ଭୁବନେଶ୍ୱର,୧୯/୦୫: ରାଜ୍ୟକୁ ଅକ୍ଷୟ ଶକ୍ତି ବିନିର୍ମାଣ ହବ୍ ଭାବେ ବିକଶିତ କରିବା ଦିଗରେ ରାଜ୍ୟରେ ବିଭିନ୍ନ ଯୋଜନା ଏବେ ପ୍ରଣୟନ ହେଉଛି । ରାଜ୍ୟରେ ସୋଲାର ଫଟୋଭୋଲଟିକ ସେଲ୍, ଇଲେକ୍ଟ୍ରୋଲାଇଜର, ବ୍ୟାଟେରୀ ଷ୍ଟୋରେଜ ସିଷ୍ଟମ ଭଳି କ୍ଷେତ୍ରରେ ନିବେଶ ଲାଗି କମ୍ପାନି ଏବେ ଆଗଭର ହେଉଛନ୍ତି । ଓଡ଼ିଶାକୁ ଅକ୍ଷୟ ଶକ୍ତି ଯନ୍ତ୍ରାଂଶ ଉତ୍ପାଦନରେ ଟପ୍ ୧୦ ରାଜ୍ୟରେ ସାମିଲ କରାଇବା ଲକ୍ଷ୍ୟ । ମେକ୍ ଇନ୍ ଓଡ଼ିଶାରେ ଅକ୍ଷୟ ଶକ୍ତି କ୍ଷେତ୍ର ୪.୪ ଲକ୍ଷ କୋଟିର ନିବେଶ ପ୍ରସ୍ତାବ ପାଇଛି । ଏହା ରାଜ୍ୟକୁ ଅକ୍ଷୟ ଶକ୍ତି ବିନିର୍ମାଣ ହବ୍ ଭାବେ ବିକଶିତ କରିବାରେ ପ୍ରମୁଖ ଭୂମିକା ଗ୍ରହଣ କରିବ ବୋଲି ଶିଳ୍ପ ବିଭାଗ ପକ୍ଷରୁ ଆଶା କରାଯାଇଛି ।
ଶିଳ୍ପ ବିଭାଗ ସୂଚନା ମୁତାବକ ଶିଳ୍ପ କ୍ଷେତ୍ରରେ ୨୫% ଅକ୍ଷୟ ଶକ୍ତି ବ୍ୟବହାର ଯୋଜନା ମଧ୍ୟ ରହିଛି । ୨୦୩୦ ସୁଦ୍ଧା ଅକ୍ଷୟ ଶକ୍ତି କ୍ଷେତ୍ରରେ ନିଯୁକ୍ତିକୁ ୧.୫ ଗୁଣ ବଢ଼ାଇବେ ରାଜ୍ୟ ସରକାର । ବାର୍ଷିକ ୩ରୁ ୫ ନିୟୁତ ଟନ୍ ଗ୍ରୀନ ହାଇଡ୍ରୋଜେନ ଉତ୍ପାଦନ ଦିଗରେ ରାଜ୍ୟ ଅଗ୍ରସର ହେଉଛି । ଏହା ଦ୍ୱାରା ପୂର୍ବ ଏବଂ ଦକ୍ଷିଣ ଭାରତରେ ଗ୍ରୀନ ଇଣ୍ଡଷ୍ଟ୍ରିଆଲ କରିଡର ନିର୍ମାଣରେ ସହାୟକ ହେବ । ରାଜ୍ୟ ଏବେ ଗ୍ରୀଡ୍ ଗୁଡ଼ିକର ଆଧୁନିକୀକରଣ, ଗ୍ରୀନ ହାଇଡ୍ରୋଜେନ ଯାନ ଚଳାଚଳ, ଏନର୍ଜି ଷ୍ଟୋରେଜ, ହାଇଡ୍ରୋଜେନ କ୍ଷେତ୍ରରେ ଗବେଷଣା ପ୍ରତିଷ୍ଠାନ, ହାଇଡ୍ରୋଜେନ ଟେଷ୍ଟିଂ ଲ୍ୟାବ ଏବଂ ସେଣ୍ଟର ଅଫ୍ ଏକ୍ସିଲେନ୍ସ ଦ୍ୱାରା ନବସୃଜନ ଏବଂ ଟେକ୍ନୋଲୋଜି କ୍ଷମତାକୁ ବଢ଼ାଇବାକୁ ଯୋଜନା ରଖିଛନ୍ତି ।
