ନୂଆଦିଲ୍ଲୀ,୬।୧୨:ଆଡିଆଲା ଜେଲରେ ବନ୍ଦୀ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ପାଗଳ ଘୋଷଣା କରିଛି ପାକିସ୍ତାନ ସେନା। ସେନା ମୁଖପାତ୍ର ଏ ସମ୍ପର୍କରେ ଏକ ଆନୁଷ୍ଠାନିକ ବିବୃତ୍ତି ଜାରି କରି କହିଛନ୍ତି ଯେ ଇମ୍ରାନ ଖାନ ଏବେ ମାନସିକ ରୋଗୀ ହୋଇଯାଇଛନ୍ତି ଏବଂ ଦେଶଦ୍ରୋହୀଙ୍କ ଭାଷା କହୁଛନ୍ତି। ସେନା ଅଭିଯୋଗ କରିଛି ଯେ ଇମ୍ରାନ ଖାନ ଜେଲରୁ ସାଧାରଣ ଲୋକଙ୍କୁ ସେନା ବିରୋଧରେ ଉସକାଇବାକୁ ଚେଷ୍ଟା କରୁଛନ୍ତି,ଯାହାକୁ ଆଉ ବରଦାସ୍ତ କରାଯିବ ନାହିଁ। ସରକାର ଏବଂ ସେନାର ଏହି ପଦକ୍ଷେପ ଦେଶରେ ଏକ ନୂତନ ରାଜନୈତିକ ଅସ୍ଥିରତା ସୃଷ୍ଟି କରିଛି। ଏବେ ପ୍ରଶ୍ନ ହେଉଛି,ଇମ୍ରାନଙ୍କ ବିରୋଧରେ ପରବର୍ତ୍ତୀ ସମୟରେ କ'ଣ ହେବ?ଏବଂ ଏହା ତାଙ୍କ ସମର୍ଥକମାନଙ୍କ ଉପରେ କ'ଣ ପ୍ରଭାବ ପକାଇବ?
ସାକ୍ଷାତ ଉପରେ ଲାଗିବ କଟକଣା :
ପାକିସ୍ତାନର ସୂଚନା ମନ୍ତ୍ରୀ ଅତାଉଲ୍ଲାହ ତରାର ସ୍ପଷ୍ଟ ଭାବରେ କହିଛନ୍ତି,ଇମ୍ରାନ ଖାନଙ୍କୁ ଭେଟିବାକୁ କାହାକୁ ଅନୁମତି ଦିଆଯିବ ନାହିଁ। ଏହାର ଅର୍ଥ ହେଉଛି ଓକିଲ,ପରିବାର ଏବଂ ଦଳୀୟ ନେତାଙ୍କ ସମେତ ସମସ୍ତଙ୍କ ପ୍ରବେଶକୁ ଅବରୋଧ କରାଯିବ। ଇମ୍ରାନଙ୍କ କାର୍ଯ୍ୟକଳାପ ବିଷୟରେ ସୂଚନା ବାହାର ଦୁନିଆକୁ ପହଞ୍ଚିବା ପ୍ରାୟ ଅସମ୍ଭବ ହୋଇଯିବ। ଜେଲ ଭିତରର ପରିସ୍ଥିତି ବିଷୟରେ କାହାରି ସୂଚନା ପାଇବାର ସୁଯୋଗ ରହିବ ନାହିଁ। ଏହି ନିଷ୍ପତ୍ତି ଇମ୍ରାନ ଖାନଙ୍କରାଜନୈତିକ କାର୍ଯ୍ୟକଳାପକୁ ସମ୍ପୂର୍ଣ୍ଣ ଭାବରେ ବନ୍ଦ କରିବାର ଚେଷ୍ଟା ଭାବରେ ଦେଖାଯାଉଛି।
ଇମ୍ରାନ ଖାନଙ୍କ ସମର୍ଥକମାନେ ଆଉ ଏକାଠି ହୋଇପାରିବେ ନାହିଁ।
ପାକିସ୍ତାନ ସରକାର ଏବଂ ସେନାର ରଣନୀତିର ଦ୍ୱିତୀୟ ବଡ଼ ପଦକ୍ଷେପ ହେଉଛି ସାରା ଦେଶରେ ଇମ୍ରାନ ଖାନଙ୍କ ବିରୋଧରେ କୌଣସି ବଡ଼ ପ୍ରତିବାଦକୁ ରୋକିବା। ପିଟିଆଇ ସମର୍ଥକଙ୍କୁ ଦମନ କରିବା ଏବଂ ଯେକୌଣସି ରାଲି କିମ୍ବା ପ୍ରତିବାଦକୁ ରୋକିବା ପାଇଁ,ସୋସିଆଲ ମିଡିଆ ଏବଂ ଡିଜିଟାଲ୍ ପ୍ଲାଟଫର୍ମ ଉପରେ ନଜର ରଖାଯିବ ।ସହର ଗୁଡ଼ିକରେ ସୁରକ୍ଷା ବାହିନୀଙ୍କୁ ମୁତୟନ କରାଯିବ ଏବଂ ନେତାଙ୍କୁ ଅଟକ କିମ୍ବା ଗିରଫ କରାଯାଇପାରେ। ସରକାରଙ୍କ ଲକ୍ଷ୍ୟ ହେଉଛି ମେ ୯ତାରିଖରେ ହୋଇଥିବା ହିଂସାପୂର୍ଣ୍ଣ ପ୍ରତିବାଦକୁ ରୋକିବା।
ପିଟିଆଇ ସଂଗଠନ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ
ସେନା ଏବଂ ସରକାର ଏବେ ଇମ୍ରାନ ଖାନଙ୍କ ସହ ଜଡିତ ସଂଗଠନଗୁଡ଼ିକ ଉପରେ ସମ୍ପୂର୍ଣ୍ଣ କଟକଣା ଲଗାଇବାକୁ ପ୍ରସ୍ତୁତ ହେଉଛନ୍ତି। ଏଥିରେ ପିଟିଆଇର ମୁଖ୍ୟ ରାଜନୈତିକ ୟୁନିଟ୍,ଡିଜିଟାଲ୍ ଟିମ୍,ମିଡିଆ ସେଲ୍ ଏବଂ ପାଣ୍ଠିସହ ଗଠିତ ସଂଗଠନ ଅନ୍ତର୍ଭୁକ୍ତ ହୋଇପାରେ। ଏହି କଟକଣା ପରେ,ପିଟିଆଇର ରାଜନୈତିକ ଅସ୍ତିତ୍ୱ ପ୍ରାୟତଃ ଶେଷ ହୋଇପାରେ।
