ନବରଙ୍ଗପୁର,୦୭/୦୭: ଓଡ଼ିଶା ରାଜସ୍ୱ ଅମଲା ସଂଘ ନବରଙ୍ଗପୁର ଶାଖାର କର୍ମକର୍ତ୍ତା ଆଜି ଠାରୁ କଳାବ୍ୟାଜ୍ ପିନ୍ଧି କାର୍ଯ୍ୟରେ ଯୋଗ ଦେଇଛନ୍ତି। ଆସନ୍ତା ୧୧ ତାରିଖ ପର୍ଯ୍ୟନ୍ତ କଳାବ୍ୟାଜ୍ ପରିଧାନ କରିବେ। ତଥାପି ଯଦି ସେମାନଙ୍କ ଦାବି ପୂରଣ କରିବାରେ ରାଜ୍ୟସରକାର ଅବହେଳା କରିନ୍ତି, ଜୁଲାଇ ୧୪ରୁ ସଂପୂର୍ଣ୍ଣ କାର୍ଯ୍ୟବନ୍ଦ ଆନ୍ଦୋଳନକୁ ଓହ୍ଲାଇବେ ବୋଲି ଓଡିଶା ରାଜସ୍ୱ ଅମଲା ସଂଘର ରାଜ୍ୟ ସଭାପତି ତ୍ରିପତି ବାଲାଜୀ ସାହୁ କହିଛନ୍ତି।
ସୂଚନା ମୁତାବକ, ସେମାନଙ୍କର ୧୦ଦଫା ଦାବି ମଧ୍ୟରୁ ଜିଲ୍ଲା ସ୍ତରୀୟ କାର୍ଯ୍ୟରତ ରାଜସ୍ୱ ଅମଲାଙ୍କ ମୂଳ ଦରମା ଓଆରଏସ୍କି -୨୦୧୭ନିୟମ ଅନୁଯାୟୀ ଲେବୁଲ ୯କୁ ବୃଦ୍ଧି, ଜିଲ୍ଲାରେ ନୂତନ ପଦବୀ ସୃଷ୍ଟି ଓ ପଦବୀ ପୁନର୍ଗଠନ, ରାଜ୍ୟରେ କାର୍ଯ୍ୟରତ ସମସ୍ତ ସରକାରୀ କର୍ମଚାରୀଙ୍କୁ ୨୦ଲକ୍ଷ ଟଙ୍କା ପର୍ଯ୍ୟନ୍ତ ବାର୍ଷିକ ସ୍ୱାସ୍ଥ୍ୟବୀମା ଲାଗୁ କରିବାକୁ ଦାବି କରିଛନ୍ତି । ସେହିଭଳି ୧୯୯୦ ମସିହାର ପୁନଃଥଇଥାନ ଯୋଜନାର ନିୟମାବଳୀ ଲାଗୁ କରି ମୃତ କର୍ମଚାରୀଙ୍କ ପରିବାର ସଦସ୍ୟଙ୍କୁ ସରକାରୀ ଚାକିରି ପ୍ରଦାନ, ରାଜସ୍ୱ ଅମଲାଙ୍କୁ ଶତ ପ୍ରତିଶତ ପଦୋନ୍ନତି, ପୁରୁଣା ପେନସନ୍ ଯୋଜନା ଲାଗୁ କରିବାକୁ ଅମଲା ସଂଘ ପକ୍ଷରୁ ରାଜ୍ୟ ସରକାରଙ୍କୁ ଦାବିପତ୍ର ପ୍ରଦାନ କରାଯାଇଥିଲା । ଦୀର୍ଘ ଦିନ ଧରି ରାଜସ୍ୱ ଅମଲାଙ୍କ ଦାବିଗୁଡିକୁ ସରକାର ପୂରଣ କରୁନଥିବାରୁ ଅମଲ ସଂଘ ଆନ୍ଦୋଳନକୁ ଓହ୍ଲାଇବାକୁ ବାଧ୍ୟ ହେବ ବୋଲି ରାଜ୍ୟ ସଭାପତି ତ୍ରିପତି ବାଲାଜୀସାହୁ କହିଛନ୍ତି ।
