ଭୁବନେଶ୍ୱର,୨୫/୦୪: ଆଉ କିଛି ଦିନ ପରେ ନିର୍ବାଚନ । ଓଡ଼ିଶାରେ ୪ଟି ପର୍ଯ୍ୟାୟରେ ନିର୍ବାଚନ ହେବ । ମାଓ ଅଞ୍ଚଳରେ ମେ’ ୧୩ ତାରିଖରେ ପ୍ରଥମ ପର୍ଯ୍ୟାୟରେ ନିର୍ବାଚନ ଥିବାରୁ ଓଡ଼ିଶା ପୁଲିସ୍କୁ ଘାରିଛି ସୁରକ୍ଷା ଚିନ୍ତା । ରାଜ୍ୟ ଓ କେନ୍ଦ୍ରୀୟ ଗୁଇନ୍ଦା ବିଭାଗର ମଧ୍ୟ ଏହି ଅଞ୍ଚଳ ଉପରେ ନଜର ରଖିଛି । ସେଥିପାଇଁ ଓଡ଼ିଶା ପୁଲିସ୍ କେନ୍ଦ୍ରକୁ ୩ଟି ହେଲିକପ୍ଟର ମାଗିଛି । ଗୋଟିଏ ପାଇଁ ଅନୁମତି ମିଳିସାରିଛି । ଆସନ୍ତା ୧୦ ଦିନ ଭିତରେ କେନ୍ଦ୍ର ବାକି ୨ଟି ହେଲିକପ୍ଟର ଓଡ଼ିଶା ପୁଲିସ୍କୁ ଦେବ ବୋଲି ଓଡ଼ିଶା ପୁଲିସ୍ର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି ।
ପୂର୍ବ ରେକର୍ଡ କହୁଛି ନିର୍ବାଚନ ସମୟରେ ମାଓବାଦୀମାନେ କିଛି ବି ଅଘଟଣ ଘଟାଇ ପାରନ୍ତି । ଓଡ଼ିଶା ପୁଲିସ୍ ସେଥିପାଇଁ ସମ୍ପୂର୍ଣ୍ଣ ପ୍ରସ୍ତୁତ ବୋଲି ଡିଜିପି ଅରୁଣ ଷଡ଼ଙ୍ଗୀ ସୂଚନା ଦେଇଛନ୍ତି । ବିଶେଷ କରି ମାଲକାନଗିରି, କୋରାପୁଟ, ନୂଆପଡ଼ା, କନ୍ଧମାଳ ଭଳି ଅନ୍ୟ ମାଓ ଅଞ୍ଚଳରେ କଡ଼ାକଡ଼ି ପାଟ୍ରୋଲିଂ ପାଇଁ ହେଲିକପ୍ଟରର ଆବଶ୍ୟକତା ରହିଛି । ସେଥିପାଇଁ ଓଡ଼ିଶା ପୁଲିସ୍ ପକ୍ଷରୁ ୩ଟି ହେଲିକପ୍ଟର କେନ୍ଦ୍ରକୁ ମଗା ଯାଇଥିଲା । ଏହି ୩ଟି ଭିତରେ ଗୋଟିଏ ଏୟାର ଆମ୍ବୁଲାନ୍ସ ରହିଛି । ତା’ଛଡା ଓଡ଼ିଶାରେ ନିର୍ବାଚନ ସମୟରେ ୧୪୦ କମ୍ପାନୀ କେନ୍ଦ୍ରୀୟ ଫୋର୍ସ ଆବଶ୍ୟକ ବୋଲି ଡିଜିପି ଲେଖିଥିଲେ । ବର୍ତ୍ତମାନ ସୁଦ୍ଧା ୭୫ କମ୍ପାନୀ କେନ୍ଦ୍ରୀୟ ଫୋର୍ସ ମିଳିଛି । ୩୫ କମ୍ପାନୀ ସିଆରପିଏଫ୍, ୩୫ କମ୍ପାନୀ ବିଏସଏଫ୍ ଓ ୫ କମ୍ପାନୀ ସିଆଇଏସଏଫ୍ ଯବାନ ବିଭିନ୍ନ ଆଡ଼େ ମୁତୟନ ହୋଇଛନ୍ତି । ଆଉ ୨ ପର୍ଯ୍ୟାୟରେ ବାକି ଫୋର୍ସ ଆସିବେ ବୋଲି ଜଣାପଡ଼ିଛି । ପ୍ରଥମେ ମାଓ ଅଞ୍ଚଳରେ ମେ ୧୩ ନିର୍ବାଚନ ହେବ । ଉକ୍ତ ଫୋର୍ସ ସେ ଅଞ୍ଚଳରେ ମୁତୟନ ହେବେ । ପରେ ସେମାନେ ମେ’ ୨୦ରେ ଯେଉଁ ଅଞ୍ଚଳରେ ନିର୍ବାଚନ ଥିବା ସେଠାକୁ ଯିବେ ।
ଅନ୍ୟପକ୍ଷରେ ଗତ କିଛି ଦିନ ତଳେ ଭୁବନେଶ୍ୱର କମିଶନରେଟ୍ ପୁଲିସ୍ ମୁଖ୍ୟାଳୟରେ ଭର୍ଚୁଆଲ୍ ମାଧ୍ୟମରେ ଓଡ଼ିଶା, ଆନ୍ଧ୍ର ପ୍ରଦେଶ, ପଶ୍ଚିମବଙ୍ଗ, ଛତିଶଗଡ଼, ତେଲେଙ୍ଗାନା ଓ ଝାଡ଼ଖଣ୍ଡର ବରିଷ୍ଠ ପୁଲିସ୍ ଅଧିକାରୀମାନେ ନିର୍ବାଚନ ପ୍ରସ୍ତୁତିର ବ୍ଲୁପ୍ରିଣ୍ଟ ପ୍ରସ୍ତୁତ କରିଥିଲେ । ନିର୍ବାଚନ ସମୟରେ ସୀମାନ୍ତ ଅଞ୍ଚଳରେ କଡ଼ା ସୁରକ୍ଷା, କମ୍ବିଂ ଅପରେସନ୍, ଟଙ୍କା କାରବାର, ମଦ, ଗଞ୍ଜେଇ ବେପାର ଓ ଅପରାଧୀଙ୍କ ଉପରେ ଅଧିକ ନଜର ଦେବାକୁ ଆଲୋଚନା ହୋଇଥିଲା ।
ଏହି ଆଲୋଚନାର ଫାଇଦା ବି ମିଳିଛି । ଗତ ଦେଢ଼ ମାସ ଭିତରେ ରାଜ୍ୟର ବିଭିନ୍ନ ସୀମାରୁ ମୋଟ ୧୦୭.୧୩ କୋଟି ଟଙ୍କାର ପ୍ରଲୋଭନ ସାମଗ୍ରୀ ଜବତ ହୋଇଛି । ୧୬.୪୦ କୋଟି ଟଙ୍କାର ମଦ ଜବତ ହୋଇଛି । ଏହାବାଦ୍ ୩୯.୩୧ କୋଟି ଟଙ୍କାର ନିଶା ସାମଗ୍ରୀ, ୬.୮୬ କୋଟି ଟଙ୍କାର ମୂଲ୍ୟବାନ ଧାତୁ (ସୁନା ଓ ଅନ୍ୟାନ୍ୟ ଅଳଙ୍କାର) ଓ ୪୩.୯୬ କୋଟି ଟଙ୍କାର ମାଗଣା ସାମଗ୍ରୀ ବଣ୍ଟନକୁ ଜବତ କରାଯାଇଛି । ଏହି ସମସ୍ତ ପ୍ରଲୋଭନ ସାମଗ୍ରୀର ଆନୁମାନିକ ବଜାର ମୂଲ୍ୟ ୧୦୭ କୋଟି ୧୩ ଲକ୍ଷ ଟଙ୍କା ହେବ ।