ନୂଆଦିଲ୍ଲୀ,୧୪/୦୮: ପାକିସ୍ତାନର କରାଚୀରେ ସ୍ୱାଧୀନତା ଦିବସ ପାଳନ ସମୟରେ ଗୁଳିଚାଳନା। ଫଳରେ ଜଣେ ବରିଷ୍ଠ ନାଗରିକ ଏବଂ ଜଣେ ୮ ବର୍ଷର ଝିଅ ସମେତ ତିନି ଜଣଙ୍କର ମୃତ୍ୟୁ ହୋଇଛି। ସେହିପରି ୬୦ ରୁ ଅଧିକ ଲୋକ ଆହତ ହୋଇଛନ୍ତି। ଏକ ପାକିସ୍ତାନୀ ନ୍ୟୁଜ୍ ଚ୍ୟାନେଲ ଅନୁଯାୟୀ, ଏନେଇ ଜଣେ ଉଦ୍ଧାରକାରୀ ଅଧିକାରୀ ଏହି ସୂଚନା ଦେଇଛନ୍ତି।
ସୂଚନା ଅନୁଯାୟୀ, ସାରା ସହରରେ ଏଭଳି ଘଟଣା ଦେଖିବାକୁ ମିଳିଛି। ଆଜିଜାବାଦରେ ଆକାଶ ମାର୍ଗରେ ଗୁଳିଚାଳନା ଯୋଗୁଁ ଜଣେ ଯୁବତୀ ଆହତ ହୋଇଥିଲେ। ଏହା ବ୍ୟତୀତ କୋରାଙ୍ଗିରେ ଉତ୍ସବ ପାଳନ ସମୟରେ ଗୁଳିଚାଳନାରେ ଷ୍ଟିଫେନ ନାମକ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା। ଅଧିକାରୀଙ୍କ କହିବା ଅନୁଯାୟୀ, ଉତ୍ସବ ପାଳନ ସମୟରେ ହୋଇଥିବା ଗୁଳିଚାଳନାରେ ଡଜନ ଡଜନ ଲୋକ ଆହତ ହୋଇଛନ୍ତି। ଯାହାକୁ ନେଇ ଲୋକେ ଏହି ଘଟଣାକୁ ନିନ୍ଦା କରିବା ସହ ଏହାକୁ ଅସାବଧାନତା ଏବଂ ବିପଦପୂର୍ଣ୍ଣ ବୋଲି କହିଛନ୍ତି। ସେପଟେ ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି ଏବଂ ଆକାଶ ମାର୍ଗରୁ ଗୁଳି ଚଳାଇଥିବା ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଶ୍ୱାସନା ଦେଇଛି। ସେମାନଙ୍କୁ କୌଣସି ପରିସ୍ଥିତିରେ ଛଡ଼ାଯିବ ନାହିଁ।
ପାକିସ୍ତାନର ଏକ ଖବର ରିପୋର୍ଟ ଅନୁଯାୟୀ, ଜାନୁଆରୀ ମାସରେ କରାଚୀରେ ହୋଇଥିବା ଗୁଳିକାଣ୍ଡରେ ପାଞ୍ଚ ଜଣ ମହିଳାଙ୍କ ସମେତ ଅତି କମରେ ୪୨ ଜଣ ପ୍ରାଣ ହରାଇଛନ୍ତି। ଏହା ବ୍ୟତୀତ ୨୩୩ ଜଣ ଆହତ ହୋଇଛନ୍ତି। ପୁଲିସ ଅଧିକାରୀମାନେ କହିଛନ୍ତି ଯେ ଏହି ଘଟଣାଗୁଡ଼ିକ ପାଇଁ ଅନେକ କାରଣ ଦାୟୀ, ଯେପରିକି ମତଭେଦ, ବ୍ୟକ୍ତିଗତ ଶତ୍ରୁତା ଏବଂ ଡକାୟତି ପ୍ରୟାସକୁ ବିଫଳ କରିବା।ତେବେ ଜାନୁଆରୀ ଆରମ୍ଭରୁ କରାଚୀରେ ସଡ଼କ ଦୁର୍ଘଟଣା, ଡକାୟତି ପ୍ରତିବାଦ ଏବଂ ଆକାଶମାର୍ଗରେ ଗୁଳିଚାଳନା ଯୋଗୁଁ ମୃତ୍ୟୁ ସଂଖ୍ୟା ନିରନ୍ତର ବୃଦ୍ଧି ପାଇଛି।
