କୁତ୍ରା,୨୩/୦୮: ବୁଢ଼ା ହୋଇଯାଇଥିଲା । ତଥାପି ଚିହ୍ନୁଥିଲା ମାଲିକର ପେଟ । ପିଠିରେ ବସାଇ ଯାତ୍ରୀଙ୍କୁ ବୋହୁଥିଲା । ମନୋରଞ୍ଜନ କରୁଥିଲା । ପାଟି ଖୋଲୁ ନ ଥିବାରୁ ଦାବି ବୋଲି କିଛି ନ ଥିଲା । ଯାହା ମିଳୁଥିଲା ଖାଉଥିଲା । ନ ଦେଲେ ନିରବ ରହୁଥିଲା । ଆଦାୟ ଟଙ୍କାରେ ମାଲିକର ପକେଟ୍ ଗରମ ହେଉଥିଲା । ହେଲେ ଯେବେଠୁ ଅସୁସ୍ଥ ହେଲା ସେବେଠୁ ପର ହୋଇଗଲା । ମାଲିକ ନିଷ୍ଠୁର ହୋଇଗଲା। ଗଛରେ ବାନ୍ଧିଦେଇ ପଳାଇଲା । ଦୁଇଦିନ ହେଲା ରୋଗଣା ଓଟ ବର୍ଷାରେ ଭିଜୁଛି । ଭୋକରେ ଆଉଟୁ ପାଉଟୁ ହେଉଛି । ସୁନ୍ଦରଗଡ଼ ଜିଲ୍ଲା କୁତ୍ରା ବ୍ଲକ୍ ଅନ୍ତର୍ଗତ ତେଲିଘଣା ଆମ୍ବ ବଗିଚାରେ ଦେଖିବାକୁ ମିଳିଛି ପ୍ରାଣୀ ନିର୍ଦ୍ଦୟତାର ଏଭଳି କରୁଣ ଚିତ୍ର ।
ସ୍ଥାନୀୟ ଲୋକଙ୍କ କହିବା କଥା, ରାଜସ୍ଥାନର ଜଣେ ବ୍ୟକ୍ତି ଓଟଟିକୁ ଆଣି କୁତ୍ରା ଅଞ୍ଚଳରେ ବୁଲାଉଥିଲେ । ଘର ଘର ବୁଲି ଯାହା ରୋଜଗାର କରୁଥିଲେ ସେଥିରେ ଚଳୁଥିଲେ । ଓଟଟି ଅତି ଦୁର୍ବଳ ହୋଇଯାଇଥିଲା । ଚାଲିବାକୁ ବଳ ପାଉ ନ ଥିଲା । ଶରୀର କଙ୍କାଳସାର ହୋଇଯାଇଥିଲା । ଓଟଟି ଅସୁସ୍ଥ ହୋଇପଡ଼ିବା ପରେ ମାଲିକ ଏହାକୁ ଗଛରେ ବାନ୍ଧି ଦେଇ ପଳାଇଛି । ନିରୀହ ପ୍ରାଣୀ ଦୁଇଦିନ ହେଲା ତେଲିଘଣା ଆମ୍ବ ବଗିଚାରେ ବନ୍ଧା ହୋଇ ପଡ଼ି ରହିଛି । ଲଘୁଚାପ ପ୍ରଭାବରେ ହେଉଥିବା ପ୍ରବଳ ବର୍ଷାରେ ଭିଜୁଛି । ଫଳରେ ତା’ ଦେହ ଆହୁରି ଖରାପ ହୋଇଯାଇଛି । ଦୁଇଦିନ ହେଲା ଭୋକିଲା ଅଛି । ତଥାପି ମାଲିକର ବାଟକୁ ଚାହିଁ ବସିଛି । ଅନ୍ୟପଟେ ମାଲିକର ବ୍ୟାଗ୍ ଗଛ ପାଖରେ ରଖାଯାଇଥିବା ଦେଖିବାକୁ ମିଳିଛି । ମାଲିକ ଜଣକ କୁଆଡ଼େ ଓ କେଉଁ ପରିସ୍ଥିତିରେ ଗାଏବ ହୋଇଗଲେ ତାହା କେହି ଜାଣିନାହାନ୍ତି । ତୁରନ୍ତ ପ୍ରାଣୀଧନ ବିଭାଗ ଓଟକୁ ଉଦ୍ଧାର କରି ଚିକିତ୍ସା କରାଇବାକୁ ଅଞ୍ଚଳବାସୀ ଦାବି କରିଛନ୍ତି ।
