ବୁର୍ଲା,୧୧/୦୪: ବୁର୍ଲାରେ ଆଉଏକ ଟଙ୍କିକିଆ ଚିକିତ୍ସା ସେବା ଆରମ୍ଭ ହୋଇଛି । ଭିମ୍ସାର୍ ଆସିଷ୍ଟାଣ୍ଟ ପ୍ରଫେସର ଡା. ଶଙ୍କର ରାମଚନ୍ଦାନୀଙ୍କ ପତ୍ନୀ ଶିଖା ରାମଚନ୍ଦାନୀଙ୍କ ଦ୍ୱାରା ଏହି ନୂତନ ସେବା ଆରମ୍ଭ ହୋଇଛି । ଏହି କ୍ଲିନିକ୍ ଭାରତର ପ୍ରଥମ ବୋଲି ଡା. ଶଙ୍କାର ରାମଚନ୍ଦାନୀ କହିଛନ୍ତି । ମୁଖ୍ୟତଃ ଦାନ୍ତରୋଗ ସମ୍ବନ୍ଧୀୟ ସମସ୍ତ ଚିକିତ୍ସା ସୁବିଧା ଏଠାରେ ଉପଲବ୍ଧ ରହିଛି । ସମସ୍ତ ଅତ୍ୟାଧୂନିକ ଯନ୍ତ୍ରପାତି ସହିତ କ୍ଲିନିକ୍ ରୋଗୀ ସେବା ପାଇଁ ପ୍ରସ୍ତୁତ ହୋଇଛି । ଗରିବ ରୋଗୀଙ୍କୁ ଏକଟଙ୍କାରେ ଏଠାରେ ସମସ୍ତ ଚିକିତ୍ସା ସେବା ଯୋଗାଇଦେବେ ଦାନ୍ତରୋଗ ବିଶେଷଜ୍ଞ ଡା. ଶିଖା ରାମଚନ୍ଦାନୀ । ଦାନ୍ତ କ୍ଲିନିଙ୍ଗ ଠାରୁ ଆରମ୍ଭ କରି ବିଭିନ୍ନ ପ୍ରକାର ଅସ୍ତ୍ରୋପଚାର ମଧ୍ୟ ଏକଟଙ୍କାରେ କେବଳ ଗରିବ ରୋଗୀଙ୍କ ପାଇଁ ଉପଲବ୍ଧ ହେବ ବୋଲି ଡା. ଶିଖା ରାମଚନ୍ଦାନୀ ସୂଚନା ଦେଇଛନ୍ତି ।
ବୁର୍ଲା ଷ୍ଟେଟ୍ ବ୍ୟାଙ୍କ ନିକଟସ୍ଥ ଡା. ଶଙ୍କର ରାମଚନ୍ଦାନୀଙ୍କ ସରକାରୀ ବାସଭବନରେ ଏହି କ୍ଲିନିକ୍ ଆରମ୍ଭ ହୋଇଛି । ଏହାକୁ ଆନୁଷ୍ଠାନିକ ଭାବରେ ପୂଜାର୍ଚ୍ଚନା ପରେ ଉଦ୍ଘାଟନ ହୋଇଛି । ଏହି କ୍ଲିନିକ୍ର ସମସ୍ତ ଶ୍ରେୟ ମଧ୍ୟ ଡା. ଶଙ୍କରଙ୍କ ମାଆ ସ୍ୱର୍ଗତ ଲାଜ୍ବନ୍ତୀ ରାମଚନ୍ଦାନୀଙ୍କୁ ପ୍ରଦାନ କରିଛନ୍ତି ଡା.ରାମଚନ୍ଦାନୀ ଦମ୍ପତି । ଡା. ଶିକ୍ଷା ରାମଚନ୍ଦାନୀଙ୍କ ଏହି ଟଙ୍କିକିଆ କ୍ଲିନିକ୍ ଖୋଲିବା ପଛରେ ଡା. ଶଙ୍କର ରାମଚନ୍ଦାନୀଙ୍କ ସହଯୋଗ ରହିଥିବା ବେଳେ ତାଙ୍କଠାରୁ ଅନୁପ୍ରାଣିତ ହୋଇ ଏହି କ୍ଲିନିକ୍ ଗରିବ ରୋଗୀଙ୍କ ଉଦେଶ୍ୟରେ ଖୋଲିଥିବା ଡା. ଶିଖା କହିଛନ୍ତି । ପ୍ରଥମ ରୋଗୀ ଭାବେ ବରଗଡ଼ ଜିଲ୍ଲା ଅତାବିରା ଅଞ୍ଚଳର ଗୁରେନ୍ଦ୍ର ସେଠ୍ ନାମକ ଜଣେ ଗରିବ ରୋଗୀଙ୍କ ଦାନ୍ତ କ୍ଲିନିଙ୍ଗ କରି କ୍ଲିନିକ୍ର ଶୁଭାରମ୍ଭ କରାଯାଇଥିଲା । ପ୍ରଥମ ଦିନରେ ୬ଜଣ ଗରିବ ରୋଗୀଙ୍କ ଚିକିତ୍ସା କରାଯାଇଥିବା ସୂଚନା ମିଳିଛି ।
ସୂଚନା ଥାଉ କି ଡା. ଶଙ୍କର ରାମଚନ୍ଦାନୀଙ୍କ ଦ୍ୱାରା ପ୍ରଥମ କରି ବୁର୍ଲାରେ ଟଙ୍କିକିଆ କ୍ଲିନିକ୍ ଗତ ୨୦୨୧ ମସିହା ଫେବ୍ରୁଆରୀ ୧୨ ତାରିଖ ଦିନ ଉଦ୍ଘ।।ଟନ ହୋଇଥିଲା । ଏହି କ୍ଲିନିକ୍ ପାଇଁ ଡା. ଶଙ୍କର ସାରା ଦେଶରେ ଏକ ସ୍ୱତନ୍ତ୍ର ପରିଚୟ ପାଇ ପାରିଥିଲେ । ଏହି କ୍ଲିନିକ୍କୁ ଇତିମଧ୍ୟରେ ଏହାକୁ ସାଢ଼େ ଚାରିବର୍ଷ ବିତିଲାଣି । ଆରମ୍ଭରୁ ଟଙ୍କାଟିଏରେ ରୋଗୀଙ୍କୁ ଚିକିତ୍ସାସେବା ପରେ ଚିକିତ୍ସା ସେବା ସହିତ ମାଗଣା ଔଷଧ, ମାଗଣା ଇସିଜି, ନେବୁଲାଇଜର, ଆଶାବାଡ଼ି ସେବା ଉପଲବ୍ଧ ହୋଇଛି ।
