ଭୁବନେଶ୍ବର, ୧୩।୧୧ :ଇନଫୋସିଟି ଥାନା ଅଧୀନ ଚୁନିକେଳି ବସ୍ତିରେ ବାଣ ବିସ୍ଫୋରଣ ଘଟଣାରେ ଜଣଙ୍କୁ ପୋଲିସ ଗିରଫ କରିଛି। ଚୋରାରେ ବାଣ ବ୍ୟବସାୟ କରୁଥୁବା ଋତୁରାଜ ପଟ୍ଟନାୟକଙ୍କୁ କମିଶନରେଟ ପୋଲିସ ଗିରଫ କରିଛି। ରୁତୁରାଜଙ୍କୁ ତାଙ୍କ ନିଜ ଗାଁ ଜଗତସିଂହପୁର ଅଞ୍ଚଳରୁ ଗିରଫ କରାଯାଇଛି । ତେବେ ବାଣ ଗୋଦାମର ମାଲିକ ରୁତୁରାଜଙ୍କ ବାପା ଏବେବି ଫେରାର ରହିଛନ୍ତି। ଏଠାରୁ ଜବତ ବାଣର ନମୂନା ଫୋରେନସିକ ଲ୍ୟାବକୁ କମିଶନରେଟ ପୋଲିସ ପଠାଇଛି ବୋଲି ଡିସିପି ପିନାକ ମିଶ୍ର ସୂଚନା ଦେଇଛନ୍ତି।
ସୂଚନାଯୋଗ୍ୟ ଯେ, ଇମ୍ଫୋସିଟି ଥାନା ଅଧୀନ ଚୁନିକେଳି ବସ୍ତିରେ ଥିବା ଏକ ବାଣ କାରଖାନାରେ ବିସ୍ଫୋରଣ ହୋଇଥିଲା। ବିସ୍ଫୋରଣ ଏତେ ଭୟଙ୍କର ହୋଇଥିଲା ଯେ ଘରର ଛାତ ଓ ଛପର ଉଡିଯାଇଥିଲା। ଏପରକି ବିସ୍ଫୋରଣରେ ଘରର କାନ୍ଥ ଖଣ୍ଡ ବହୁ ଦୂରକୁ ଛିଟିକି ପଡିଥିଲା। ହୁତୁ ହୁତ ହୋଇ ଜଳିଥିଲା ବିପୁଳ ବାଣ ପ୍ରସ୍ତୁତି ସାମଗ୍ରୀ। ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ଦୀର୍ଘ ସମୟ ଉଦ୍ୟମ ପରେ ନିଆଁକୁ ଆୟତ୍ତ କରିଥିଲେ। ନିଆଁ ଲିଭାଇବା ପରେ ଅଗ୍ନିଶମ ବାହିନୀ ଅଞ୍ଚଳର ସୁରକ୍ଷା ପାଇଁ ଉକ୍ତ ଘରେ ପଶି ଯାଞ୍ଚ କରିଥିଲେ। ଘର ଭିତରେ ବିପୁଳ ପରିମାଣର ବାଣ ଗଚ୍ଛିତ ଥିବା ଦେଖିବାକୁ ମିଳିଥିଲା। ଉକ୍ତ ଘରକୁ ପୋଲିସ ସିଲ କରିଥିଲା।
