଢ଼ିଲା ସଂରକ୍ଷଣ
ଦାବି ଦୀର୍ଘ ବର୍ଷରୁ ଥିଲା । ପ୍ରୟାସ ବି ହୋଇଥିଲା । କିନ୍ତୁ, କୌଣସି ସରକାର ଏହାକୁ କାର୍ଯ୍ୟକାରୀ କରିପାରିନଥିଲେ । ଇଞ୍ଜିନିୟରିଂ, ମେଡିକାଲ ସମେତ ସମସ୍ତ ବୃତ୍ତିଗତ ଶିକ୍ଷା ନାମଲେଖାରେ ସଂରକ୍ଷଣ ବୃଦ୍ଧି କରି ଯୁଗାନ୍ତକାରୀ ନିଷ୍ପତ୍ତି ନେଇଛନ୍ତି ମୋହନ ସରକାର । କ୍ୟାବିନେଟର ଏ ନିଷ୍ପତ୍ତିକୁ ତତ୍କାଳ ଲାଗୁ କରିବା ଅଣ୍ଟା ଭିଡ଼ିଛି ବିଭାଗ । ଚଳିତ ଶିକ୍ଷା ବର୍ଷ (୨୦୨୬-୨୭) ରୁ ବୃତ୍ତିଗତ ଶିକ୍ଷାରେ ନାମଲେଖା ପାଇଁ ଲାଗୁ ହେବ ବର୍ଦ୍ଧିତ ସଂରକ୍ଷଣ ବ୍ୟବସ୍ଥା । ଏଇ ବର୍ଷରୁ ହିଁ ବୃତ୍ତିଗତ ଶିକ୍ଷା ନାମଲେଖାରେ ଅନୁସୂଚିତ ଜନଜାତି (ଏସ୍ଟି)ଙ୍କୁ ୨୨.୫%, ଅନୁସୂଚିତ ଜାତି (ଏସ୍ସି)ଙ୍କୁ ୧୬.୨୫%, ସାମାଜିକ ଓ ଶିକ୍ଷାଗତ ଭାବେ ପଛୁଆ ବର୍ଗ (ଏସ୍ଇବିସି)ଙ୍କୁ ୧୧.୨୫% ସଂରକ୍ଷଣ ମିଳିବ । ସବୁଠାରୁ ବଡ଼ କଥା ହେଲା, ପଛୁଆ ବର୍ଗ ଛାତ୍ରଛାତ୍ରୀ ପ୍ରଥମ ଥର ପାଇଁ ବୃତ୍ତିଗତ ଶିକ୍ଷାରେ ଏହି ସଂରକ୍ଷଣ ପାଇବେ । ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତିକୁ ସବୁ ସ୍ତରରେ ପ୍ରଶଂସା କରାଯାଇଛି । ସେହିପରି ନୂଆ ସରକାର ଆସିବା ପରେ ଉଚ୍ଚଶିକ୍ଷାରେ ଏସ୍ଇବିସି ଛାତ୍ରଛାତ୍ରୀଙ୍କ ନାମଲେଖା ପାଇଁ ୧୧.୨୫% ଆସନ ସଂରକ୍ଷଣ ଲାଗୁ ହୋଇଛି । ଯାହା ଆଗରୁ ନଥିଲା । ସ୍ନାତକ, ସ୍ନାତକୋତ୍ତର, ଆଇନ ପାଠ୍ୟକ୍ରମ, ଯୁକ୍ତ ଦୁଇ, ଧନ୍ଦାମୂଳକ ପାଠ୍ୟକ୍ରମ ଆଦିରେ ଏହି ସଂରକ୍ଷଣ ଲାଗୁ ହୋଇଛି ।
ଝିଅ ବାହାଘର ପାଇଁ ସାହ
