କଟକ,୦୪/୦୩: ନାବାଳିକାଙ୍କ ଗର୍ଭ ନଷ୍ଟ ନେଇ ଥିବା ଆଇନଗତ ପ୍ରତିବନ୍ଧକ ତଥା ପ୍ରାଶାସନିକ ସମସ୍ୟା ଦୂର କରିବା ଉଦ୍ଦେଶ୍ୟରେ ହାଇକୋର୍ଟ ସୋମବାର ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି । ବିଭିନ୍ନ କାରଣରୁ ଯେପରି ଅଯଥାରେ ସମୟ ଗଡ଼ିନଯିବ ଓ ପୀଡ଼ିତା ନାବାଳିକାଙ୍କ ଶାରୀରିକ ଓ ମାନସିକ ସ୍ୱାସ୍ଥ୍ୟ ଠିକ୍ ରହିବ ସେଥିପାଇଁ ଗର୍ଭ ନଷ୍ଟ ସଂକ୍ରାନ୍ତରେ ରାଜ୍ୟ ସ୍ୱାସ୍ଥ୍ୟ ବିଭାଗକ ଏକ ବିସ୍ତୃତ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡିଓର (ଏସ୍ଓପି) ଜାରି କରିବା ଲାଗି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ଏହି ଏସ୍ଓପି ପ୍ରସ୍ତୁତିରେ ସ୍ତ୍ରୀ ରୋଗ ଓ ପ୍ରସୂତି ବିଭାଗ ବିଶେଷଜ୍ଞ ଏବଂ ସ୍ୱାସ୍ଥ୍ୟ ଆଇନ ବିଶେଷଜ୍ଞଙ୍କ ପରାମର୍ଶ ନେବାକୁ ହାଇକୋର୍ଟ କହିଛନ୍ତି । ଦୁଷ୍କର୍ମ କାରଣରୁ ଗର୍ଭବତୀ ହୋଇଥିବା ଜଣେ ପୀଡ଼ିତା ନାବାଳିକାଙ୍କ ଗର୍ଭନଷ୍ଟ ପାଇଁ ତାଙ୍କ ବାପାଙ୍କ ପକ୍ଷରୁ ଆଗତ ମାମଲାର ଶୁଣାଣି କରି ବିଚାରପତି ଜଷ୍ଟିସ୍ ସଞ୍ଜୀବ କୁମାର ପାଣିଗ୍ରାହୀ ଏହି ନିର୍ଦ୍ଦେଶ ଦେଇଛନ୍ତି ।
ହାଇକୋର୍ଟ ରାୟରେ କହିଛନ୍ତି, ସ୍ୱାସ୍ଥ୍ୟ ବିଭାଗ ଏସ୍ଓପି ପ୍ରସ୍ତୁତ କରିବା ପରେ ରାଜ୍ୟ ସରକାର ଏହାକୁ ବିଜ୍ଞପ୍ତି ଆକାରରେ ପ୍ରକାଶ କରିବେ। ଏହି ଏସ୍ଓପିର କପି ପ୍ରତି ସରକାରୀ ଓ ଘରୋଇ ମେଡିକାଲ୍ ସମେତ ଥାନା ଅଧିକାରୀଙ୍କୁ ମଧ୍ୟ ପ୍ରଦାନ କରାଯିବ । ସୁରକ୍ଷିତ ଓ ସହଜରେ ଯେଭଳି ଗର୍ଭନଷ୍ଟ ହୋଇପାରିବ, ଅଯଥାରେ ସମୟ ଅପଚୟକୁ କିଭଳି ରୋକାଯିବ, ଆଇନଗତ ସମସ୍ୟା କିଭଳି ନରହିବ ସେ ସଂପର୍କରେ ଏସ୍ଓପିରେ ସ୍ପଷ୍ଟ ମାର୍ଗଦର୍ଶନ ରହିବ । ପୀଡ଼ିତାଙ୍କ ମାନସିକ ସ୍ଥିତି ଠିକ୍ ରଖିବା ପାଇଁ ମାନସିକ ବିଶେଷଜ୍ଞଙ୍କ ପରାମର୍ଶ ନିହାତି ନିଆଯିବ । ଏହି ଏସ୍ଓପି ଯେମିତି ଠିକ୍ ଭାବେ କାର୍ଯ୍ୟକାରୀ ହେବ ସେଥିପାଇଁ ନିୟମିତ ବ୍ୟବଧାନରେ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ଏହାର ସମୀକ୍ଷା କରିବ । ଆବଶ୍ୟକସ୍ଥଳେ ସଂଶୋଧନ ପାଇଁ ମଧ୍ୟ ପଦକ୍ଷେପ ନିଆଯାଇପାରିବ । ଆଗାମୀ ୬ ମାସ ମଧ୍ୟରେ ଏସ୍ଓପି ଜାରି କରିବାକୁ ହାଇକୋର୍ଟ ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି ।
ପୀଡ଼ିତାଙ୍କ ବାପା ରୁଜୁ କରିଥିବା ପିଟିସନ୍ରେ ଦର୍ଶାଇଛନ୍ତି ଯେ, ତାଙ୍କ ଝିଅ ୧୩ବର୍ଷର । ସେ ସିକିଲ୍ ସେଲ୍ ରୋଗରେ ପୀଡ଼ିତ । ଦୁଷ୍କର୍ମ କାରଣରୁ ତାଙ୍କ ଝିଅ ଗର୍ଭବତୀ । ଦୁଷ୍କର୍ମ ପରେ ଅଭିଯୁକ୍ତ ଧମକଚମକ ଦେବାରୁ ପୀଡ଼ିତା ଏହି ଘଟଣା ସଂକ୍ରାନ୍ତରେ ପରିବାରକୁ ଜଣାଇନଥିଲେ । ବିଳମ୍ବରେ ଡାକ୍ତରଙ୍କୁ ଦେଖାଇବାରୁ ଗର୍ଭଧାରଣକୁ ୨୪ ସପ୍ତାହ ଟପି ଯାଇଥିଲା । ଅନ୍ୟପକ୍ଷରେ ଗର୍ଭ ନଷ୍ଟ ନେଇ ଆଇନଗତ ପ୍ରତିବନ୍ଧକ ଥିବାରୁ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । ହାଇକୋର୍ଟ ଏହି ମାମଲାର ଶୁଣାଣି କରି ମେଡିକାଲ୍ ବୋର୍ଡ ଗଠନ ପାଇଁ ନିର୍ଦ୍ଦେଶ ଦେଇଥିଲେ । ପୀଡ଼ିତାଙ୍କ ସ୍ୱାସ୍ଥ୍ୟାବସ୍ଥା ଯାଞ୍ଚ୍ ପରେ ମେଡିକାଲ୍ ବୋର୍ଡ ତୁରନ୍ତ ଗର୍ଭ ନଷ୍ଟ କରିବାକୁ ପରାମର୍ଶ ଦେଇଛନ୍ତି । ବୋର୍ଡର ପରାମର୍ଶ ମୁତାବକ ହାଇକୋର୍ଟ ପିଟିସନ୍କୁ ଗ୍ରହଣ କରିଛନ୍ତି । ଭବିଷ୍ୟତରେ ଯେପରି ଏଭଳି କ୍ଷେତ୍ରରେ କୌଣସି ଆଇନଗତ ପ୍ରତିବନ୍ଧକ ରହିବ ନାହିଁ ସେଥିପାଇଁ ଏସ୍ଓପି ଜାରି କରିବା ଲାଗି ସ୍ୱାସ୍ଥ୍ୟ ବିଭାଗକୁ ନିର୍ଦ୍ଦେଶ ଦେଇଛନ୍ତି ।
