ଲମତାପୁଟ,୦୭/୧୨: ପୋଲିସ ପୁଣି କଡା ପଦକ୍ଷପ ନେଇ ଜାରି ରଖିଛି ଅପରେସନ ଗ୍ରୀନ୍ କ୍ଳିନ୍ । ପାଡୁଆ ପୋଲିସ ଏବଂ କୋରାପୁଟ ଅବକାରୀ ବିଭାଗର ମିଳିତ ଭାବେ ପାଡୁଆ ଥାନା ଅଧୀନ ପାନ୍ତୁଲୁଙ୍ଗ ପଞ୍ଚାୟତ ସିରିଆପାଲି ଓ ଅଣ୍ଡରୁଗୁଡା ଗ୍ରାମ ନିକଟରେ ସ୍ଥାନୀୟ ମାଜିଷ୍ଟେଟଙ୍କ ଉପସ୍ଥିତିରେ ପ୍ରାୟ ୫୧ ଏକର ଜମିରୁ ପ୍ରାୟ ୭୧, ହଜାର ୪ ସହ ଗଞ୍ଜେଇ ଗଛ ନଷ୍ଟ କରାଯାଇଛି । ଗୋଇନ୍ଦା ସୂଚନାକୁ ଆଧାର କରି କୋରାପୁଟ ଏସପିଙ୍କ ନିର୍ଦ୍ଦେଶ କ୍ରମେ ଅପରେସନ ଗ୍ରୀନ୍ କ୍ଳିନ୍ ଜାରି ରହିଛି ।
ଏହି ଅଞ୍ଚଳଟି ଓଡ଼ିଶା ଓ ଆନ୍ଧ୍ରପ୍ରଦେଶର ସୀମାନ୍ତ ଅଞ୍ଚଳ ହୋଇଥିବା ବେଳେ ଗ୍ରାମକୁ ଲାଗି ରହିଛି ଜଲାପୁଟ ଜଳ ଭଣ୍ଡାର । ପାଣି ସୁବିଧା ଥିବାରୁ ଏହି ଅଞ୍ଚଳରେ ବେଧଡକ ଭାବେ ଗଞ୍ଜେଇ ଚାଷ କରାଯାଇଛି । ଚାଷୀଙ୍କ ସଚେତନତା ଅଭାବରୁ ଏଠି ଦୀର୍ଘ ବର୍ଷ ଧରି ଚାଷୀ ଗଞ୍ଜେଇ ଚାଷ କରୁଛି । ପୂର୍ବରୁ ଏହି ଅଞ୍ଚଳ ମାଓ ପ୍ରଭାବିତ ଅଞ୍ଚଳ ହୋଇଥିବାରୁ ଆଇ ଆର୍.ବି.ଏନ୍ ଫୋର୍ସ, ଜଙ୍ଗଲ ବିଭାଗ, ପାଡୁଆ ପୋଲିସ ଏବଂ କୋରାପୁଟ ଅବକାରୀ ବିଭାଗର ମିଳିତ ଉଦ୍ୟମରେ ସକାଳ ୯ ଟା ଠାରୁ ଆରମ୍ଭ ହୋଇ ଅପରେସନ ସନ୍ଧ୍ୟା ୫ଟା ପର୍ଯ୍ୟନ୍ତ ଜାରି ରହିଥିଲା। ଏହି ଗଞ୍ଜେଇ ଚାଷ ଜଙ୍ଗଲ ଜମି ନା ବ୍ୟକ୍ତିଗତ ଜମିରେ ଚାଷ କରାଯାଇଛି, ତାହା ସ୍ଥାନୀୟ ଆରଆଇଙ୍କ ରିପୋର୍ଟ ମିଳିବା ପରେ ଜଣାପଡିବ । ଯଦି ସେହି ଜମି ମାଲିକାନା ଜମି ହୋଇଥାଏ, ତେଲେ ସମ୍ପୃକ୍ତ ଜମି ମାଲିକଙ୍କ ନାମରେ ମାମଲା ରୁଜୁ ହେବା ନେଇ ସୂଚନା ଦେଇଛନ୍ତି ନନ୍ଦପୁର ଏସ୍.ଡି.ପିଓ।
