ଭୁବନେଶ୍ୱର, ୦୬/୧୧ : ପଳାଶପଲ୍ଲୀର ଲେନ୍ ନଂ-୭ । ହାଇ ସିକ୍ୟୁରିଟି ଜୋନ୍ । ତଥାପି ଡରିଲେନି ଦୁର୍ବୃତ୍ତ । ସୋମବାର ରାତି ୧୦ଟାରେ ସମାଜସେବୀ ଶିବ ଶ୍ରୀଚନ୍ଦନକୁ ଗୋଡ଼ାଇ ହାଣିଲେ । ଏବେ ଶିବ ଏମ୍ସ ହସ୍ପିଟାଲରେ ଜୀବନ ମରଣ ସହ ସଂଘର୍ଷ କରୁଛନ୍ତି । ଦୀପାବଳୀ ରାତିରେ ଅଶାନ୍ତ ହୋଇ ଉଠିଥିଲା ସହିଦନଗର । ଚାନ୍ଦିଭଣ୍ଡାର ନିକଟ ଗୋଶାଳାରେ ୨ ଗୋଷ୍ଠୀ ଭିତରେ ହଣାକଟା ଚାଲିଲା । ୩ ଆହତ ହେଲେ । ଆକ୍ରମଣକାରୀ ଗୋଷ୍ଠୀର ଆତଙ୍କ ଏତିକିରେ ଥମିଲାନି । ପ୍ରତିଶୋଧ ଲକ୍ଷ୍ୟରେ ତା’ପରଦିନ ସନ୍ଧ୍ୟାରେ ୱିନର୍ସ ଆସୋସିଏସନ କ୍ଲବ ସାମ୍ନାରେ ବୋମା ଫିଙ୍ଗିଲେ ।
ଅକ୍ଟୋବର ୨୯ରେ ନୂଆପଲ୍ଲୀ ଅଞ୍ଚଳରୁ ଜଣେ ୧୭ ବର୍ଷୀୟ ନାବାଳିକାକୁ ଫୁସୁଲାଇ ପଟିଆସ୍ଥିତ ଏକ ଓୟୋ ହୋଟେଲକୁ ନେଇଗଲେ । ନିଶାଯୁକ୍ତ ଥଣ୍ଡାପାନୀୟ ପିଆଇ ନାବାଳିକାକୁ ୪ଜଣ ଗଣବଳାତ୍କାର କଲେ । ଏମିତିକି ବଳାତ୍କାର ବେଳର ଭିଡିଓ ଉତ୍ତୋଳନ କରି ନାବାଳିକାର ମା’କୁ ବ୍ଲାକମେଲିଂ କରିବାକୁ ପଛାଇଲେନି । ଏହା ହେଉଛି ରାଜଧାନୀରେ ସପ୍ତାହକ ଭିତରେ ଘଟିଥିବା ୩ଟି ଅପରାଧର ପୃଷ୍ଠଭୂମି । କିନ୍ତୁ ଗଲା କିଛି ଦିନ ଧରି ରାଜଧାନୀର ଆଇନ୍ଶୃଙ୍ଖଳା ପୂରା ଢିଲା ହୋଇଯାଇଛି । ବେଲଗାମ୍ ହୋଇପଡି଼ଛନ୍ତି ଅପରାଧୀ ।
କମିଶନରେଟ ପୁଲିସର ନୂଆ ଟିମ୍କୁ ଖୋଲାଖୋଲି ଚାଲେଞ୍ଜ ଦେଉଛନ୍ତି । ପ୍ରତିଦିନ କିଛି ନା କିଛି ଅପରାଧ ଘଟୁଛି । ଲୁଟ୍, ଛିନ୍ତାଇ ମାମୁଲି ଘଟଣା ହୋଇଗଲାଣି । ପୁଣି ମାତିଲେଣି ଆପାର୍ଟମେଣ୍ଟ ଚୋର । ମାସକ ଭିତରେ ପାଖାପାଖି ଡଜନେ ଆପାର୍ଟମେଣ୍ଟରେ କଳାକନା ବୁଲାଇଲେଣି । ଭୟର ବାତାବରଣ ସୃଷ୍ଟି କଲେଣି ଅପରାଧୀ । ଅକ୍ଟୋବର ୧୭ରେ କଳିଙ୍ଗ ଷ୍ଟାଡିୟମ ଛକରେ କୋଷ୍ଟଗାର୍ଡ ଡିଆଇଜି ସତ୍ୟରଞ୍ଜନ ଦାଶ ଓ ତାଙ୍କ ସ୍ତ୍ରୀଙ୍କୁ ୨ ଯୁବକ ପ୍ରଚୁର ମଦ ପିଇ ଅଶ୍ଲୀଳ ଇଙ୍ଗିତ କରିଥିଲେ । ଟ୍ରାଫିକ୍ ପୋଷ୍ଟରେ କାର୍ଯ୍ୟରତ ପୁଲିସ କନଷ୍ଟେବଳ ନିରବଦ୍ରଷ୍ଟ୍ରା ସାଜିଥିଲେ । ନବମ ଶ୍ରେଣୀର ୨ ଛାତ୍ରୀଙ୍କୁ ଅପହରଣ କରି ଗଞ୍ଜାମ ଭଞ୍ଜନଗରରେ ବଳାତ୍କାର, ଭରତପୁର ସାମପୁରରେ ନିଶ୍ଚେତକ (ଆନାସ୍ଥେସିଆ) ଓଭରଡୋଜ୍ ଦେଇ ମହିଳାଙ୍କୁ ହତ୍ୟା, ମେଣ୍ଢାଶାଳରେ ଯୁବକକୁ ହତ୍ୟା କରିବା ଭଳି ଅପରାଧ ପୁଲିସର ମେରୁଦଣ୍ଡକୁ ଦୋହଲାଇ ଦେଇଛି ।
