କଟକ,୧୧/୦୫: ଆଜି ଓଡ଼ିଶା ପୁଲିସ ସଂଘର କର୍ମକର୍ତ୍ତା ନିର୍ବାଚନ ଅନୁଷ୍ଠିତ ହେବ । ଏଥିଲାଗି ସମସ୍ତ ପ୍ରସ୍ତୁତି ଶେଷ ହୋଇଛି । ରାଜ୍ୟର ୩୬ ଟି ପୁଲିସ ଜିଲ୍ଲା ସମେତ କ୍ରାଇମ୍ବ୍ରାଞ୍ଚ୍, ଭିଜିଲାନ୍ସ, ସ୍ପେସାଲ୍ ବ୍ରାଞ୍ଚ୍, ପୁଲିସ ମୋଟର ପରିବହନ, ପୁଲିସ ଟ୍ରେନିଂ ସ୍କୁଲ୍, ଟ୍ରେନିଂ କଲେଜ, ବିଜୁ ପଟ୍ଟନାୟକ ପୁଲିସ ଏକାଡେମୀ ଓ ପୁଲିସ ମୁଖ୍ୟାଳୟରୁ ଚୟନ ହୋଇଥିବା ପ୍ରାୟ ୩ ଶହ ଡେଲିଗେଟ୍ସ୍ ବକ୍ସିବଜାରଠାରେ ଥିବା ସଂଘ କାର୍ଯ୍ୟାଳୟରେ ଉପସ୍ଥିତ ରହିବେ ।
ପ୍ରଥମେ ନିଜ ନାମ ପଞ୍ଜିକରଣ (ରେଜିଷ୍ଟ୍ରେସନ) କରାଇବେ । ପଞ୍ଜିକୃତ ଡେଲିଗେଟ୍ସ୍ମାନେ ୧୫ ଜଣ କେନ୍ଦ୍ରୀୟ କାର୍ଯ୍ୟ ନିର୍ବାହୀ ସଦସ୍ୟ(ସେଣ୍ଟ୍ରାଲ ଏକ୍ଜକ୍ୟୁଟିଭ) ତଥା ସିଇସି ମେମ୍ବର ବାଛିବେ । ସିଇସି ମେମ୍ବରମାନେ ଅଫିସ କର୍ମକର୍ତ୍ତାଙ୍କୁ ବାଛିବେ । ଉପସଭାପତି, ସାଧାରଣ ସମ୍ପାଦକ, କୋଷାଧ୍ୟକ୍ଷ, ଆବାହକ, ଯୁଗ୍ମ ସମ୍ପାଦକ-୧, ୨ ଓ ସଂଗଠନ ସମ୍ପାଦକ ଏପରି ମୋଟ ୭ ଟି ପଦବି ପାଇଁ ଆସନ୍ତାକାଲି ନମାଙ୍କନ ପତ୍ର(ନୋମିନେସନ୍) ଦାଖଲ ହେବ । ଗୋଟିଏ ଦିନରେ ପ୍ରାର୍ଥିପତ୍ର ଦାଖଲଠାରୁ ଆରମ୍ଭ କରି ପ୍ରାର୍ଥିପତ୍ର ପ୍ରତ୍ୟାହାର, ଯାଞ୍ଚ୍ ଓ ନିର୍ବାଚନ ହେବା ସହ ଫଳାପଳ ମଧ୍ୟ ଘୋଷଣା ହେବ ବୋଲି ପୁଲିସ ଅଫିସରମାନଙ୍କଠାରୁ ସୂଚନା ମିଳିଛି । ସଭାପତି ପଦ ପାଇଁ ପ୍ରତ୍ୟକ୍ଷ ନିର୍ବାଚନ ହେବାର ବ୍ୟବସ୍ଥା ରହିଛି ।
ଏଥିରେ ରାଜ୍ୟ ପୁଲିସ ବାହିନୀରେ କାର୍ଯ୍ୟରତ ଏଏସ୍ଆଇ, ଏସ୍ଆଇ ଓ ଇନ୍ସପେକ୍ଟରମାନେ ସିଧାସଳଖ ମତଦାନ ଲାଗି ବ୍ୟବସ୍ଥା ରହିଛି । ତେବେ ନିର୍ବାଚିତ ସିଇସି ମେମ୍ବର ଓ ଅଫିସ କର୍ମକର୍ତ୍ତମାନେ ହିଁ ସଭାପତି ନିର୍ବାଚନ ଲାଗି ନିଷ୍ପତ୍ତି ନେବେ ବୋଲି ସୂଚନା ମିଳିଛି । ନିର୍ବାଚିତ କର୍ମକର୍ତ୍ତା ଓ ସଦସ୍ୟମାନଙ୍କ ନିଷ୍ପତ୍ତି ଉପରେ ସଭାପତି ନିର୍ବାଚନ ନିର୍ଭର କରୁଛି ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି । ନିର୍ବାଚନ ପରିଚାଳନା ଲାଗି ରାଜ୍ୟ ପୁଲିସ ମୁଖ୍ୟାଳୟ ଏସ୍ପି ତପନ କୁମାର ଦାସଙ୍କୁ ଡିଜିପି ନିୟୋଜିତ କରିଛନ୍ତି ।
