ଭୁବନେଶ୍ୱର,୨୪/୧୦: ସମ୍ଭାବ୍ୟ ବାତ୍ୟା "ଦାନା’ର ମୁକାବିଲା ପାଇଁ ପୁଲିସ କମିଶନର ଏସ୍ ଦେବଦତ୍ତ ସିଂ ସମସ୍ତ ଥାନା ଅଧିକାରୀ ଓ ଜୋନ୍ ଏସିପିମାନଙ୍କ ସହ ଘନଘନ ବୈଠକ କରି ଆକ୍ସନ ପ୍ଲାନ ପ୍ରସ୍ତୁତ କରୁଛନ୍ତି । ଏଥିସହ ସେ ରିଜର୍ଭ ପୁଲିସ୍ ପଡ଼ିଆରେ ପ୍ରସ୍ତୁତି ପ୍ରକ୍ରିୟାକୁ ତଦାରଖ କରିଛନ୍ତି । ପିସିଆର୍ ଭ୍ୟାନ୍ରେ ଡାକବାଜି ଯନ୍ତ୍ରରେ ବାତ୍ୟା ପାଇଁ ସଜାଗ ରହିବାକୁ ରାଜଧାନୀବାସୀଙ୍କୁ ସତର୍କ କରାଯାଇଛି ।
ଡିସିପି ପିନାକ କୁମାର ମିଶ୍ରଙ୍କ ନେତୃତ୍ୱରେ ଏକ ଟିମ୍ ଗଢ଼ାଯାଇଛି । ପ୍ରତିଟି ଥାନାକୁ ଗୋଟିଏ ଫ୍ଲାଟୁନ୍ ପୁଲିସ ଫୋର୍ସ ଯୋଗାଇ ଦିଆଯାଇଛି । ସେମାନେ ୨୪ ଘଣ୍ଟିଆ ଆଲର୍ଟ ରହିବା ସହ ଥାନା ଅଧିକାରୀଙ୍କ ସହ ଯୋଗାଯୋଗରେ ରହି ସେବା ଯୋଗାଇବାକୁ ନିର୍ଦ୍ଦେଶ ଦିଆଯାଇଛି । ଉଦ୍ଧାର ପାଇଁ ଭୁବନେଶ୍ୱରରେ ୫ଟି ଟିମ୍ ସଜାଗ ରହିଛନ୍ତି । ଗଛ କାଟିବାକୁ ପାୱାର କଟର୍,ଜରୁରିକାଳୀନ ହାଇମାଷ୍ଟ ଲାଇଟ୍, କିରାସିନି, ପଲିଥିନ ସହ ବ୍ୟାଟେରି ମହଜୁଦ ରଖିବା ପାଇଁ ରିଜର୍ଭ ଇନ୍ସପେକ୍ଟରଙ୍କୁ ନିର୍ଦ୍ଦେଶ ଦିଆଯାଇଛି । ଜାତୀୟ ଓ ରାଜ୍ୟ ରାଜପଥରେ ପୁଲିସ ପାଟ୍ରୋଲିଂ କଡାକଡି କରାଯାଉଛି । ଅତ୍ୟାବଶ୍ୟକ ସାମଗ୍ରୀ ଗାଡ଼ି କିମ୍ବା ଅନ୍ୟାନ୍ୟ ଗାଡି଼ ଯା’ଆସକୁ ଧ୍ୟାନ ଦେବାକୁ ପାଟ୍ରୋଲିଂ ଟିମ୍କୁ କୁହାଯାଇଛି । ବିଏମ୍ସି, ଟିପିସିଓଡିଏଲ୍, ରୋଡ୍ ଆଣ୍ଡ ବିଲଡିଂ, ବିପର୍ଯ୍ୟୟ ପରିଚାଳନା ବିଭାଗ ଓ ପିଏଚ୍ଡି ବିଭାଗ ସହ ସମନ୍ୱୟ ରଖିବାକୁ କୁହାଯାଇଛି ।
ଓଡ୍ରାଫ ଟିମ୍କୁ ଅଧିକ କ୍ଷତିଗ୍ରସ୍ତ ଅଞ୍ଚଳକୁ ପଠାଯିବ । କିଛି ଜାଗାରେ ଅସ୍ଥାୟୀ ପାନୀୟ ଜଳ ବ୍ୟବସ୍ଥା ହୋଇଛି । ଯୋଗାଯୋଗ ବିଛିନ୍ନ ହେଲେ, ଭିଏଚ୍ଏଫ୍ ୟୁନିଟ୍ ଓ ଷ୍ଟାଟିକ୍ ଭିଏଚ୍ଏଫ୍କୁ ମହଜୁଦ କରାଯାଇଛି । ପ୍ରତି ଥାନାରେ ଜେନେରେଟର ସୁବିଧା ମଧ୍ୟ କରାଯାଇଛି । ୨୬ ତାରିଖ ଯାଏଁ କେହି ଛୁଟିରେ ରହିପାରିବେ ନାହିଁ । ସେହିପରି ଷ୍ଟାଫ୍ ଓ ପରିବାର ଲୋକଙ୍କ ପାଇଁ ୩ ଦିନ ଯାଏ ଶୁଖିଲା ଖାଦ୍ୟର ବ୍ୟବସ୍ଥା କରାଯାଇଥିବା ଜଣାପଡିଛି ।
