ଭୁବନେଶ୍ୱର, ୩୧/୦୧: ସରକାର ନିର୍ଦ୍ଦେଶ ଦେଲେ । ଆଇଏଏସ୍ ବାବୁଙ୍କ ଭିତରେ ବାଣ୍ଟିଲେ ଜିଲ୍ଲା । ପ୍ରତି ମାସରେ ଦୁଇ ତିନି ଦିନ ନିଶ୍ଚିତ ଜିଲ୍ଲା ଗସ୍ତରେ ଯାଇ ଗାଁକୁ ଯିବେ । ବିକାଶମୂଳକ କାମ ସହ ସରକାରୀ ଯୋଜନାର ତଦାରଖ କରିବେ । ମାତ୍ର ଏ ସରକାରୀ ନିର୍ଦ୍ଦେଶ ବାବୁମାନଙ୍କ ପାଇଁ ପାଲଟିଗଲା ପାଣିର ଗାର । ଅଧିକାଂଶ ଜିଲ୍ଲାକୁ ବାବୁମାନେ ଆଦୌ ଯାଇନାହାନ୍ତି । କିଛି ଜିଲ୍ଲାକୁ ଗତ ୫ ମାସ ମଧ୍ୟରେ କିଏ ଥରେ ଯାଇଛନ୍ତି । କିଏ ଦିନକ ପାଇଁ ତ ଆଉ କିଏ ଓଳିଏରେ କାମ ସାରି ଦେଇଛନ୍ତି । ଯିଏ ବି ଗସ୍ତ କରିଛନ୍ତି କୁନ୍ଥକୁନ୍ଥ ହୋଇ । ଆଗ୍ରହ ନାହିଁ କି ଆନ୍ତରିକତା ।
ବିକଶିତ ଓଡ଼ିଶା ଗଠନ କରିବାକୁ ନୂଆ ସରକାର ନକ୍ସା ପ୍ରସ୍ତୁତ କରୁଥିଲା ବେଳେ ଆମ ବାବୁମାନେ କିନ୍ତୁ ଗାଁ କୁ ଯିବାକୁ ପୂରା ଅମଙ୍ଗ । ନୂଆ ସରକାର ଆସିବା ପରେ ବ୍ୟବସ୍ଥାକୁ ବଦଳାଇବାକୁ ନିଷ୍ପତ୍ତି ନେଲେ । ସେପ୍ଟେମ୍ବର ମାସରେ ସରକାରୀ ନିର୍ଦ୍ଦେଶ ବାହାରିଲା । ୩୦ ଆଇଏଏସ୍ ଅଧିକାରୀଙ୍କୁ ଜିଲ୍ଲା ବଣ୍ଟାଗଲା । ଜିଲ୍ଲା ବୁଲିବେ ସଚିବ । ପ୍ରତି ମାସରେ ଦୁଇରୁ ତିନି ଦିନ ନିଶ୍ଚିତ ଜିଲ୍ଲାକୁ ଯିବେ । ପଞ୍ଚାୟତକୁ ଯିବେ । ଯୋଜନାର ତଦାରଖ କରିବେ । ଯେଉଁଠିକୁ ଚାହିଁବେ ଅଚାନକ ପରିଦର୍ଶନ କର ସତ ମିଛ ଜାଣିପାରିବେ । ଅପହଞ୍ଚ ଓ ଆଦିବାସୀ ଅଞ୍ଚଳକୁ ଯାଇ ବିକାଶ କାମ କେଉଁଠି ପହଞ୍ଚିଛି, ତାକୁ ନିଜ ଆଖିରେ ଦେଖିବେ । ସରକାରୀ ଯୋଜନାରେ ଲୋକେ ମୌଳିକ ସୁବିଧା ପାଉଛନ୍ତି ନା’ ବଞ୍ଚିତ ଅଛନ୍ତି, ପଚାରି ବୁଝିବେ । ଅନାଥାଶ୍ରମ କିମ୍ବା ଆହାର କେନ୍ଦ୍ରରେ ବାବୁ ମଧ୍ୟାହ୍ନ ଭୋଜନ ଖାଇବେ । ଯାଞ୍ଚ କରିବେ ଖାଦ୍ୟର ଗୁଣବତ୍ତା । ପରିଷ୍କାର, ପରିଚ୍ଛନ୍ନତା ଓ ସୁରକ୍ଷା ଦିଗକୁ ପରଖିବେ । କାର୍ଯ୍ୟକାରୀ ହେଉଥିବା ଯୋଜନାର ଟିକିନିଖି ସମୀକ୍ଷା ହେବ । ଅଭିଯୋଗ ଶୁଣାଣିରେ କେତେ ସମାଧାନ ହୋଇଛି ତାହାକୁ ମଧ୍ୟ ଯାଞ୍ଚ କରିବେ ସଚିବ । ଏ ନିର୍ଦ୍ଦେଶ କିନ୍ତୁ କାଟୁ କରୁନି ।
