ହାଇଦ୍ରାବାଦ, ୨୯/୩ : ରିଲ୍ସ କରି କାହାର ଜୀବନ ଯିବା ଏବେ ନୀତିଦିନିଆ ଘଟଣା ହୋଇଗଲାଣି । ପ୍ରତ୍ୟେକ ଦିନ କେଉଁଠୁ ନା କେଉଁଠୁ ଏଭଳି ଖବର ସାମ୍ନାକୁ ଆସୁଛି । ନା ଅଛି କାହାକୁ ଭୟ ନା ଆଇନର ପ୍ରତିବନ୍ଧକ । ସବୁ କିଛି ସାତଖୁନ୍ ମାଫ୍ । ଏଭଳି ଏକ ଘଟଣା ଏବେ ସାମ୍ନାକୁ ଆସିଛି ଯାହାକୁ ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ । ରିଲ୍ସ କରି ଜନୈକ ଯୁବକଙ୍କୁ ହଟହଟା ହେବାକୁ ପଡ଼ିଛି । ତାଙ୍କ ନାଁରେ ଏବେ ମାମଲା ରୁଜୁ ହୋଇଛି । ରିଲ୍ କଲେ ଏବେ ରିୟଲରେ ମାମଲା ରୁଜୁ ହୋଇଛି । ଏଭଳି ଘଟଣା ସାମ୍ନାକୁ ଆସିଛି ହାଇଦ୍ରାବାଦରୁ ।
ସୋସିଆଲ ମିଡ଼ିଆରେ ଭାଇରାଲ ହେଉଥିବା ଭିଡ଼ିଓରେ ଅଫଜୁଦ୍ଦିନ ନାମକ ଏକ ୨୧ବର୍ଷୀୟ ଯୁବକ ଦେଖାଯାଉଛନ୍ତି । ସେ ସହରର ଭିଡ଼ ରାସ୍ତାରେ ଏକ ଖୋଲା ଜିପରେ ଯାଉଛନ୍ତି । ଜିପର ଡ୍ୟାଶବୋର୍ଡ଼ରେ ଏୟର ରାଇଫଲ ରଖିଛନ୍ତି ଏବଂ ବ୍ୟାକଗ୍ରାଉଣ୍ଡରେ ଶୋଲେ ଫିଲ୍ମର ପ୍ରସିଦ୍ଧ ଗୀତ ‘ମେହବୁବା-ମେହବୁବା’ ଗୀତକୁ ବଜାଉଛନ୍ତି । ଆଉ ଏହି ସମୟରେ ଅଫଜୁଦ୍ଦିନ ନିଜ ଗୋଡ଼ ବି ଜିପର ଡ୍ୟାଶବୋର୍ଡ଼ରେ ରଖିଛି ।
ଏହି ଭିଡ଼ିଓ ହାଇଦ୍ରାବାଦର ବଞ୍ଜାରା ହିଲ୍ସ ରୋଡ଼ ନମ୍ବର ୧ରେ ଥିବା ସରବୀ ହୋଟେଲ ପାଖରେ ସୁଟ୍ କରାଯାଇଥିଲା । ଏବେ ପୋଲିସ ଅଶାନ୍ତ କରିବା ଅଭିଯୋଗରେ ଏକ ମାମଲା ରୁଜୁ କରିଛି । ପୋଲିସ ୨୧ବର୍ଷର ଅଫଜୁଦ୍ଦିନ ଏବଂ ଜିପ ଡ୍ରାଇଭରଙ୍କୁ ଧରି ନେଇଛି । ଏହାସହ ରିଲ୍ସରେ ଦେଖାଯାଇଥିବା ଏୟର ଗନକୁ ଜବତ କରି ନେଇଛି । ପୋଲିସର ସୂଚନା ଅନୁସାରେ ଅଭିଯୁକ୍ତ ଜଣଙ୍କ ପେଶାରେ ଭିଡ଼ିଓଗ୍ରାଫର ଅଟନ୍ତି ଏବଂ ସବୁବେଳେ ରିଲ୍ସ କରିବା ଲାଗି ଏୟର ଗନର ବ୍ୟବହାର କରିଥାନ୍ତି ।
