କଟକ,୧୩/୦୩: ଦୃଷ୍ଟିବାଧିତ ଛାତ୍ରଛାତ୍ରୀଙ୍କ ପାଇଁ ଭାରତର ପ୍ରଥମ ବିଶ୍ୱବିଦ୍ୟାଳୟ କଟକରେ ସ୍ଥାପନ ହେବ । ଏନେଇ ୭ମାସ ତଳୁ ସରକାରଙ୍କର ପ୍ରସ୍ତାବ ରହିଛି । ସନ୍ଥକବି ଭୀମଭୋଇଙ୍କ ନାମରେ ହେବାକୁ ଥିବା ଏହି ବିଶ୍ୱବିଦ୍ୟାଳୟ ପାଇଁ ୪୦ ଏକର ଜମି ଯୋଗାଇ ଦେବାକୁ କଟକ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁସାରେ ଖୁବ୍ ଶୀଘ୍ର ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ ହେବାକୁ ଯାଉଛି । କଟକ ସହର ଉକପଣ୍ଠରେ ଏହି ବିଶ୍ୱବିଦ୍ୟାଳୟ ପ୍ରତିଷ୍ଠା କରିବାକୁ ଯୋଜନା ରହିଥିବା ସୂଚନା ମିଳିଛି ।
ଦୃଷ୍ଟିହୀନ ଛାତ୍ରଛାତ୍ରୀଙ୍କ ପାଇଁ ଭାରତରେ କୌଣସି ସ୍ୱତନ୍ତ୍ର ବିଶ୍ୱବିଦ୍ୟାଳୟ ନାହିଁ । ବିଭିନ୍ନ ଶିକ୍ଷାନୁଷ୍ଠାନ, କଲେଜ, ବିଶ୍ୱବିଦ୍ୟାଳୟରେ ଅନ୍ୟ ସାଧାରଣ ଛାତ୍ରଛାତ୍ରୀଙ୍କ ପରି ଦୃଷ୍ଟିବାଧିତମାନେ ପାଠ ପଢୁଛନ୍ତି । ଆକଳନ କହୁଛି, ଭାରତରେ ପ୍ରାୟ ୫୦ଲକ୍ଷରୁ ଅଧିକ ଦୃଷ୍ଟିବାଧିତ ରହିଛନ୍ତି । ୫ଲକ୍ଷ ୨୦ ହଜାର ଦୃଷ୍ଟିବାଧିତ ଓଡ଼ିଶାରେ ରହିଥିବା ବେଳେ ସେଥିରୁ ପ୍ରାୟ ୨ ଲକ୍ଷ ହେଉଛନ୍ତି ଯୁବବର୍ଗ । ତେଣୁ ଏମାନଙ୍କୁ ଉଚ୍ଚ ଶିକ୍ଷା ଲାଭର ସୁବିଧା ଦେବାକୁ କେବଳ ଦୃଷ୍ଟିବାଧିତଙ୍କ ପାଇଁ ସମର୍ପିତ ଏକ ବିଶ୍ୱବିଦ୍ୟାଳୟ ପ୍ରତିଷ୍ଠା କରିବାକୁ ଦୀର୍ଘ ବର୍ଷ ଧରି ଦାବି ହୋଇଆସୁଛି । ନିର୍ଦ୍ଦିଷ୍ଟ ଭାବେ ତଥ୍ୟ ନଥିଲେ ମଧ୍ୟ ପାଖାପାଖି ୨ ହଜାର ଦୃଷ୍ଟିବାଧିତ ଛାତ୍ରଛାତ୍ରୀ ଓଡ଼ିଶାର ବିଭିନ୍ନ ସରକାରୀ ଓ ବେସରକାରୀ କଲେଜରେ ପାଠ ପଢୁଛନ୍ତି । କିଛି ବିଶ୍ୱବିଦ୍ୟାଳୟରେ ସେମାନଙ୍କୁ ନିର୍ଦ୍ଦିଷ୍ଟ ପାଠ୍ୟକ୍ରମ ଓ ପ୍ରୋଗ୍ରାମ୍ରେ ମଧ୍ୟ ସାମିଲ୍ କରାଯାଉଛି । କିନ୍ତୁ ବୈଷୟିକ ଶିକ୍ଷାଦାନ ଓ ତାଲିମ କ୍ଷେତ୍ରରେ ଦୃଷ୍ଟିହୀନ ଛାତ୍ରଛାତ୍ରୀମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି ।
ଏହାକୁ ଦୃଷ୍ଟିରେ ରଖି ଓଡ଼ିଶାରେ ପ୍ରଥମ ଦୃଷ୍ଟିବାଧିତ ବିଶ୍ୱବିଦ୍ୟାଳୟ ସ୍ଥାପନ କରିବାକୁ ସରକାରଙ୍କ ପ୍ରସ୍ତାବ ରହିଛି । ଜାପାନର ଦୃଷ୍ଟିବାଧିତ ସୁକୁବା ବିଶ୍ୱବିଦ୍ୟାଳୟର ଏକ ପ୍ରତିନିଧି ମଣ୍ଡଳୀ ୨୦୨୪ ଅଗଷ୍ଟ ମାସରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗର ଅଧିକାରୀଙ୍କୁ ଭେଟିଥିଲେ । ସୁକୁବା ବିଶ୍ୱବିଦ୍ୟାଳୟ ଢାଞ୍ଚାରେ ଓଡ଼ିଶାରେ ପ୍ରଥମ ଦୃଷ୍ଟିବାଧିତ ବିଶ୍ୱବିଦ୍ୟାଳୟ ନିର୍ମାଣ କରିବାକୁ ଯୋଜନା କରାଯାଇଥିଲା । ସେଠାକାର ବିଶ୍ୱବିଦ୍ୟାଳୟର ମଡେଲ୍ ମଧ୍ୟ ଆଲୋଚନା କରାଯାଇ ତଦନୁଯାୟୀ ଡିପିଆର୍ (ଡିଟେଲ୍ଡ୍ ପ୍ରୋଜେକ୍ଟ ରିପୋର୍ଟ) କରିବାକୁ ନିଷ୍ପତ୍ତି ହୋଇଥିଲା ।