ଗରିବ ପରିବାରକୁ ଝିଅ ବିବାହ ପାଇଁ ସାହା ହୋଇଛନ୍ତି ମୁଖ୍ୟମନ୍ତ୍ରୀ । ଆରମ୍ଭ ହୋଇଛି ମୁଖ୍ୟମନ୍ତ୍ରୀ କନ୍ୟା ବିବାହ ଯୋଜନା । ଏହି ଯୋଜନାରେ କନ୍ୟା ବିବାହ ପାଇଁ ୬୦ ହଜାର ଟଙ୍କାର ସହାୟତା ଯୋଗାଇ ଦିଆଯାଉଛି । ଏବେ ସୁଦ୍ଧା ୧୩୮୦ ଝିଅଙ୍କର ବିବାହ ସମ୍ପନ୍ନ ହୋଇପାରିଛି ସରକାରଙ୍କ ଏହି ସହଯୋଗ ପାଇଁ । ସରକାରଙ୍କ ଏଭଳି ଯୋଜନାକୁ ଗରିବ ସାଧାରଣ ପରିବାର ବେଶ୍ ପ୍ରଶଂସା କରିଛନ୍ତି ।
ଆୟୁଷ୍ମାନ ଭବଃ
ସୁସ୍ଥ ଓଡ଼ିଶା ଗଠନ ପାଇଁ ମୋହନ ସରକାର ନେଇଛନ୍ତି ବ୍ୟାପକ ପଦକ୍ଷେପ । ପଣ କରିଛନ୍ତି, ଅର୍ଥ ଅଭାବ କାରଣରୁ କେହି ଯେମିତି ଚିକିତ୍ସା ସେବାରୁ ବଞ୍ଚିତ ହେବେନି । ସଭିଙ୍କ ଦୀର୍ଘ ଆୟୁଷ ପାଇଁ ଓଡ଼ିଶାବାସୀଙ୍କୁ ମିଳିଛି ଆୟୁଷ୍ମାନ କାର୍ଡ । ନୂଆ ସରକାର ଗଠନ ପରେ ୨୦୨୫ ଏପ୍ରିଲରୁ ରାଜ୍ୟରେ ଲାଗୁ ହୋଇଛି ଆୟୁଷ୍ମାନ ଭାରତ-ଗୋପବନ୍ଧୁ ଜନ ଆରୋଗ୍ୟ ଯୋଜନା । ଏବେ ସୁଦ୍ଧା ୧ କୋଟି ୩ ଲକ୍ଷ ପରିବାରର ୩ କୋଟି ୪୬ ଲକ୍ଷ ହିତାଧିକାରୀଙ୍କୁ ଏହି ଯୋଜନାରେ ମାଗଣା ଚିକିତ୍ସା ସୁବିଧା ମିଳିପାରିଛି । ଖାଲି ସେତିକି ନୁହେଁ, ବରିଷ୍ଠ ନାଗରିକଙ୍କ ପାଇଁ ଆସିଛି ବୟୋ ବନ୍ଦନା ଯୋଜନା । ୭୦ ବର୍ଷରୁ ଅଧିକ ସମସ୍ତ ବୃଦ୍ଧ ଓ ବୃଦ୍ଧା ଏହି ଯୋଜନାରେ ମାଗଣା ଚିକିତ୍ସା ସେବା ପାଇ ପାରୁଛନ୍ତି ।
ରାଜ୍ୟର ୨୨ ଲକ୍ଷ ୪୧ ହଜାର ହିତାଧିକାରୀ ଏହି ଯୋଜନାର ଲାଭ ପାଉଛନ୍ତି । ଏହି କାର୍ଡ ବଳରେ ଦେଶର ୩୨ ହଜାରରୁ ଅଧିକ ହସ୍ପିଟାଲରେ ସ୍ୱାସ୍ଥ୍ୟ ସେବା ପାଇପାରିବେ ହିତାଧିକାରୀ । ଖାଲି ସେବା ନୁହେଁ, ଡାକ୍ତର ଅଭାବ ଦୂର କରିବାକୁ ମୋହନ ସରକାର ସର୍ବାଧିକ ଗୁରୁତ୍ୱ ଦେଇଛନ୍ତି । ୫୧୯୭ ମେଡିକାଲ ଅଫିସର ଓ ପାରାମେଡିକ୍ସ ନିଯୁକ୍ତ ହୋଇଛନ୍ତି । ନୂଆ ପଦବୀ ସୃଷ୍ଟି ସହ ସ୍ୱାସ୍ଥ୍ୟ ଭିତ୍ତିଭୂମି ସୁଦୃଢ଼ ଦିଗରେ ନିଆଯାଇଛି ଅନେକ ଉଲ୍ଲେଖନୀୟ ପଦକ୍ଷେପ । ଆମ ହସ୍ପିଟାଲ ଢାଞ୍ଚାରେ ଆୟୁଷ ହସ୍ପିଟାଲର ଭିତ୍ତିଭୂମି ସଶକ୍ତ କରାଯାଉଛି । ରାଜ୍ୟରେ ୯ଟି