ନୂଆଦିଲ୍ଲୀ,୬।୮: ସାରା ଦୁନିଆରଠାରୁ ସାହାଯ୍ୟର ଭରଷାରେ ଚାଲିଛି କାଙ୍ଗାଳ ପାକିସ୍ତାନ। ଏପରିକି ଇଣ୍ଟରନ୍ୟାସନାଲ ମନିଟରିଂ ଫଣ୍ଡ (ଆଇଏମଏଫ୍)ରୁ ୭ ବିଲିୟନ ଡଲାର(ପ୍ରାୟ ୫୮,୧୦୦ କୋଟି ଟଙ୍କା) ଲୋନ୍ ନେଇଛି। ବଦଳରେ ଆଇଏମଏଫର କିଛି ଟାର୍ଗେଟକୁ ତାକୁ ହାସଲ କରିବାର ଥିଲା। କିନ୍ତୁ ପାକିସ୍ତାନ ନିଜର ପ୍ରତିଶୃତି ପାଳନ କରିପାରିନି। ପାକିସ୍ତାନ ୫ଟିରୁ ତିନୋଟି ଲକ୍ଷ୍ୟ ହାସଲ କରିବାରେ ବିଫଳ ହୋଇଛି। ଏହାପରେ ବି ସେ ଆଇଏମ୍ଏଫ୍ରୁ ଆଗାମୀ କିସ୍ତିର ଆଶା ରଖିଛି। ଆଇଏମ୍ଏଫ୍ ସେପ୍ଟେମ୍ବର ମାସରେ ସମୀକ୍ଷା କରିବ।
‘ଦ ଏକ୍ସପ୍ରେସ୍ ଟ୍ରିବ୍ୟୁନ୍’ର ରିପୋର୍ଟ ଅନୁସାରେ, ପାକ୍ ଅର୍ଥମନ୍ତ୍ରଣାଳୟ ସୂଚନା ସାମନାକୁ ଆସିଛି। ପାକିସ୍ତାନ ଆଇଏମ୍ଏଫ୍ର ଯେଉଁ ତିନୋଟି ପ୍ରମୁଖ ଲକ୍ଷ୍ୟକୁ ପୂରଣ କରିବାରେ ବିଫଳ ରହିଛି। ତା ଭିତରୁ ପ୍ରଥମେ ଥିଲା ରାଜ୍ୟ ଗୁଡିକ ଠାରୁ୧.୨ ଟ୍ରିଲିୟନ୍ ସଞ୍ଚୟ କରିବ, ଯାହାକି ବଢୁଥିବା ଖର୍ଚ୍ଚର କାରଣରୁ ସମ୍ଭବ ହୋଇପାରିନି। ଦ୍ବିତୀୟଟି ହେଲା ଫେଡରାଲ ବୋର୍ଡ ଅଫ୍ ରେଭିନ୍ୟୁ (ଏଫ୍ବିଆର) ଦ୍ବାରା ଧାର୍ଯ୍ୟ କରାଯାଇଥିବା ୧୨.୩ ଟ୍ରିଲିୟନ୍ ମୋଟ ରାଜସ୍ବର ଲକ୍ଷ୍ୟ ହାସଲ ନକରି ପାରିବା। ଏହାଛଡା ପାକିସ୍ତାନ ଖୁଚୁରା ବେପାରୀଙ୍କଠାରୁ ଟ୍ୟାକ୍ସ ନେବା ପାଇଁ ଆରମ୍ଭ ହୋଇଥିଲା ‘ତାଜିର ଦୋସ୍ତ ସ୍କିମ୍’। ଏହା ଅନୁସାରେ ୫୦ ବିଲିୟନ ଅର୍ଥ ଆଦାୟରେ ମଧ୍ୟ ସମ୍ପୂର୍ଣ୍ଣ ବିଫଳ ହୋଇଥିଲା।
ରିପୋର୍ଟ ଅନୁସାରେ, ଅର୍ଥମନ୍ତ୍ରଣାଳୟ ପୁରା ବର୍ଷର ଖର୍ଚ୍ଚ ଉପରେ ନିୟନ୍ତ୍ରଣ ରଖିବାର ଚେଷ୍ଟା କରିଛି। କିନ୍ତୁ ଫେଡରାଲ ସରକାରଙ୍କ ନିୟନ୍ତ୍ରଣ ବାହାରେ ରାଜ୍ୟ ସରକାର ଆଇଏମ୍ଏଫ୍କୁ ଦେଇଥିବା ପ୍ରତିଶ୍ରୁତି ଅନୁସାରେ ୧.୨ ଟ୍ରିଲିୟନ ସଞ୍ଚୟ କରିପାରିନଥିଲା। ପାକିସ୍ତାନ ସରକାରଙ୍କୁ ଆଶା ରହିଛି କିଛି ଟାର୍ଗେଟ ପୂରଣ କରିନଥିଲେ ବି ଆଇଏମ୍ଏଫର ଆଗାମୀ ସମୀକ୍ଷାରେ ବିଶେଷ ଅସୁବିଧା ହେବନି। ସମୀକ୍ଷା ସେପ୍ଟେମ୍ବରରେ ହୋଇପାରେ ଓ ସେ ପର୍ଯ୍ୟନ୍ତ ପାକିସ୍ତାନକୁ ୧ ଅରବ ଡଲାରର ଆଗାମୀ କିସ୍ତି ମିଳିବାର ଆଶା ରହିଛି।
