ନୂଆଦିଲ୍ଲୀ,୦୮/୦୫: 'ଅପରେସନ ସିନ୍ଦୂର' ମାଧ୍ୟମରେ, ପାକିସ୍ତାନରେ ଥିବା ଆତଙ୍କବାଦୀ ଆଡ୍ଡାଗୁଡ଼ିକ ଉପରେ ମେ ୬-୭ ମଧ୍ୟରାତ୍ରୀରେ ଭାରତୀୟ ସେନା ଏୟାରଷ୍ଟ୍ରାଇକ କରିଥିଲା। ଗୋଟିଏ ପଟେ ବାୟୁସେନା ଆକାଶରୁ କ୍ଷେପଣାସ୍ତ୍ର ନିକ୍ଷେପ କରୁଥିବା ବେଳେ, ଅନ୍ୟପଟେ ସ୍ଥଳସେନା ମଧ୍ୟ ସ୍ଥଳଭାଗରୁ ଆତଙ୍କୀ ଶିବିର ଉପରେ ମିଶାଇଲ ନିକ୍ଷେପ କରିଥିଲା। ଭାରତ ବିଭିନ୍ନ ଦିଗରୁ ଆକ୍ରମଣ କରିଥିଲା।
ଆଗାମୀ ଦିନରେ ଭାରତ ପାକିସ୍ତାନରେ ଥିବା ଅନ୍ୟ ଆତଙ୍କବାଦୀ ଆଡ୍ଡାଗୁଡ଼ିକ ବିରୁଦ୍ଧରେ ସମାନ କାର୍ଯ୍ୟାନୁଷ୍ଠାନ ଗ୍ରହଣ କରିପାରେ ବୋଲି ବିଶେଷ ସୂତ୍ର ସୂଚାଇଛି। ଉଦ୍ଦେଶ୍ୟ ହେଉଛି ପାକିସ୍ତାନ ଏକ ଶିକ୍ଷା ଶିଖୁ ଏବଂ ଆତଙ୍କବାଦୀ କାର୍ଯ୍ୟକଳାପକୁ ପ୍ରୋତ୍ସାହିତ କରିବାରୁ ନିବୃତ୍ତ ରହୁ। ଯଦି ପାକିସ୍ତାନ ପ୍ରତିଶୋଧ ନିଏ, ତେବେ ଭାରତ ମଧ୍ୟ ଏହାର କଡ଼ା ଜବାବ ଦେବ।
ଏହି ସାମରିକ କାର୍ଯ୍ୟାନୁଷ୍ଠାନ ନେବା ପୂର୍ବରୁ, ଭାରତ ବିଶ୍ୱବ୍ୟାପୀ ସମର୍ଥନ ସଂଗ୍ରହ କରିଥିଲା ଏବଂ ଆତଙ୍କବାଦ ପ୍ରସଙ୍ଗରେ ଜାତିସଂଘ ସୁରକ୍ଷା ପରିଷଦର ସଦସ୍ୟ ଦେଶମାନଙ୍କୁ ଏକାଠି କରିଥିଲା। ରୁଷ, ଆମେରିକା, ୟୁକେ ଏବଂ ଫ୍ରାନ୍ସ ଖୋଲାଖୋଲି ଭାବରେ ଭାରତକୁ ସମର୍ଥନ କରିଥିଲେ ମଧ୍ୟ ଚୀନର ପ୍ରତିକ୍ରିୟା ପାକିସ୍ତାନ ପ୍ରତି ଅଧିକ ଆନୁଗତ୍ୟ ନଥିଲା। ଏହି କାରଣରୁ 'ଅପରେସନ ସିନ୍ଦୁର' ପରେ ପାକିସ୍ତାନକୁ କୌଣସି ସମର୍ଥନ ମିଳିନାହିଁ। ତୁର୍କୀ ବ୍ୟତୀତ ଅନ୍ୟ କୌଣସି ଦେଶ ଖୋଲାଖୋଲି ଭାବରେ ଆଗକୁ ଆସି ନଥିଲେ ଏବଂ ଗଲ୍ଫ ଦେଶଗୁଡ଼ିକ ଭାରତକୁ ସମର୍ଥନ କରୁଥିବା ଦେଖାଯାଇଥିଲା। ଏହା ଭାରତ ପାଇଁ ଏକ ବଡ଼ କୂଟନୈତିକ ସଫଳତା। 'ଅପରେସନ ସିନ୍ଦୂର' ସାମରିକ ଏବଂ କୂଟନୈତିକ ଉଭୟ କ୍ଷେତ୍ରରେ ଭାରତର ଲକ୍ଷ୍ୟ ହାସଲ କରିଛି।
ସୂଚନାଥାଉକି, 'ଅପରେସନ ସିନ୍ଦୂର' ମାଧ୍ୟମରେ ଭାରତ ପାକିସ୍ତାନ ଏବଂ ପିଓକେରେ ଥିବା ୯ଟି ଆତଙ୍କବାଦୀ ଆଡ୍ଡାକୁ ଟାର୍ଗେଟ କରିଥିଲା। ଏଥିରେ ପ୍ରାୟ ୭୦ ରୁ ୧୦୦ ଆତଙ୍କବାଦୀ ନିହତ ହୋଇଥିବା ସୂଚନା ମିଳିଛି। ବିଳମ୍ବିତ ରାତିର ଏହି ଆକ୍ରମଣ ପରେ, ପାକିସ୍ତାନ ନିୟନ୍ତ୍ରଣ ରେଖାରେ ଲଗାତାର ଅସ୍ତ୍ରବିରତି ଉଲ୍ଲଂଘନ କରୁଛି।
