ଭୁବନେଶ୍ୱର, ୨୯/୮ : 'ଜାତୀୟ ଶିକ୍ଷା ନୀତି - ୨୦୨୦' ସାମାଜିକ ନ୍ୟାୟ ଦିଗରେ କାର୍ଯ୍ୟ କରିବା ସହ ଜନଜାତି ଛାତ୍ରଛାତ୍ରୀଙ୍କୁ ଗୁଣାତ୍ମକ ଶିକ୍ଷା ପ୍ରଦାନ କରି ଏକ ସର୍ବବ୍ୟାପୀ ଓ ସର୍ବସ୍ପର୍ଶୀ ସମାଜ ଗଠନ କରିବା ପାଇଁ ପ୍ରତିଶ୍ରୁତିବଦ୍ଧ ବୋଲି କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଶୁକ୍ରବାର ଭୁବନେଶ୍ୱରର ଲୋକସେବା ଭବନର ସମ୍ମେଳନ କେନ୍ଦ୍ରରେ ଆୟୋଜିତ ଅନୁସୂଚିତ ଜାତି(ଏସସି) ଓ ଅନୁସୂଚିତ ଜନଜାତି(ଏସଟି) କଲ୍ୟାଣ ପାଇଁ ସଂସଦ ଏବଂ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ବିଧାନସଭା କମିଟିର ଅଧ୍ୟକ୍ଷଙ୍କ ଜାତୀୟ ସମ୍ମିଳନୀର ଉଦଘାଟନୀ ସମାରୋହରେ ଯୋଗଦେଇ ଶ୍ରୀ ପ୍ରଧାନ ଏହା କହିଛନ୍ତି । ଏସସି ଓ ଏସଟି, ବିକାଶ ଏବଂ ସଶକ୍ତୀକରଣରେ ସଂସଦୀୟ ଏବଂ ବିଧାନସଭା କମିଟିର ଭୂମିକା ବିଷୟବସ୍ତୁ ଉପରେ ଶ୍ରୀ ପ୍ରଧାନ ମତପ୍ରକାଶ କରିବା ସହ ସର୍ବପ୍ରଥମେ ସମ୍ବିଧାନର ପ୍ରଣେତା ଡକ୍ଟର ବାବାସାହେବ ଆମ୍ବେଦକରଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ ।
ମହାପ୍ରଭୁ ଶ୍ରୀଜଗନ୍ନାଥଙ୍କ ଭୂମିରେ ସାମାଜିକ ନ୍ୟାୟର ସମସ୍ତ ସଦସ୍ୟଙ୍କୁ ସ୍ୱାଗତ କରିବା ସହ ସମାନତା, ସମ୍ମାନ ଏବଂ ନ୍ୟାୟର ଭାବନାରେ ପ୍ରେରିତ ଏହି ପଦକ୍ଷେପ ପାଇଁ ଲୋକସଭା ଅଧ୍ୟକ୍ଷଙ୍କୁ ଧନ୍ୟବାଦ ଜଣାଇଛନ୍ତି । ସେ କହିଛନ୍ତି, ଏହି ପ୍ରୟାସ କେବଳ ଅନୁସୂଚିତ ଜାତି ଏବଂ ଜନଜାତି ବର୍ଗର ସଶକ୍ତିକରଣର ଏକ ମାଧ୍ୟମ ନୁହେଁ ବରଂ ଗଣତାନ୍ତ୍ରିକ ବ୍ୟବସ୍ଥାକୁ ସମାଜର ଅନ୍ତିମ ସୋପାନ ପର୍ଯ୍ୟନ୍ତ ପହଞ୍ଚାଇବାରେ ଐତିହାସିକ ପଦକ୍ଷେପ । ଶ୍ରୀ ପ୍ରଧାନ ଆହୁରି କହିଛନ୍ତି ଯେ, ଭାରତର ସ୍ୱାଧୀନତା ସଂଗ୍ରାମ ଏବଂ ବଞ୍ଚିତଙ୍କ ଅଧିକାରକୁ ସୁରକ୍ଷା ଦେବାରେ ଓଡ଼ିଶା ମାଟିର ବୀର ସୁରେନ୍ଦ୍ର ସାଏ, ଲକ୍ଷ୍ମଣ ନାୟକ ଓ ନିର୍ମଳ ମୁଣ୍ଡାଙ୍କ ପରି ବୀର ଯୋଦ୍ଧାମାନେ ଅତୁଳନୀୟ ଅବଦାନ ଦେଇଛନ୍ତି । ୧୯୯୯ ମସିହାରେ ଆମର ମାର୍ଗଦର୍ଶକ ଅଟଳଜୀଙ୍କ ସରକାରରେ ପ୍ରଥମ ଥର ପାଇଁ ଜନଜାତି ବ୍ୟାପାର ମନ୍ତ୍ରଣାଳୟ ଗଠନ କରାଯାଇଥିଲା । ଏହି ମନ୍ତ୍ରଣାଳୟ ଗଠନ ହେବା ପରେ ଓଡ଼ିଶାର ଜୁଏଲ ଓରାମ ଏହାର ଦାୟିତ୍ୱ ନେଇଥିଲେ ।
