ନୂଆଦିଲ୍ଲୀ,୧୯/୦୫: ଭାରତର ‘ଅପରେସନ ସିନ୍ଦୂର’ରେ ଧୂଳି ଚାଟିଥିବା ପାକିସ୍ତାନକୁ ଖାଦ୍ୟ ସଙ୍କଟ ଘେରିରହିଛି । ୨୦୨୪ ନଭେମ୍ବରରୁ ୨୦୨୫ ମାର୍ଚ୍ଚ ପର୍ଯ୍ୟନ୍ତ ଏହାର ଖାଦ୍ୟ ସମସ୍ୟା ଉତ୍କଟ ରହିଥିଲା । ଏହା ୧ କୋଟି ୧୦ ଲକ୍ଷ ଲୋକଙ୍କ ଉପରେ ପ୍ରଭାବ ପକାଇବ ବୋଲି ଜାତିସଂଘର ଖାଦ୍ୟ ଓ କୃଷି ସଂଗଠନ (ଫାଓ) ଏହାର ଏକ ସଦ୍ୟ ରିପୋର୍ଟରେ ଆଶଙ୍କା ପ୍ରକାଶ କରିଛି ।
ରିପୋର୍ଟ ଦର୍ଶାଇଛି ଯେ ପାକିସ୍ତାନର ବେଲୁଚିସ୍ତାନ, ସିନ୍ଧ ଓ ଖାଇବର ପଖ୍ତୁନଖ୍ୱା ପ୍ରଦେଶର ୬୮ଟି ବନ୍ୟା ପ୍ରଭାବିତ ଗ୍ରାମୀଣ ଜିଲ୍ଲାରେ ଖାଦ୍ୟ ସଙ୍କଟ ଜାରି ରହିଛି। ଏହାଯୋଗୁ ଲୋକମାନେ ଭୟଙ୍କର କୁପୋଷଣର ଶିକାର ହୋଇପାରନ୍ତି । ବିଶେଷକରି ଛୋଟ ପିଲାଙ୍କ ଉପରେ ଏହା ଅଧିକ ପ୍ରଭାବ ପକାଇବ, ଯାହା କି ଅତ୍ୟନ୍ତ ଚିନ୍ତାଜନକ ।
ରିପୋର୍ଟ ମୁତାବକ, ୧୭ ଲକ୍ଷ ଲୋକ ଏବେ ଜରୁରି ସ୍ଥିତିରେ ରହିଛନ୍ତି । ସେମାନଙ୍କ ପାଇଁ ଖାଦ୍ୟ ଉପଲବ୍ଧତା ସୁନିଶ୍ଚିତ ହେବା ଜରୁରି । ଆଗକୁ ପ୍ରତିକୂଳ ପାଣିପାଗ ସ୍ଥିତି ଲୋକଙ୍କ ଜୀବନ ଧାରଣ ଉପରେ ସାଙ୍ଘାତିକ ପ୍ରଭାବ ପକାଇବ । ୨୦୧୮ ଏବଂ ୨୦୨୪ ମଧ୍ୟରେ ବେଲୁଚିସ୍ତାନ ଓ ସିନ୍ଧରେ କୁପୋଷଣ ମାତ୍ରା ଅତ୍ୟଧିକ ରହିଥିଲା । ନିମ୍ନ ମାନର ପାଣ୍ଠି ଯୋଗାଣ ଖାଦ୍ୟ ସୁରକ୍ଷାକୁ ସୁନିଶ୍ଚିତ କରିପାରି ନ ଥିଲା । ୨୦୨୫ରେ ପାଣିପାଗ ସମ୍ପର୍କିତ ପ୍ରତିକୂଳ ପରିସ୍ଥିତି ଯୋଗୁ ସ୍ଥିତି ଆହୁରି ଭୟାନକ ପାଲଟିବ । ଫଳରେ ଆହୁରି ଅଧିକ ଲୋକ କୁପୋଷଣର ବଳୟକୁ ଆସିବେ ।
ଫାଓ ରିପୋର୍ଟ କହିଛି ଯେ ବେଲୁଚିସ୍ତାନ, ଖାଇବର ପଖ୍ତୁନ୍ଖ୍ୱା ଓ ସିନ୍ଧ ପ୍ରଦେଶର ପ୍ରାୟ ୪୩ ଜିଲ୍ଲାରେ ୧.୧୮ କୋଟି ବା ୩୨% ଲୋକ ଖାଦ୍ୟ ସଙ୍କଟର ସାମ୍ନା କରିବେ । ଏହି ସଂଖ୍ୟା ଦେଶର ମୋଟ ବିଶ୍ଳେଷିତ ଜନସଂଖ୍ୟାର ୨୨% । ଜଳବାୟୁ ପରିବର୍ତ୍ତନ ଓ ପ୍ରାକୃତିକ ବିପର୍ଯ୍ୟୟ କାରଣରୁ ଏହି ୩ଟି ପ୍ରଦେଶରେ ଜନଜୀବନ ବ୍ୟାପକ ମାତ୍ରାରେ ପ୍ରଭାବିତ ହୋଇଛି ।
