ପାଟଣା, ୧୨/୦୭ : ଥମୁନି ହାତୀ ମଣିଷ ଲଢେଇ। ଗୋଠଛଡ଼ା ଦନ୍ତା ଆକ୍ରମଣରେ ଜଣେ ମୃତ ଜଣେ ଗୁରୁତର। କେନ୍ଦୁଝର ଜିଲ୍ଲା ପାଟଣା ରେଞ୍ଜ ପିଚ୍ଛୁଳାବେଡା ଗାଁରେ ଶନିବାର ଭୋରରୁ ଏଭଳି ଅଭାବନୀୟ ଘଟଣା ଘଟିଛି। ବନ ବିଭାଗ ଘଟଣା ସ୍ଥଳରେ ପହଞ୍ଚି ମୃତାହତଙ୍କୁ ଉଦ୍ଧାର କରିଛି।
ସୂଚନାନୁଯାୟୀ, ପିଛୁଳାବେଡା ଗାଁର ଏକ ନାଳ ଉପରେ ନୂତନ ବ୍ରିଜ୍ ନିର୍ମାଣ ପାଇଁ ମାଟିର ପରୀକ୍ଷା କାର୍ଯ୍ୟରେ ନିୟୋଜିତ ଥିବା ୪ ଜଣ ଶ୍ରମିକ ନାଳ ନିକଟରେ ତମ୍ବୁ ଟାଣି ଶୋଇଥିଲେ। ଶନିବାର ଭୋର୍ ସମୟରେ ଏକ ଗୋଠଛଡ଼ା ଦନ୍ତା ତମ୍ବୁ ଭିତରୁ ସେମାନଙ୍କୁ ଘୋଷାଡ଼ି ଆଣି କଚାଡ଼ି ଦେଇଥିଲା। ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଗୁରୁତର ହୋଇଛନ୍ତି। ଗୁରୁତରଙ୍କୁ ପ୍ରଥମେ ପାଟଣା ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଘଟଣା ସ୍ଥଳରେ ବନ ବିଭାଗ ପହଞ୍ଚି ମୃତଦେହକୁ ଉଦ୍ଧାର କରି ପାଟଣା ମେଡିକାଲକୁ ଆଣିଛି।
