ନୂଆଦିଲ୍ଲୀ, ୨୩।୫: ଜରୁରୀ ଅବତରଣ କରିଥିଲା ଦିଲ୍ଲୀରୁ ଶ୍ରୀନଗର ଯାଉଥିବା ବିମାନ । ପ୍ରତିକୂଳ ପାଗ ଏବଂ କୂଆପଥର ମାଡ଼ ଯୋଗୁଁ ମଝି ଆକାଶରେ ବିମାନ ଟଳମଳ ହୋଇଥିଲା । ବଡ଼ ଦୁର୍ଘଟଣା ହେବାର ଆଶଙ୍କା ମଧ୍ୟ ଥିଲା । ବିମାନରେ ୨୨୭ ଜଣ ଯାତ୍ରୀ ଥିଲେ । ବିମାନ ହଠାତ୍ ଝଡ଼ତୋଫାନର ସମ୍ମୁଖୀନ ହେବାରୁ ଦିଲ୍ଲୀ-ଶ୍ରୀନଗର ବିମାନ ପରିଚାଳନା କରୁଥିବା ଜଣେ ଇଣ୍ଡିଗୋ ପାଇଲଟ୍ ପାକିସ୍ତାନ ଏୟାରସ୍ପେସ୍କୁ ବ୍ୟବହାର କରିବା ପାଇଁ ଲାହୋର ଏୟାର ଟ୍ରାଫିକ୍ କଣ୍ଟ୍ରୋଲକୁ ଅନୁମତି ମାଗିଥିଲେ । ପାକିସ୍ତାନ ଆକାଶପଥ ବ୍ୟବାହର କରି ଝଡ଼ ବର୍ଷାକୁ ଏଡ଼ାଇହେବ ବୋଲି କହିଥିଲେ । କିନ୍ତୁ, ଏ ଅନୁରୋଧକୁ ପ୍ରତ୍ୟାଖ୍ୟାନ କରିଥିଲା ପାକିସ୍ତାନ । ଗୁରୁବାର ଏନେଇ ପିଟିଆଇ ସୂଚନା ଦେଇଛି । ପୂରା ଘଟଣା ନେଇ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ତଦନ୍ତ କରୁଛି ।
ଏହି ବିମାନରେ ତୃଣମୂଳ କଂଗ୍ରେସ ସାଂସଦ ସାଗରିକା ଘୋଷଙ୍କ ସମେତ ୨୨୦ ରୁ ଅଧିକ ଯାତ୍ରୀ ଥିଲେ । ଅନୁମତି ନ ମିଳିବାରୁ, ବିମାନଟି ଏହାର ଉଡ଼ାଣ ପଥ ବଜାୟ ରଖିଥିଲା । ପାକିସ୍ତାନର ପ୍ରତ୍ୟାଖ୍ୟାନ ପରେ ପାଇଲଟ୍ ଶ୍ରୀନଗର ବିମାନବନ୍ଦରରେ ବିମାନ ଟ୍ରାଫିକ୍ ନିୟନ୍ତ୍ରଣକୁ 'ଜରୁରୀକାଳୀନ' ସୂଚନା ଦେଇଥିଲେ । କ୍ୟାବିନ କ୍ରୁ ନିର୍ଦ୍ଧାରିତ ପ୍ରୋଟୋକଲ ପାଳନ କରିଥିଲେ ଏବଂ ବୁଧବାର ବିମାନଟି ଶ୍ରୀନଗରରେ ସୁରକ୍ଷିତ ଭାବରେ ଅବତରଣ କରିଥିଲା । ଭାରତୀୟ ବିମାନବନ୍ଦର କର୍ତ୍ତୃପକ୍ଷର ଜଣେ ଅଧିକାରୀ କହିଛନ୍ତି ଯେ, ବିମାନଟି ସନ୍ଧ୍ୟା ୬ଟା ୩୦ରେ ଶ୍ରୀନଗରରେ ସୁରକ୍ଷିତ ଭାବରେ ଅବତରଣ କରିଥିଲା । ବିମାନ ଅବତରଣ କରିବା ପରେ ବିମାନବନ୍ଦର ଦଳ ଯାତ୍ରୀଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିଥିଲେ । ବର୍ତ୍ତମାନ ବିମାନର ଆବଶ୍ୟକୀୟ ଯାଞ୍ଚ ହେବା ପରେ ରକ୍ଷଣାବେକ୍ଷଣ ଦାୟିତ୍ୱ ବୁଝାଯିବ ।
୨୨ ଏପ୍ରିଲ୍ ୨୦୨୫ରେ ପହଲଗାମ୍ ଆତଙ୍କବାଦୀ ଆକ୍ରମଣପେ ଅତି କମ୍ରେ ୨୬ ଜଣ ନିରୀହ ଲୋକଙ୍କ ମୃତ୍ୟୁ ହୋଇଥିଲା । ଅପରେସନ୍ ସିନ୍ଦୂର ଜରିଆରେ ଯାହାର ପଲଟା ଜବାବ ଦେଇଥିଲା ଭାରତ । ଯାହା ପରେ ଭାରତ ଏବଂ ପାକିସ୍ତାନ ମଧ୍ୟରେ ବୃଦ୍ଧି ପାଇଛି ଉତ୍ତେଜନା । ଯାହା ପରେ ପାକିସ୍ତାନ ଭାରତୀୟ ବିମାନ କମ୍ପାନୀ ପାଇଁ ତାର ଏୟାରସ୍ପେସ୍ ବନ୍ଦ କରିଦେଇଛି । ଏହାର ପ୍ରତି ଜବାବରେ ଭାରତ ମଧ୍ୟ ପାକିସ୍ତାନୀ ବିମାନ କମ୍ପାନୀ ପାଇଁ ତାର ଏୟାରସ୍ପେସ୍ ବନ୍ଦ କରିଦେଇଛି ।