ସେହିଭଳି ଉପଯୁକ୍ତ ଭୂମିର ଉପଲବ୍ଧତା ଅଭାବକୁ ନଜରରେ ରଖି ବଡ଼ ଜଳାଶୟ ଗୁଡ଼ିକରେ ଭାସମାନ ସୋଲାର ପିଭି ପ୍ରକଳ୍ପ ଉପରେ ମଧ୍ୟ ରାଜ୍ୟ ଫୋକସ କରୁଛି । ଏ କ୍ଷେତ୍ରରେ ଅକ୍ଷୟ ଶକ୍ତି ଜମି ଲିଜ୍ ନୀତି ଉପରେ କାମ ହେଉଛି । ଏହା ଦ୍ୱାରା ପତିତ ଜମି ଗୁଡ଼ିକୁ ସୌର ପ୍ରକଳ୍ପ ଲାଗି ବ୍ୟବହାର କରାଯାଇପାରିବ । ବିକଶିତ ଭାରତ ୨୦୪୭କୁ ନଜରରେ ରଖି ରାଜ୍ୟ ବିଜୁଳି ରପ୍ତାନି ଭାବେ ଉଭା ହେବାକୁ ଲକ୍ଷ୍ୟ ରଖିଛି । ରାଜ୍ୟ ସରକାରଙ୍କ ଯୋଜନା ଏବଂ ପିଏମ୍ କୁସୁମ ଦ୍ୱାରା କୃଷି କ୍ଷେତ୍ରରେ ୫୦% ଅକ୍ଷୟ ଶକ୍ତି ବ୍ୟବହାର ଯୋଜନା ରହିଛି।
ଶକ୍ତି ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି, ନୂଆ ଅକ୍ଷୟ ଶକ୍ତି ନୀତି ଦ୍ୱାରା ନିବେଶ, ଶିଳ୍ପ ସହ ଗୋଷ୍ଠୀ ବିକାଶ ଭଳି ଦିଗକୁ ପ୍ରାଥମିକତା ଦିଆଯାଇଛି । ପ୍ରକଳ୍ପ ଗୁଡ଼ିକର ତ୍ୱରୀତ କାର୍ଯ୍ୟାନ୍ୱୟନ, ଅକ୍ଷୟ ଶକ୍ତିକୁ ଗ୍ରହଣୀୟତାକୁ ତ୍ୱରାନ୍ୱିତ କରିବା ଏବଂ ଭବିଷ୍ୟପନ୍ଥୀ ଗ୍ରୀଡ ଭଳି ବିକାଶ ଉପରେ ବିସ୍ତୃତ କାର୍ଯ୍ୟକ୍ରମ ଗ୍ରହଣ କରାଯାଇଛି । ଦେଶର ନେଟ୍ ଜିରୋ ଲକ୍ଷ୍ୟ ଦିଗରେ ଓଡ଼ିଶା ଏକ ମଡେଲ ରାଜ୍ୟ ହେବା ଦିଗରେ ଅଗ୍ରସର ।
ମେକ୍ ଇନ୍ ଓଡ଼ିଶାରେ ମିଳିଥିବା ୪.୪୦ ଲକ୍ଷ କୋଟିର ଅକ୍ଷୟ ଶକ୍ତି ନିବେଶ ପ୍ରସ୍ତାବ ମଧ୍ୟରେ ୨.୦୬ ଲକ୍ଷ କୋଟିର ୩୫ ଗିଗାୱାଟ୍ ପମ୍ପଡ ଷ୍ଟୋରେଜ ପ୍ରକଳ୍ପ, ୧.୧୦ ଲକ୍ଷ କୋଟି ଟଙ୍କାର ୨୧ ଗିଗାୱାଟର ସୋଲାର ପ୍ରକଳ୍ପ ରହିଛି । ରାଜ୍ୟ ଅକ୍ଷୟ ଶକ୍ତି ନୀତି ୨୦୨୨ ଲାଗୁ ହେବା ପରେ ୧୨,୩୧୮ କୋଟିର ପ୍ରକଳ୍ପକୁ ମଞ୍ଜୁରୀ ମିଳିଛି । ରାଜ୍ୟ ୨୦୩୦ ସୁଦ୍ଧା ୧୦.୯୬ ଗିଗାୱାଟ ଅକ୍ଷୟ ଶକ୍ତି କ୍ଷମତା ଯୋଡିବାକୁ ଲକ୍ଷ୍ୟ ରଖିଛି । ଏଥିରେ ୭.୫ ଗିଗାୱାଟ ସୋଲାର ଏବଂ ୨ ଗିଗାୱାଟ ପବନ ଶକ୍ତି କ୍ଷମତା ସାମିଲ ରହିବ ।
