ସାନଖେମୁଣ୍ଡି, ୨୭/୬: ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅର୍ନ୍ତଗତ ମୌଳାଭଞ୍ଜା ରାସ୍ତାରେ କାର୍ ଧକ୍କାରେ ବାଇକ ଚାଳକ ଗୁରୁତର ଆହତ ହୋଇଛନ୍ତି। ଆହତ ଜଣକ ହେଲେ ପାଟପୁରର ରୁଦ୍ର ସାହୁ। ତାଙ୍କୁ ଚିକିତ୍ସା ପାଇଁ ବ୍ରହ୍ମପୁର ଏମକେସିଜିକୁ ସ୍ଥାନାନ୍ତର କରାଯାଇଛି। ଶୁକ୍ରବାର ଅପରାହ୍ନରେ ଏହି ଦୁର୍ଘଟଣା ଘଟିବା ପରେ ଉତ୍ତ୍ୟକ୍ତ ଲୋକେ ରାସ୍ତାରୋକ କରିଥିଲେ।
ଜାତୀୟ ରାଜପଥ- ୩୨୬ ଅନ୍ତର୍ଗତ ଏହି ଦୁର୍ଘଟଣାସ୍ଥଳ ନିକଟରେ ରାସ୍ତା ନିର୍ମାଣାଧୀନ ରହିଛି। ତେବେ ଠିକାଦାର ଓ ଜାତୀୟ ରାଜପଥ ପ୍ରାଧୀକରଣ କର୍ତ୍ତୃପକ୍ଷ ଅବହେଳାରୁ ରାସ୍ତା କାମରେ ବିଳମ୍ବ ଘଟୁଛି। ଯୁଆଡ଼େ ଦେଖିବେ ଖାଲଖମା। ଛୋଟ ବଡ଼ ଦୁର୍ଘଟଣା ବାରମ୍ବାର ଘଟୁଛି। ବାରମ୍ବାର ଅଭିଯୋଗ ପରେ ଫଳ ଶୂନ।
ଏଣୁ ଆଜି ଦୁର୍ଘଟଣା ପରେ ଅତିଷ୍ଠ ସ୍ଥାନୀୟ ଲୋକେ ରାଜରାସ୍ତାରେ ଟାୟାର ଜାଳି ପ୍ରତିବାଦ କରିଛନ୍ତି। ଦୁଇ ଘଣ୍ଟାରୁ ଊର୍ଦ୍ଧ୍ଵ ସମୟ ଧରି ରାସ୍ତାରୋକ ଚାଲିଥିଲା। ରାଜପଥର ଉଭୟ ପାଖରେ ଅଟକି ରହିଥିଲା ଶହ ଶହ ଗାଡି ମୋଟର। ଦିଗପହଣ୍ଡି ପୁଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ରାସ୍ତାରୋକ ହଟିଥିଲା।
