ଭୁବନେଶ୍ୱର,୦୪/୦୫: ସିଆରପିଏଫ୍ ଛକରେ ଘଟିଛି ଛାତିଥରା ଦୁର୍ଘଟଣା । ସିଆରପିଏଫ୍ର ଏକ ଜାମର ଭ୍ୟାନ(ଜେଏଚ୍୦୧ସିୟୁ ୧୪୦୨) ରୋଗୀ ନେଇ ଯାଉଥିବା ଏକ ଆମ୍ବୁଲାନ୍ସକୁ ଧକ୍କା ଦେବାରୁ ଆମ୍ବୁଲାନ୍ସ ଚାଳକ ସମେତ ସେଥିରେ ଥିବା ରୋଗୀ ଓ ରୋଗୀ ସମ୍ପର୍କୀୟ ଗୁରୁତର ହୋଇଛନ୍ତି । ଘଟଣାରେ ସିଆରପିଏଫ୍ ଗାଡ଼ିର କୌଣସି କ୍ଷତି ହୋଇନଥିବା ବେଳେ ଆମ୍ବୁଲାନ୍ସଟି ଭାଙ୍ଗି ଚୂରମାର୍ ହୋଇଛି ।
ସୂଚନା ମୁତାବକ ଖୋର୍ଦ୍ଧାରୁ ରୋଗୀ ଓ ତାଙ୍କ ସମ୍ପର୍କୀୟଙ୍କୁ ନେଇ ଏକ ୧୦୮ ଆମ୍ବୁଲାନ୍ସ(ଓଡ଼ି୩୩ପି ୫୬୬୬) ହାଇଟେକ୍ ହସପିଟାଲ ଯାଉଥିଲା । ଆମ୍ବୁଲାନ୍ସ ଠିକ୍ ସିଆରପିଏଫ୍ ଛକ ଅତିକ୍ରମ କରିବା ପୂର୍ବରୁ ସେଣ୍ଟ ଜାଭିୟର ସ୍କୁଲ ପଟୁ ଦ୍ରୁତ ଗତିରେ ମାଡ଼ି ଆସିଥିଲା ସିଆରପିଏଫ୍ ଜାମର ଭ୍ୟାନ୍ । ଆମ୍ବୁଲାନ୍ସର ଡାହାଣ ପାଶ୍ୱର୍ ସମ୍ମୁଖ ଭାଗକୁ ଶକ୍ତ ଧକ୍କା ଦେଇଥିଲା । ଆମ୍ବୁଲାନ୍ସଟି ଦୁଇଗଡ଼ା ଖାଇ ସିଆରପିଏଫ୍ କ୍ୟାମ୍ପସ ପାଚେରି ପାଖକୁ ଓଲଟି ପଡିଥିଲା । ଚାଳକଙ୍କ ହାତ ଭାଙ୍ଗିଯିବା ସହ ତାଙ୍କ ମୁଣ୍ଡ ଓ ଛାତିରେ ଶକ୍ତ ଆଘାତ ଲାଗିଥିଲା ।
ସେଥିରେ ଥିବା ରୋଗୀ ଓ ସମ୍ପର୍କୀୟ ଗୁରୁତର ହୋଇଥିଲେ । ସେଠାରେ ଉପସ୍ଥିତ କିଛି ଲୋକ ତୁରନ୍ତ ପିସିଆରକୁ ଖବର ଦେଇଥିଲେ । ପୁଲିସ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଆମ୍ବୁଲାନ୍ସ ଚାଳକ ଓ ରୋଗୀଙ୍କୁ ଉଦ୍ଧାର କରି କ୍ୟାପିଟାଲ ହସପିଟାଲ ପଠାଇଥିଲେ । ସିଆରପିଏଫ୍ ଜାମର ଭ୍ୟାନ୍ରେ ୮ରୁ ୯ ଜଣ ସଶସ୍ତ୍ର ଯବାନ୍ ଥିଲେ । ସେମାନଙ୍କର କିଛି କ୍ଷତି ହୋଇନାହିଁ । ଭ୍ୟାନ୍ଟି ମଧ୍ୟ ସୁରକ୍ଷିତ ରହିଛି । ତେବେ ସେମାନେ ଭୁବନେଶ୍ୱର ଏୟାରପୋର୍ଟ କୌଣସି କାମରେ ଯାଇ ଫେରୁଥିଲେ । ଏନେଇ ନୟାପଲ୍ଲୀ ଥାନା ପୁଲିସ ଯବାନମାନଙ୍କୁ ପଚରାଉଚରା କରୁଛି ।