ସ୍ଥିତି ଏମିତି ହେଲାଣି ଯେ ମାତାଲ ମହିଳା ଥାନା ଭିତରେ ପଶି ହଙ୍ଗାମା କରୁଛନ୍ତି । ସେପ୍ଟେମ୍ବର ଶେଷ ବେଳକୁ କମିଶନରେଟ ପୁଲିସର ନବକଳେବର ହୋଇଥିଲା । ପୁଲିସ କମିଶନରଙ୍କ ସମେତ ଭୁବନେଶ୍ୱର ଓ କଟକ ୟୁପିଡିର ଡିସିପି ନୂଆ ଚେହେରା ମିଳିଥିଲା । ତା’ ପରଠୁ ସତେ ଯେମିତି ଅପରାଧୀ ଗୋଷ୍ଠୀ ଉପରମୁହାଁ ହୋଇ ପଡ଼ିଛନ୍ତି । ଆସନ୍ତା ୨୯ ତାରିଖରୁ ରାଜଧାନୀରେ ସର୍ବଭାରତୀୟ ପୁଲିସ ମହାନିର୍ଦ୍ଦେଶକ (ଡିଜିପି) ସମ୍ମେଳନ ଆରମ୍ଭ ହେଉଛି । ୨୮ଟି ରାଜ୍ୟ ଓ ୮ଟି କେନ୍ଦ୍ରଶାସିତ ଅଞ୍ଚଳରୁ ୧୬୦ ଜଣ ବରିଷ୍ଠ ଆଇପିଏସ୍ ଭୁବନେଶ୍ୱର ମୁହାଁ ହେବେ । ୩ ଦିନ ଧରି ରହିବେ । ପ୍ରଧାନମନ୍ତ୍ରୀ, କେନ୍ଦ୍ର ଗୃହମନ୍ତ୍ରୀ, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ୍ ବି ଯୋଗଦେବେ । ଏବେଠୁ ରାଜଧାନୀରେ ବିଗିଡି଼ଥିବା ଆଇନ୍ଶୃଙ୍ଖଳାରୁ ନ ସୁଧାରିଲେ, ସେତେବେଳକୁ କମିଶନରେଟ୍ ପୁଲିସର ଛବି ମଳିନ ପଡି଼ବା ଆଶଙ୍କା ଅଛି ।
ପୁଲିସର ମୂଳମନ୍ତ୍ର ହେଉଛି ଭିଜିବୁଲ ପୁଲିସିଂ । ପାର୍ବଣ ପୂର୍ବରୁ ପ୍ରତିଦିନ ବ୍ଲକିଂ ଚେକିଂ ହେଉଥିଲା । ମଦ୍ୟପ ଧରପଗଡ଼ ଅଭିଯାନ ଜୋର୍ଦାର ଚାଲୁଥିଲା । କିନ୍ତୁ କିଛି ଦିନ ହେଲା, ସହରରେ ବ୍ଲକିଂ ଚେକିଂ ହଜିଗଲାଣି । ରାସ୍ତାରୁ ପୁଲିସ ଉଭେଇ ଗଲେଣି । ଅବସରପ୍ରାପ୍ତ ପୁଲିସ ମହାନିର୍ଦ୍ଦେଶକ (ଡିଜିପି) ସଞ୍ଜୀବ୍ ମାରିକ କହିଛନ୍ତି, ଯେମିତି ଜଙ୍ଗଲ ଭିତରେ ମୟୂର ନାଚିଲେ, କେହି ଦେଖିପାରିବେନି । ସେହିପରି ପୁଲିସ ଘରେ ବସି ରହିଲେ, ଅପରାଧୀଙ୍କ ମନରେ ଭୟ ରହିବନି । ପୁଲିସ ନିହାତି ଭାବେ ସକ୍ରିୟ ହେବା କଥା । ସହରରେ ପାଟ୍ରୋଲିଂ ଓ ବ୍ଲକିଂ ଚେକିଂକୁ କଡ଼ାକଡି଼ କରାଯାଉ ।
