ଭୁବନେଶ୍ୱର,୦୫/୧୧: ଦିଲ୍ଲୀରେ ଓଡ଼ିଆ ମହିଳାଙ୍କୁ ଗଣଦୁଷ୍କର୍ମ ଘଟଣାରେ ପୁଲିସକୁ ସଫଳତା ମିଳିଛି । ଏହି ଘଟଣାରେ ଦିଲ୍ଲୀ ପୁଲିସ ୩ ଜଣଙ୍କୁ ଗିରଫ କରିବା ସହ ଏକ ଅଟୋ ଜବତ କରିଛି । ଦୁଇଦିନିଆ ଗସ୍ତରେ ଆସିଥିବା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନୂଆଦିଲ୍ଲୀରେ ପହଞ୍ଚିବା ପରେ ଏକ ସାମ୍ବାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି । ଏହି ଘଟଣାର ଅଧିକ ତଦନ୍ତ କରିବାକୁ ଆମେ ଦିଲ୍ଲୀ ପୁଲିସ୍କୁ କହିଛୁ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ଉକ୍ତ ମହିଳା ପ୍ରାୟ ବର୍ଷେ ହେବ ଦିଲ୍ଲୀର କଟୱାରିଆ ସରାଇରେ ଜଣେ ବନ୍ଧୁଙ୍କ ପାଖରେ ରହୁଥିଲେ । କୌଣସି କାରଣରୁ ଅଗଷ୍ଟ ମାସରେ ତାଙ୍କୁ ବନ୍ଧୁଙ୍କ ଘର ଖାଲି କରିବାକୁ କୁହାଯାଇଥିଲା । ଗତ ମାସ ୧୦ ତାରିଖ ବିଳମ୍ବିତ ରାତିରେ ମହିଳାଙ୍କୁ ୩ ଜଣ ଅଭିଯୁକ୍ତ ଅଟୋରେ ଅପହରଣ କରି ନେଇ ଗଣ ବଳାତ୍କାର କରି ରାସ୍ତାକଡ଼ରେ ଫିଙ୍ଗି ଦେଇଥିଲେ ।
ଏହି ଘଟଣାକୁ ଓଡ଼ିଶା ସରକାର ଗମ୍ଭୀରତାର ସହ ନେଇଥିଲେ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ଡିଜିପି ୱାଇ.ବି. ଖୁରାନିଆ ଦିଲ୍ଳୀ ପୁଲିସ କମିଶନରଙ୍କ କଥା ହୋଇଥିଲେ । ଓଡ଼ିଶାର ବରିଷ୍ଠ ଆଇପିଏସ୍ ଅଫିସରଙ୍କ ନେତୃତ୍ୱରେ ଏକ ଟିମ୍ ଦିଲ୍ଲୀ ଯାଇ ପୀଡ଼ିତାଙ୍କୁ ଭେଟିବା ସହ ଚିକିତ୍ସା ବିଷୟରେ ଏମ୍ସ ଡାକ୍ତରଙ୍କ ସହ ଆଲୋଚନା କରିଥିଲେ ।
ମୁଖ୍ୟମନ୍ତ୍ରୀ କହିଛନ୍ତି, ଆମ ଓଡ଼ିଆ ଲୋକମାନେ ଓଡ଼ିଶା ଓ ଭାରତ ବାହାରେ ରହୁଛନ୍ତି । ବିଭିନ୍ନ କାରଣରୁ ସେମାନେ ନିଜକୁ ଅସୁରକ୍ଷିତ ମନେ କରୁଛନ୍ତି । ଯଦି କୌଣସି ଘଟଣା ରାଜ୍ୟ ସରକାରଙ୍କ ନଜରକୁ ଆସୁଛି ତା’ହେଲେ ସରକାର ତ୍ୱରିତ ନିଷ୍ପତ୍ତି ନେଉଛନ୍ତି । ସମସ୍ତ ପ୍ରବାସୀ ଓଡ଼ିଆଙ୍କ ସହ ଆମେ ଦୃଢ଼ ଭାବେ ଠିଆ ହେବାର ଭରସା ଦେଉଛୁ । ସେମାନଙ୍କୁ ନ୍ୟାୟ ଓ ସୁରକ୍ଷା ଦେବା ପାଇଁ ଆମେ ପ୍ରତିଶ୍ରୁତିବଦ୍ଧ । ଦିଲ୍ଲୀ ଘଟଣାରେ ଆମ ସରକାର ପୁଲିସ ସହ ପ୍ରତ୍ୟକ୍ଷ ଯୋଗାଯୋଗରେ ଥିଲା । ସେଥିପାଇଁ ଆଜି ଅଭିଯୁକ୍ତମାନେ ଗିରଫ ହୋଇଛନ୍ତି ବୋଲି ବୋଲି ମୁଖ୍ୟମନ୍ତ୍ରୀ କହିଛନ୍ତି।
