ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ତାମିଲନାଡୁର ଗଙ୍ଗେଇକୋଣ୍ଡା ଚୋଳପୁରମ ମନ୍ଦିରରେ ଆଦି ତିରୁବତୀରାଇ ଉତ୍ସବରେ ଅଂଶଗ୍ରହଣ କରିଥିଲେ । ଏହି ଅବସରରେ ସେ କହିଥିଲେ ଯେ, ମୁଁ କାଶୀର ସାଂସଦ ଏବଂ ଯେତେବେଳେ ମୁଁ 'ଓମ୍ ନମଃ ଶିବାୟ' ଶୁଣେ, ମୋ ଦେହ ଶିହରୀ ଯାଏ । ଶିବ ଦର୍ଶନର ଆଶ୍ଚର୍ଯ୍ୟଜନକ ଶକ୍ତି, ଶ୍ରୀ ଇଲାୟୈରାଜାଙ୍କ ସଙ୍ଗୀତ ଏବଂ ଜପ, ଏହି ଆଧ୍ୟାତ୍ମିକ ଅନୁଭୂତି ମନକୁ ଅଭିଭୂତ କରିଦିଏ । ସେ କହିଥିଲେ, ଅପରେସନ ସିନ୍ଦୂର ପ୍ରମାଣ କରିଛି ଯେ, ଆତଙ୍କବାଦୀଙ୍କ ପାଇଁ କୌଣସି ନିରାପଦ ଆଶ୍ରୟସ୍ଥଳ ନାହିଁ। ଯଦି ଭାରତର ସାର୍ବଭୌମତ୍ୱ ଉପରେ ଆକ୍ରମଣ ହୁଏ, ତେବେ କିପରି ଆମ ଦେଶ ଜବାବ ଦିଏ ତାହା ବିଶ୍ୱ ଦେଖିଲା । ଏହା ସମଗ୍ର ଦେଶରେ ନୂତନ ଆତ୍ମବିଶ୍ବାସ ସୃଷ୍ଟି କରିଛି।
ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ, ଆଜିର ଭାରତ ଏହାର ସୁରକ୍ଷାକୁ ସର୍ବୋପରି ମନେ କରେ। ଅପରେସନ ସିନ୍ଦୂର ସମୟରେ, ବିଶ୍ୱ ଦେଖିଲା ଯେ, ଯଦି କେହି ଭାରତର ସୁରକ୍ଷା ଏବଂ ସାର୍ବଭୌମତ୍ୱ ଉପରେ ଆକ୍ରମଣ କରେ, ତେବେ ଭାରତ ଜାଣିଛି ଯେ କିପରି ନିଜ ଭାଷାରେ ଜବାବ ଦେବାକୁ ହେବ। ଏହି ଅପରେସନ୍ ସ୍ପଷ୍ଟ କରିଛି ଯେ, ଏବେ ଭାରତର ଶତ୍ରୁ ଏବଂ ଆତଙ୍କବାଦୀଙ୍କ ପାଇଁ ବିଶ୍ୱରେ କୌଣସି ସୁରକ୍ଷିତ ସ୍ଥାନ ନାହିଁ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଙ୍ଗାଇକୋଣ୍ଡା ଚୋଲାପୁରମ୍ ଆଦି ତିରୁବତୀରାଇ ପର୍ବ ଅବସରରେ ରାଜା ରାଜା ଚୋଳଙ୍କ ପ୍ରତିମୂର୍ତ୍ତୀ ଥିବା ଏକ ମୁଦ୍ରା ଜାରି କରିଥିଲେ। ନୂତନ ମୁଦ୍ରା ଜାରି କରିବା ପରେ ପ୍ରଧାନମନ୍ତ୍ରୀ ମୋଦୀ କହିଥିଲେ, ‘ମୁଁ ଗୋଟିଏ କଥା ଲକ୍ଷ୍ୟ କରିଛି। ଯେତେବେଳେ ନୈନାର ନାଗେନ୍ଦ୍ରନଙ୍କ ନାମ ଆସେ, ଆପଣମାନେ ଉତ୍ସାହିତ ହୋଇଯାଆନ୍ତି। ରାଜା ରାଜ ଚୋଳଙ୍କ ସ୍ଥାନରେ ସଂଗୀତ ଗୁରୁ ଇଲାୟୈରାଜାଙ୍କ ଗୀତ ଶିବ ଭକ୍ତିର ଥିଲା ।’
ସେ କହିଥିଲେ ଯେ, ଏହି ଐତିହାସିକ ମନ୍ଦିରରେ, ମୁଁ ଦେଶର ୧୪୦ କୋଟି ଲୋକଙ୍କ ମଙ୍ଗଳ ଏବଂ ଦେଶର ନିରନ୍ତର ପ୍ରଗତି ପାଇଁ ପ୍ରାର୍ଥନା କରିଛି। ଭଗବାନ ଶିବ ସମସ୍ତଙ୍କ ଉପରେ ତାଙ୍କର ଆଶୀର୍ବାଦ ବର୍ଷା କରନ୍ତୁ... ହର ହର ମହାଦେବ !
ସେ କହିଥିଲେ ଯେ, ଚୋଳ ରାଜାମାନେ ଶ୍ରୀଲଙ୍କା, ମାଳଦ୍ୱୀପ ଏବଂ ଦକ୍ଷିଣ-ପୂର୍ବ ଏସିଆକୁ ସେମାନଙ୍କର କୂଟନୈତିକ ଏବଂ ବାଣିଜ୍ୟିକ ସମ୍ପର୍କ ବିସ୍ତାର କରିଥିଲେ। ଏହା ମଧ୍ୟ ଏକ ସଂଯୋଗ ଯେ, ମୁଁ ଗତକାଲି ମାଳଦ୍ୱୀପରୁ ଫେରିଛି ଏବଂ ଆଜି ମୁଁ ତାମିଲନାଡୁରେ ଏହି କାର୍ଯ୍ୟକ୍ରମର ଏକ ଅଂଶ ।