ସେପ୍ଟେମ୍ବରରୁ ଜାନୁଆରୀ । ୫ ମାସ ବିତିଲାଣି । ସମୃଦ୍ଧ ଓଡ଼ିଶା ଗଠନ ପାଇଁ ଡବଲ ଇଞ୍ଜିନ ସରକାର ବହୁ ଲୋକାଭିମୁଖୀ କାର୍ଯ୍ୟକ୍ରମ ହାତକୁ ମଧ୍ୟ ନେଇଛନ୍ତି । ତୃଣୂମଳ ସ୍ତରରେ କାର୍ଯ୍ୟକାରୀ ପ୍ରକଳ୍ପର ଗୁଣାତ୍ମକ ମାନ ସହ ଜନକଲ୍ୟାଣ ଯୋଜନାର ସୁଫଳ ଯୋଗ୍ୟ ହିତାଧିକାରୀ ପାଉଛନ୍ତି ନା ନାହିଁ ତାହାକୁ ନେଇ ସରକାର ଅନ୍ଧାରରେ । ବିକାଶ ପ୍ରକ୍ରିୟାକୁ ତ୍ୱରାନ୍ୱିତ କରିବା ଏବଂ ସାଧାରଣ ଲୋକଙ୍କ ସହ ଶାସନକୁ ଯୋଡ଼ିବାକୁ ଅମଲାମାନେ ଲୋକଙ୍କ ପାଖକୁ ଯିବାର ଢେର୍ ଆବଶ୍ୟକତା ରହିଛି । ନିଃସନ୍ଦେହରେ ଲୋକସେବା ଭବନର ବାବୁମାନେ ଜିଲ୍ଲା ଗସ୍ତରେ ଗଲେ ତାର ସୁଦୂରପ୍ରସାରୀ ପ୍ରଭାବ ଜିଲ୍ଲା ଉପରେ ପଡ଼ନ୍ତା । ଦୀର୍ଘମିଆଦି ଭାବେ ଜିଲ୍ଲାଗୁଡ଼ିକ ଏହାର ଲାଭ ଉଠାଇପାରନ୍ତେ। ମାତ୍ର ଗାଁ ମାଟି ମାଡ଼ିବାକୁ ବାବୁଙ୍କ ଅନାଗ୍ରହ ଲାଗି ରହିଛି ।
ବିଭିନ୍ନ ଜିଲ୍ଲାରୁ ଆମ ପ୍ରତିନିଧିଙ୍କ ସୂଚନା କହୁଛି, କାଁ ଭାଁ ବାବୁ ଜିଲ୍ଲା ଗସ୍ତ କରିଛନ୍ତି । କିଏ କେବଳ ସମୀକ୍ଷା ବୈଠକ କରିଛନ୍ତି । ଆଉ କିଏ ଜିଲ୍ଲା ମୁଖ୍ୟାଳୟ ନିକଟରେ ଥିବା ଗାଁଟିଏ ବୁଲି ରାଜଧାନୀ ବାହୁଡ଼ିଛନ୍ତି । ଯୋଜନା ଓ ସଂଯୋଜନା ବିଭାଗର ମାର୍ଗଦର୍ଶିକା କହୁଛି, ୧୬ ଜିଲ୍ଲାରେ ଥିବା ୨୯ଟି ଆକାଂକ୍ଷୀ ବ୍ଲକ୍ ଆଇଏଏସ୍ ଅଧିକାରୀ ବୁଲିବେ । ୮ ଡିଏମ୍ଏଫ୍ ଜିଲ୍ଲାରେ ଜିଲ୍ଲା ଖଣିଜ ପାଣ୍ଠି ଓ ଓମ୍ବାଡ୍ସି ପାଣ୍ଠିର କିଭଳି ବିନିଯୋଗ ହୋଇଛି, ତାର ତଦାରଖ କରିବେ । ଜିଲ୍ଲାରେ ଥିବା ବନ୍ଦର, ବିମାନବନ୍ଦର, ଶିଳ୍ପପାର୍କ, ମେଡିକାଲ କଲେଜ ଓ ଜଳସେଚନ ପ୍ରକଳ୍ପର ସମୀକ୍ଷା କରି ମୁଖ୍ୟ ସଚିବଙ୍କୁ ରିପୋର୍ଟ ଦେବେ । ବାବୁମାନେ ନୂଆ ସରକାରଙ୍କ ଏ ନିର୍ଦ୍ଦେଶକୁ ଅଳିଆଗଦାକୁ ଫିଙ୍ଗି ଦେଇଛନ୍ତି ।
ବାବୁମାନଙ୍କ ଉଦାସୀନତା ଆଦିବାସୀବହୁଳ ଓ ଦୁର୍ଗମ ଅଞ୍ଚଳର ବିକାଶ ରାସ୍ତାରେ ପ୍ରତିବନ୍ଧକ ହୋଇ ଛିଡ଼ା ହୋଇଛି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ମଧ୍ୟ ହାତବାନ୍ଧି ବସିଛି । ବିକଶିତ ଓଡ଼ିଶା ଗଠନ ପାଇଁ ଏ ଦିଗରେ ତ୍ୱରିତ ପଦକ୍ଷେପ ନେବା ଜରୁରି ।