ନୂଆ ମେଡିକାଲ କଲେଜ ପ୍ରତିଷ୍ଠା ଦିଗରେ ସରକାର ଚଳିତ ରାଜ୍ୟ ବଜେଟରେ ୨୨ ହଜାର କୋଟି ଟଙ୍କା ପ୍ରାବଧାନ କରାଯାଇଛି । ୮ଟି ନର୍ସିଂ କଲେଜ ବି ଘୋଷଣା ହୋଇଛି । ବିଭିନ୍ନ ଜିଲ୍ଲାରେ ପିପିପି ମୋଡରେ ଆଫଡେବୁଲ୍ ହେଲଥ କେୟାର ପ୍ରୋଜେକ୍ଟ ଆରମ୍ଭ କରାଯାଇଛି । କେବଳ ଭୁବନେଶ୍ୱର କି କଟକ ନୁହେଁ, ଗାଁ ସ୍ତରରେ ଚିକିତ୍ସା ସେବା ଓ ଭିତ୍ତିଭୂମିରେ ଆସିଛି ବିରାଟ ପରିବର୍ତ୍ତନ ।
ଡବବ ଇଞ୍ଜିନର ହାଇସ୍ପିଡ୍ କରିଡ଼ର
ଡବବ ଇଞ୍ଜିନ ସରକାରର ଲାଭ ପାଇଛି ଓଡ଼ିଶା । ଯେତେବେଳେ ରାଜ୍ୟ ଯାହା ଦାବି କରିଛି, କେନ୍ଦ୍ରରୁ ସବୁଜ ସଙ୍କେତ ଦେଖାଇଛନ୍ତି ମୋଦି ସରକାର । ଦୀର୍ଘ ପ୍ରତୀକ୍ଷା ପରେ ଓଡ଼ିଶାର ଉପକୂଳ ରାଜପଥ (କୋଷ୍ଟାଲ ହାଇୱେ) ପ୍ରକଳ୍ପକୁ ମିଳିଛି କ୍ୟାବିନେଟ ଅନୁମୋଦନ । ଏବେ ତ୍ୱରିତ ଗତିରେ ଆଗକୁ ବଢ଼ିବ ପ୍ରକଳ୍ପ । ଖୋର୍ଦ୍ଧା ରାମେଶ୍ୱରରୁ ପାରାଦୀପ ପର୍ଯ୍ୟନ୍ତ ସଂଯୋଗ ହେବ ନୂଆ ହାଇସ୍ପିଡ କରିଡର । ଯାତ୍ରା ଅବଧି କମିଯିବ ଅଢ଼େଇ ଘଣ୍ଟା । ଖାଲି ସେତିକି ନୁହେଁ, ଆଗକୁ ପାରାଦୀପରୁ କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱର ଦେଇ ଦୀଘା ପର୍ଯ୍ୟନ୍ତ ଲମ୍ବିବ କୋଷ୍ଟାଲ ହାଇୱେର ଦ୍ୱିତୀୟ ପର୍ଯ୍ୟାୟ ପ୍ରକଳ୍ପ । ଏ ଦିଗରେ ବି ପ୍ରକ୍ରିୟା ଜାରି ରହିଛି । ସେହିପରି କ୍ୟାପିଟାଲ ରିଜନ ରିଙ୍ଗରୋଡ ପ୍ରକଳ୍ପ ବି ସବୁ ମଞ୍ଜୁରୀ ପାଇଁ ଆଗେଇ ଚାଲିଛି । ଏହି ପ୍ରକଳ୍ପ ହେଲେ ଖୋର୍ଦ୍ଧା ପଟୁ ସିଧା କଟକ ଟାଙ୍ଗୀ ଯାଏ ନୂଆ କରିଡର ଫିଟିବ । ଏହି ଦୁଇ ପ୍ରକଳ୍ପ ବାଦ୍ ପୁରୀ-ଭୁବନେଶ୍ୱର ଏନଏଚ ପ୍ରଶସ୍ତିକରଣ ପ୍ରକ୍ରିୟା ବି ଆଗେଇଛି । ସେହିପରି ଓଡ଼ିଶା ପାଇଁ ଆହୁରି କିଛି ଏନଏଚ ପ୍ରକଳ୍ପ ମଧ୍ୟ ହାତକୁ ନେଇଛନ୍ତି ସରକାର ।