୨୦୨୩ ମାର୍ଚ୍ଚରୁ ୨୦୨୪ ଜାନୁଆରୀ ମଧ୍ୟରେ ପ୍ରାୟ ୨୧ ଲକ୍ଷ ଶିଶୁ (୬ରୁ ୫୯ ମାସ) ତୀବ୍ର କୁପୋଷଣର ଶିକାର ହୋଇଥିଲେ । ଏହି ପିଲାମାନଙ୍କୁ ପର୍ଯ୍ୟାପ୍ତ ପୋଷଣ ମିଳିପାରି ନ ଥିଲା । ଏହି ସ୍ଥିତି ଶୀତଦିନେ ଆହୁରି ଖରାପ ହୋଇଯାଇଥିଲା, ଯେତେବେଳେ ଖାଦ୍ୟ ସାମଗ୍ରୀ ଦର ବଢ଼ିଥିଲା ଏବଂ ରୋଜଗାର ସୀମିତ ହୋଇଥିଲା । ଏଥିସହ ସିନ୍ଧ ଓ ଖାଇବର ପଖ୍ତୁନ୍ଖ୍ୱା ପ୍ରଦେଶରେ ଗର୍ଭବତୀ ଓ ସ୍ତନ୍ୟପାନ କରାଉଥିବା ମହିଳାମାନେ ମଧ୍ୟ ତୀବ୍ର କୁପୋଷଣର ଶିକାର ହୋଇଥିଲେ । ପରିଣାମସ୍ୱରୂପ ଅନେକ ସଂଖ୍ୟକ ପିଲା ହାରାହାରି ତୁଳନାରେ କମ୍ ଓଜନର ଜନ୍ମ ହୋଇଥିଲେ । ସେମାନଙ୍କ ସ୍ୱାସ୍ଥ୍ୟ ଓ ଭବିଷ୍ୟତ ଉପରେ ଏହା ଗମ୍ଭୀର ପ୍ରଭାବ ପକାଇବ ।
ଫାଓ ରିପୋର୍ଟ ଆହୁରି କହିଛି ଯେ ପାକିସ୍ତାନର ଅନେକ ଜିଲ୍ଲାରେ ହଇଜା, ତୀବ୍ର ଶ୍ୱାସକ୍ରିୟା ସଂକ୍ରମଣ ଓ ମ୍ୟାଲେରିଆ ଭଳି ରୋଗ ଉଚ୍ଚ ସ୍ତରରେ ବଢ଼ିଥିଲା । ଏହା ଶୀତଦିନେ ଅଧିକ ବଢ଼ିଯାଇଥିଲା । ୨୦୨୨ରେ ବିନାଶକାରୀ ମୌସୁମୀ ବନ୍ୟା କାରଣରୁ ଅନେକ ଅଞ୍ଚଳରେ ସ୍ୱଚ୍ଛ ପାନୀୟଜଳ ଓ ଶୌଚାଳୟ ଭଳି ସୁବିଧା ମିଳିବା ମୁସ୍କିଲ ହୋଇପଡ଼ିଥିଲା । ଖରାପ ସ୍ୱାସ୍ଥ୍ୟସେବା, ନିମ୍ନ ମାନର ସଡ଼କ ଓ ପର୍ଯ୍ୟାପ୍ତ ପାଣ୍ଠି ନ ମିଳିବା ଯୋଗୁ ପୋଷଣ ସେବା ସୀମିତ ହୋଇଯାଇଥିଲା । ସିନ୍ଧ, ବେଲୁଚିସ୍ତାନ ଓ ଖାଇବର ପଖତୁନଖ୍ୱା ପ୍ରଦେଶରେ ସ୍ଥିତି ଦିନକୁ ଦିନ ବିଗିଡ଼ିବାରେ ଲାଗିଛି ।
ରିପୋର୍ଟରେ ସ୍ପଷ୍ଟ କରାଯାଇଛି ଯେ ପାକିସ୍ତାନରେ ଖାଦ୍ୟ ଅସୁରକ୍ଷା ଏବଂ କୁପୋଷଣ କେବଳ ମାନବୀୟ ନୁହେଁ, ବରଂ ସାମାଜିକ ତଥା ଆର୍ଥିକ ଚ୍ୟାଲେଞ୍ଜ ପାଲଟିଛି । ଏ ସବୁକୁ ତତ୍କାଳ ନୀତି ଓ ବ୍ୟାବହାରିକ ହସ୍ତକ୍ଷେପ ଦ୍ୱାରା ସମାଧାନ କରାଯିବା ଜରୁରି । ପାକ୍ ସରକାର ଓ ଅନ୍ତର୍ଜାତୀୟ ଏଜେନ୍ସି ମିଳିତ ଭାବେ ଠୋସ ପଦକ୍ଷେପ ନେବା ଜରୁରି । ଖାଦ୍ୟ ସହାୟତା, ପୋଷଣ ସେବା, ସ୍ୱଚ୍ଛତା ଓ ଜଳବାୟୁ ସମାଧାନ ଦିଗରେ ଗୁରୁତ୍ୱ ଦିଆଯିବା ଉଚିତ ।
