ନରସିଂହପୁର,୨୦/୦୩ (ଅଜୟ କୁମାର ପଣ୍ଡା): ଖରା ବଢ଼ିବା ସହ ଖୋଜା ପଡ଼ିଲା ଓଡ଼ିଆ ଘରର ସବୁଠୁ ପ୍ରିୟ ଖାଦ୍ୟ ପଖାଳ । ଓଡ଼ିଆଙ୍କ ଆରାଧ୍ୟ ଦେବତା ମହାପ୍ରଭୁ ଜଗନ୍ନାଥଙ୍କର ମଧ୍ୟ ଅତିପ୍ରିୟ ପଖାଳ । ଏଥିପାଇଁ ପୁରୀ ଶ୍ରୀମନ୍ଦିରରେ ମଧ୍ୟ ପଖାଳ ଭୋଗ ଲାଗି କରାଯାଇଥାଏ । ଏବେ ଓଡିଶା ସମେତ ପଶ୍ଚିମବଙ୍ଗ, ଆସାମ, ତାମିଲନାଡୁ, ଝାଡ଼ଖଣ୍ଡ ଏବଂ ଛତିଶଗଡ଼ ଆଦି ରାଜ୍ୟ ସମେତ ନେପାଳ ଓ ମିଆଁମାର ଭଳି ପଡ଼ୋଶୀ ଦେଶରେ ପଖାଳର ଲୋକପ୍ରିୟତା ବୃଦ୍ଧି ପାଇବାରେ ଲାଗିଲାଣି । ଓଡ଼ିଶାରେ ଆମେ ପଖାଳ ଭାତ କହୁଥିବା ବେଳେ ପଶ୍ଚିମବଙ୍ଗରେ ଏହାକୁ ପନ୍ତ, ଛତିଶଗଡ଼ରେ ବାରଭାତ, ଝାଡ଼ଖଣ୍ଡରେ ପାନିଭାତ, ଆସାମରେ ପାଇତା ଭାତ କୁହାଯାଏ ।
ପୁରୀ ଶ୍ରୀମନ୍ଦିରରେ ମହାପ୍ରଭୁ ଜଗନ୍ନାଥଙ୍କ ନିକଟରେ ଘିଅ ପଖାଳ, ଦହି ପଖାଳ ଆଦି ଲାଗି ହୋଇଥାଏ । ପଖାଳ ଗରିବ ଲୋକଙ୍କର ଏକ ପ୍ରମୁଖ ଖାଦ୍ୟ । ପଖରେ ପଖାଳ କଂସା ଥିଲେ ଲଙ୍କା, ଲୁଣରେ ମଧ୍ୟ କାମ ଚଳିଯିବ ବୋଲି ଅତି ଆନନ୍ଦରେ କହିଥାନ୍ତି ଓଡ଼ିଆ ଲୋକେ । ଏହା ଦ୍ୱାରା ଅନ୍ନ ନଷ୍ଟ ହୋଇ ନଥାଏ । ଓଡ଼ିଆ ଘରେ ଅନ୍ନକୁ ସମ୍ମାନ ଦେବାର ଏହା ଏକ ଅତୁଳନୀୟ ପରମ୍ପରା । ଏହାର ତୋରାଣିରେ ବହୁ ସ୍ୱାସ୍ଥ୍ୟକର ଉପାଦାନ ରହିଥିବା ସ୍ୱାସ୍ଥ୍ୟ ବିଶେଷଜ୍ଞ ପ୍ରକାଶ କରିଛନ୍ତି । ସମଗ୍ର ବିଶ୍ୱରେ ପଖାଳର ଲୋକପ୍ରୟିତା ବୃଦ୍ଧି କରିବା ଉଦ୍ଦେଶ୍ୟରେ ମାର୍ଚ୍ଚ ୨୦ ତାରିଖକୁ ପଖାଳ ଦିବସ ଭାବେ ପାଳନ କରାଯାଉଛି ।
ଭାତ ଗୋଟିଏ ରାତି ପାଣିରେ ରହିବା ଦ୍ୱାରା ସେଥିରେ ରାସାୟନିକ ପକ୍ରିୟା ଘଟି ଏହାକୁ ସ୍ୱାଦିଷ୍ଟ କରିବା ସହ ଏହାର ତୋରାଣି ଗୁ୍ଲକୋଜ୍ ଭଳି କାର୍ଯ୍ୟ ପରେ । ଫଳରେ ଖରାଦିନେ ଶରୀରକୁ ଆରାମ ମିଳେ ଓ ଆମକୁ ହାଲିଆ ନାହିଁ । ପଖାଳ କଂସାରେ ଦହି, ଆମ୍ବକସିଆ ଅଦା, ପୋଦିନା ପତ୍ର, ଲଙ୍କା ପଡ଼ିଲେ ଏହାର ସ୍ୱାଦ ଅନନ୍ୟ ହୋଇଥାଏ । ସାଙ୍ଗରେ ରସୁଣ ସହ ଦେଶୀ ପିଆଜ, ଶାଗ ଭଜା, ବଡ଼ିଚୁରା, ଆଳୁ ଚକଟା ଆଦି ଥିଲେ ଓଡ଼ିଆଙ୍କ ଭୋକ ବଢ଼ିଯାଇଥାଏ । ଆମିଷ ଖିଆ ଲୋକଙ୍କ ପାଇଁ ପଖାଳ ସାଙ୍ଗକୁ ମାଛଭଜା, ସୁକୁଆ ପୋଡ଼ା ଲୋଡ଼ା ପଡ଼ିଥାଏ ।
୨୦୧୫ ମସିହାରୁ ପ୍ରତିବର୍ଷ ମାର୍ଚ୍ଚ ମାସ ୨୦ ତାରିଖକୁ ସମଗ୍ର ରାଜ୍ୟରେ ପଖାଳ ଦିବସ ଭାବେ ପାଳନ କରାଯାଉଛି । ସେବେଠାରୁ ସମଗ୍ର ରାଜ୍ୟରେ ଗରିବଠାରୁ ଧନୀ, ଝୁମ୍ପୁଡ଼ ହାଟେଲ ଠାରୁ ପଞ୍ଚତାରକା ହୋଟେଲରେ ବିଭିନ୍ନ ବ୍ୟଞ୍ଜନ ସହ ପଖାଳ କଂସା ପ୍ରସ୍ତୁତ କରାଯାଉଛି । ଏବେ ପଖାଳ କେବଳ ଓଡ଼ିଆଙ୍କ ପ୍ରିୟ ଖାଦ୍ୟ ହୋଇରହି ନାହିଁ । ଏହାର ଚାହିଦା ଦେଶ ତଥା ବିଦେଶରେ ମଧ୍ୟ ବୃଦ୍ଧି ପାଇବାରେ ଲାଗିଲାଣି । ବିଗତ କିଛି ବର୍ଷ ହେଲା ଗାଁ ଗହଳିରେ ମଧ୍ୟ ଆନନ୍ଦ ଉଲ୍ଲାସ ମଧ୍ୟରେ ପଖାଳ ଦିବସ ପାଳନ କରାଯାଉଥିବା ଦେଖିବାକୁ ମିଳୁଛି।
