ନୂଆଦିଲ୍ଲୀ: ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ସୋସିଆଲ ମିଡିଆ ଆକାଉଣ୍ଟ X ବନ୍ଦ କରିବା ପାଇଁ ଏକ ଆବେଦନ ଉପରେ ପାକିସ୍ତାନର ଏକ ହାଇକୋର୍ଟ ନଭେମ୍ବର ୪ ତାରିଖ ପାଇଁ ଶୁଣାଣି ତାରିଖ ଧାର୍ଯ୍ୟ କରିଛନ୍ତି। ଏହି ଶୁଣାଣି ନଭେମ୍ବର ୪ ତାରିଖରେ ହେବ। ସୂଚନାଥାଉକି, ପୂର୍ବତନ କ୍ରିକେଟର ତଥା ରାଜନେତା ଇମ୍ରାନ ଖାନ ଏବେ ଅନେକ ମାମଲାରେ ଗତ ଦୁଇ ବର୍ଷ ଧରି ଜେଲରେ ଅଛନ୍ତି।
ଇସଲାମାବାଦ ହାଇକୋର୍ଟ (IHC) ଦ୍ୱାରା ଜାରି କରାଯାଇଥିବା କାରଣ ସୂଚୀ ଅନୁଯାୟୀ, ବିଚାରପତି ଅରବାବ ମହମ୍ମଦ ତାହିର ଆବେଦନର ଶୁଣାଣି କରିବେ। କୋର୍ଟ ପୂର୍ବରୁ ପାକିସ୍ତାନ ତେହେରିକ୍-ଏ-ଇନସାଫ (PTI) ପ୍ରତିଷ୍ଠାତା ଇମ୍ରାନ ଖାନ, ଜାତୀୟ ସାଇବର ଅପରାଧ ସଂସ୍ଥା, ଜେଲ୍ ଅଧୀକ୍ଷକ ଏବଂ ଅନ୍ୟାନ୍ୟ ପ୍ରାସଙ୍ଗିକ ଅଧିକାରୀ ମାନଙ୍କୁ ନୋଟିସ୍ ଜାରି କରି ସେମାନଙ୍କର ଲିଖିତ ଜବାବ ମାଗିଛନ୍ତି।
ଏହି ଆବେଦନକୁ ଜଣେ ନାଗରିକ ବାରିଷ୍ଟର ଜାଫରୁଲ୍ଲାଙ୍କ ମାଧ୍ୟମରେ ଦାଖଲ କରିଥିଲେ। ଆବେଦନରେ ଦାବି କରାଯାଇଛି ଯେ, ଜେଲରେ ଥିବା ସମୟରେ ଇମ୍ରାନ ଖାନ ତାଙ୍କ X ଆକାଉଣ୍ଟରୁ "ଅବୈଧ ଏବଂ ଉତ୍ତେଜନାପୂର୍ଣ୍ଣ ବାର୍ତ୍ତା" ପ୍ରସାର କରୁଛନ୍ତି, ଯାହା ସାଧାରଣ ଅଶାନ୍ତି ସୃଷ୍ଟି କରିପାରେ ଏବଂ ଆଇନ ଶୃଙ୍ଖଳାକୁ ପ୍ରଭାବିତ କରିପାରେ। ଆବେଦନକାରୀ କୋର୍ଟକୁ ଇମ୍ରାନ ଖାନଙ୍କ ଆକାଉଣ୍ଟରୁ ଏପରି ସମସ୍ତ ବାର୍ତ୍ତା ହଟାଇବାକୁ ଏବଂ ଭବିଷ୍ୟତରେ ଏପରି ବାର୍ତ୍ତା ପ୍ରସାରଣ ଉପରେ ପ୍ରତିବନ୍ଧକ ଲଗାଇବାକୁ ଦାବି କରିଛନ୍ତି।
