ଗୁଣପୁର,୨୭।୦୫: ରାୟଗଡ଼ା ଜିଲ୍ଲା ଗୁଣପୁର ଏଡିଜେଙ୍କ କୋର୍ଟରେ ପଦ୍ମପୁର ନୂଆ ସାହିରେ ଘଟିଥିବା ଏକ ବଧୁ ହତ୍ୟାକାଣ୍ଡ ମାମଲାରେ ମଙ୍ଗଳବାର ରାୟ ପ୍ରକାଶ ପାଇଛି । ଅଭିଯୁକ୍ତ ସ୍ୱାମୀ ହୃଷିକେଶ ସାହୁକୁ ଆଜୀବନ ସଶ୍ରମ କାରାଦଣ୍ଡ ଶୁଣାଇଛନ୍ତି ଏଡିଜେ ଦେବଦତ୍ତ ପଟ୍ଟନାୟକ। ଏହି ମାମଲାରେ ଥିବା ଅନ୍ୟ ଅଭିଯୁକ୍ତ ଯଥା ହୃଷିକେଶର ଭାଇ ତ୍ରିନାଥ ସାହୁ, ବଡ଼ ଭଉଣୀ ବିଜୟ ଲକ୍ଷ୍ମୀ ସାହୁ ଏବଂ ସାନ ଭଉଣୀ ନମିତା ସାହୁ ସାକ୍ଷ୍ୟ ପ୍ରମାଣ ଅଭାବରୁ କୋର୍ଟ ତାଙ୍କୁ ନିର୍ଦ୍ଦୋସରେ ଖଲାସ କରିଛନ୍ତି । ଅଭିଯୁକ୍ତ ମାନଙ୍କ ମା' ଜାଡ଼ି ସାହୁ ମଧ୍ୟ ଏହି ମାମଲାରେ ସମ୍ପୃକ୍ତ ଥିଲେ ମଧ୍ୟ ତାଙ୍କର ମୃତ୍ୟୁ ହୋଇସାରିଛି ।
ଅଭିଯୁକ୍ତ ମାନଙ୍କ ପାଇଁ ଓକିଲ ବ୍ରହ୍ମାନନ୍ଦ ପଟ୍ଟନାୟକ ଏବଂ ସରକାରଙ୍କ ପକ୍ଷରୁ ରାଜେନ୍ଦ୍ର ପ୍ରସାଦ ସାହୁ ମାମଲା ପରିଚାଳନା କରିଥିଲେ । ମାମଲାରୁ ଜଣାଯାଏ ୨୦୨୦ ଜାନୁୟାରୀ ୨୭ ତାରିଖରେ ସନ୍ଧ୍ୟାରାଣୀ ସାହୁଙ୍କୁୁ ହତ୍ୟା କରାଯାଇଥିବା ନେଇ ତାଙ୍କ ଭଉଣୀ ଗୀତା ସାହୁ ପଦ୍ମପୁର ଥାନାରେ ଅଭିଯୋଗ କରିଥିଲେ । ସନ୍ଧ୍ୟାଙ୍କ ସ୍ୱାମୀ ହୃଷିକେଶ ଏକ ଟାଙ୍ଗିଆରେ ତାଙ୍କୁ ହତ୍ୟା କରିଥିଲେ ବୋଲି ସେ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପଦ୍ମପୁର ପୋଲିସ ହୃଷିକେଶଙ୍କ ସମେତ ୫ ଜଣଙ୍କ ନାମରେ ଦଫ। ୪୯୮(କ),୩୦୨,୩୦୪(କ), ୩୪ ଆଇପିସି ସହ ୪ ଡିପି ଅଧିନରେ ମାମଲା ରୁଜୁ କରିଥିଲେ । ଏହି ଘଟଣା ପରେ ମୂଖ୍ୟ ଅଭିଯୁକ୍ତ ହୃଷିକେଶ ସାହୁ ଫେରାର ହୋଇଯାଇଥିଲା । ପୋଲିସ ଅନ୍ୟ ଅଭିଯୁକ୍ତ ମାନଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ।
୨୦୨୦ ଅକ୍ଟୋବର ୨୦ ତାରିଖରେ ହୃଷିକେଶକୁ ପୋଲିସ ଗିରଫ କରିଥିଲା । ମୋଟ ୫ ଜଣଙ୍କ ନାଁରେ ମାମଲା ରୁଜୁ ହୋଇଥିଲା । ୨୦୨୦ ମେ ୨୨ରେ ପୋଲିସ ଚାର୍ଜ ସିଟ୍ ଦାଖଲ କରିଥିଲେ । ବିଚାର ସମୟରେ ୧୮ ଜଣଙ୍କ ସାକ୍ଷ୍ୟ ଗ୍ରହଣ ହୋଇଥିଲା । ହୃଷିକେଶକୁ ମଧ୍ୟବର୍ତ୍ତି କାଳୀନ ଜାମିନ ମିଳିଥିଲା । ଜାମିନର ଅବଧି ସରିବା ପରେ ସେ ଗୁଣପୁର ଜେଲ ହାଜତରେ ବିଚାରଧିନ କଏଦୀ ଭାବରେ ରହି ଆସୁଥିଲା । ତେବେ ଅନ୍ୟ ଅଭିଯୁକ୍ତ ମାନେ ନିୟମିତ ଜାମିନ ପାଇଥିଲେ । ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତି କରି ଏଡିଜେ ଦେବଦତ୍ତ ପଟ୍ଟନାୟକ ଅଭିଯୁକ୍ତ ହୃଷିକେଶକୁ ଦୋଷୀ ସାବ୍ୟସ୍ତ କରିବା ସହ ଅନ୍ୟ ମାନଙ୍କୁ ଖଲାସ କରିଥିଲେ । ହୃଷିକେଶଙ୍କ ନାମରେ କେବଳ ୩୦୨ ରେ କୋର୍ଟ ଦୋଷି ସାବ୍ୟସ୍ତ କରିଥିଲେ । ଅନ୍ୟ ମାମଲାରେ ସାକ୍ଷ୍ୟ ପ୍ରମାଣ ଅଭାବରୁ ଅନ୍ୟମାନେ ଖଲାସ ହୋଇଥିଲେ । ହତ୍ୟା ମାମଲାରେ ହୃଷିକେଶଙ୍କୁ ଆଜୀବନ ସଶ୍ରମ କାରାଦଣ୍ଡ ସହ ୫୦ ହଜାର ଟଙ୍କା ଜରିମାନା ଲାଗୁ କରାଯାଇଛି।
