ଜୟପୁର,୧୭/୦୯: ଆବେଦନ କରି ବର୍ଷ ପରେ ବର୍ଷ ବିତିଯାଉଛି । ଯୋଗ୍ୟ ହିତାଧିକାରୀଙ୍କୁ ସାମାଜିକ ସୁରକ୍ଷା ଯୋଜନାରେ ସାମିଲ କରାଯାଉନି । ଭତ୍ତା ପାଉଥିବା ହିତାଧିକାରୀଙ୍କ ମୃତ୍ୟୁକୁ ଅପେକ୍ଷା କରିବାକୁ ପଡୁଛି । ମାନେ ଜଣଙ୍କ ମୃତ୍ୟୁ ହେଲେ ଯାଇ ଅନ୍ୟ ଜଣେ ନୂଆ ହିତାଧିକାରୀଙ୍କୁ ଏହି ଯୋଜନାରେ ସାମିଲ କରାଯାଉଛି । ସରକାରଙ୍କ ଏହି ଅଜବ ନୀତିକୁ ବିଭିନ୍ନ ମହଲରେ ନାପସନ୍ଦ କରାଯାଇଛି ।
ପରିତାପର ବିଷୟ, ଗତ ଦେଢବର୍ଷ ହେଲା ନୂଆ ହିତାଧିକାରୀଙ୍କୁ ଏହି ଯୋଜନାରେ ସାମିଲ କରିବାକୁ କୌଣସି ଟାର୍ଗେଟ ଆସିନି । ପୌର ଓ ବ୍ଲକ୍ ଅଞ୍ଚଳରେ ହଜାର ହଜାର ଆବେଦନକରୀ ଭତ୍ତା ଲାଗି ଅନେଇ ବସିଛନ୍ତି । ଯୋଗ୍ୟ ହିତାଧିକାରୀଙ୍କ ସମସ୍ତ ପ୍ରମାଣପତ୍ର ଯାଞ୍ଚ କରି ତୁରନ୍ତ ଭତ୍ତା ଦେବାର ବ୍ୟବସ୍ଥା କରିବାକୁ ଦାବି ହୋଇଛି ।
ସାମାଜିକ ସୁରକ୍ଷା ଯୋଜନାରେ ସାମିଲ ହେବାକୁ ଅନ୍ଲାଇନରେ ଆବେଦନ କରିବାକୁ ପଡୁଛି । ଭତ୍ତା ପାଇବାକୁ ମାନଦଣ୍ଡ ପୂରଣ କରିବା ସହ ସମସ୍ତ ପ୍ରମାଣପତ୍ର ଦାଖଲ କରିବାକୁ ପଡୁଛି । ବିଡମ୍ବନା, ଭତ୍ତା ପାଇବାକୁ ଯୋଗ୍ୟ ଥିଲେ ବି ସେମାନଙ୍କୁ ବଞ୍ଚିତ କରାଯାଉଛି । ନିୟମ ଅନୁସାରେ ୬୦ ବର୍ଷ ହେଲେ ଜଣେ ବାର୍ଦ୍ଧକ୍ୟ ଭତ୍ତା ପାଇବାକୁ ଯୋଗ୍ୟ । ଅଥଚ ୭୦ ବର୍ଷ ବୟସ୍କଙ୍କୁ ଭତ୍ତା ପାଇବାରୁ ବି ବଞ୍ଚିତ କରାଯାଉଛି । ସେହିପରି ଜଣେ ବିଧବା ଆବେଦନ ସମୟରେ ସ୍ୱାମୀଙ୍କ ମୃତ୍ୟୁ ପ୍ରମାଣପତ୍ର ଦାଖଲ କଲେ ଭତ୍ତା ମିଳିଯିବା କଥା । ଅଥଚ ବର୍ଷ ବର୍ଷ ବିତିଯାଉଥିଲେ ବି ସେମାନଙ୍କୁ ଭତ୍ତା ଦିଆଯାଉନି ।
ସାମାଜିକ ସୁରକ୍ଷା ବିଭାଗର ଜଣେ କର୍ମଚାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ନୂଆ ହିତାଧିକାରୀଙ୍କୁ ସାମିଲ କରିବାକୁ ଅଧିକ ଟାର୍ଗେଟ ଆସୁନି । ଯାହା ଫଳରେ ସମସ୍ୟା ହେଉଛି । ଆବେଦନ କରିଥିବା ତାରିଖ ଅନୁସାରେ କ୍ରମିକ ନମ୍ବର କରାଯାଉଛି । ଭତ୍ତା ପାଉଥିବା ଜଣେ ହିତାଧିକାରୀଙ୍କ ମୃତ୍ୟୁ ହେବାପରେ ସେହି ସ୍ଥାନରେ କ୍ରମିକ ନମ୍ବର ଅନୁସାରେ ଜଣେ ନୂଆ ହିତାଧିକାରୀଙ୍କୁ ସାମିଲ କରାଯାଉଛି । ଏଥିଲାଗି ଭତ୍ତା ପାଇବାରେ ଅହେତୁକ ବିଳମ୍ବ ହେଉଛି । ଗତ ନିର୍ବାଚନ ପୂର୍ବରୁ ନୂଆ ଟାର୍ଗେଟ ଆସିଥିଲା । ଏହା ପରେ ଆଉ ଆସିନି । ଆବେଦନ ଅନୁସାରେ ନୂଆ ଟାର୍ଗେଟ ଆସିଥିଲେ କୌଣସି ସମସ୍ୟା ହୋଇନଥାନ୍ତା ।
ଜିଲ୍ଲା ସାମାଜିକ ସୁରକ୍ଷା ଅଧିକାରୀ ତରୁଣ କୁମାର ପ୍ରହରାଜ କହିଛନ୍ତି, ଜିଲ୍ଲାର ସମସ୍ତ ବ୍ଲକ ଓ ପୌରାଞ୍ଚଳ ଲାଗି ଅଧିକ ୧୦ ହଜାର ୭୦୦ ହିତାଧିକାରୀଙ୍କୁ ଭତ୍ତା ଦେବାକୁ ଟାର୍ଗେଟ ଲାଗି ଚିଠି କରାଯାଇଛି । ଟାର୍ଗେଟ ମିଳିଲେ ସମସ୍ୟାର ସମାଧାନ ହେବ।