ଏହି ପଦକ୍ଷେପ ସାମାଜିକ ନ୍ୟାୟ ପ୍ରତି ଆମର ପ୍ରତିବଦ୍ଧତାକୁ ପ୍ରତିଫଳିତ କରୁଛି । ଏସସି/ଏସଟିଙ୍କ କଲ୍ୟାଣ ସହ ବଞ୍ଚିତଙ୍କୁ ଅଗ୍ରାଧିକାର ଦେବା ହେଉଛି ମୋଦୀ ସରକାରଙ୍କ ପ୍ରାଥମିକତା । ଆଜି ଦେଶରେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ, ଦେଶରେ ଗରିବ ଏବଂ ବଞ୍ଚିତଙ୍କ କଲ୍ୟାଣ ପାଇଁ ସମର୍ପିତ ଏକ ସରକାର କାର୍ଯ୍ୟ କରୁଛି । ବଞ୍ଚିତଙ୍କ ସ୍ୱପ୍ନ ପୂରଣ କରିବା ସହିତ ୨୦୪୭ ସୁଦ୍ଧା 'ବିକଶିତ ଭାରତ' ସ୍ନପ୍ନକୁ ସାକାର କରିବାର ଆମର ମୂଳ ଲକ୍ଷ୍ୟ । ଆମେ ୧୧୭ ଭାଷାରେ ପ୍ରାଇମର ବା ବର୍ଣ୍ଣମାଳା ପୁସ୍ତକ ପ୍ରସ୍ତୁତ କରିଛୁ, ଯେଉଁଥିରେ ୧୭ ପ୍ରାଇମର ଓଡ଼ିଶାର ଜନଜାତି ସମୁଦାୟ ଦ୍ୱାରା କୁହାଯାଉଥିବା ଭାଷା । ମୋଦୀ ସରକାର ଆସିବା ପରେ ଏସସି ଓ ଏସଟି ଛାତ୍ରଛାତ୍ରୀଙ୍କ ନାମଲେଖା ୪୬ ପ୍ରତିଶତରୁ ୬୬ରୁ ଅଧିକ ପ୍ରତିଶତ ହୋଇଛି । ଶିକ୍ଷା କ୍ଷେତ୍ରରେ ଅନୁସୂଚିତ ଜାତିର ମହିଳାଙ୍କ ନାମଲେଖା ୫୧ ପ୍ରତିଶତ ବୃଦ୍ଧି ହୋଇଛି । ୨୦୧୯ ପର୍ଯ୍ୟନ୍ତ ଆସିଷ୍ଟାଣ୍ଟ ପ୍ରଫେସର ପଦବୀ ପୂରଣ ନ ହେଲେ ତାକୁ ଏକ ପ୍ରକ୍ରିୟା କରି ସାଧାରଣ ବର୍ଗରେ ପୂରଣ କରାଯାଉଥିଲା, କିନ୍ତୁ ମୋଦୀ ସରକାରରେ ଏସସି ଏସଟି ସେମାନଙ୍କର ଅଧିକାର ପାଉଛନ୍ତି । ସମାଜର ବଞ୍ଚିତ ଲୋକମାନେ ଆଗକୁ ଆସିଲେ ହିଁ ରାଜ୍ୟ ଓ ଦେଶ ବିକଶିତ ହୋଇପାରିବ ବୋଲି ଶ୍ରୀ ପ୍ରଧାନ ମତପ୍ରକାଶ କରିଥିଲେ ।
ଏହି କାର୍ଯ୍ୟକ୍ରମରେ ରାଜ୍ୟସଭା ଉପାଧ୍ୟକ୍ଷ ହରିବଂଶ, ଲୋକସଭା ବାଚସ୍ପତି ଓମ ବିର୍ଲା, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ର ଆଦିବାସୀ ବ୍ୟପାର ମନ୍ତ୍ରୀ ଜୁଏଲ ଓରାମ, ଓଡ଼ିଶା ବିଧାନସଭାର ବାଚସ୍ପତି ସୁରମା ପାଢୀ, ଉପବାଚସ୍ପତି ଭବନୀ ଶଙ୍କର ଭୋଇ, ଲୋକସଭାର ଅନୁସୂଚିତ ଜାତି ଓ ଅନୁସୂଚିତ ଜନଜାତି କଲ୍ୟାଣ ସଂସଦୀୟ କମିଟିର ଅଧ୍ୟକ୍ଷ ଫଗନ ସିଂହ କୁଲସ୍ତେ ପ୍ରମୁଖ ଉପସ୍ଥିତ ଥିଲେ ।
