ନୂଆଦିଲ୍ଲୀ: ଗତ କିଛି ବର୍ଷ ଧରି ପାକିସ୍ତାନରେ ଆତଙ୍କବାଦୀ ଘଟଣା ବୃଦ୍ଧି ପାଇବାରେ ଲାଗିଛି । ଏବେ ପୁଣି ଥରେ ଏଠାରେ ଏପରି ଏକ ଘଟଣା ଘଟିଛି, ଯାହା ଉପରେ ଏବେ ସାରା ବିଶ୍ୱର ନଜର ରହିଛି। ପାକିସ୍ତାନରେ ଏକ ଟ୍ରେନ୍ ଅପହରଣ କରାଯାଇଛି। ପାକିସ୍ତାନର ବାଲୁଚ୍ ଲିବରେସନ୍ ଆର୍ମି (BLA) ଏହି ଆତଙ୍କବାଦୀ ଘଟଣା ପାଇଁ ନିଜକୁ ଦାୟୀ କରିଛି। ସୂଚନା ଅନୁଯାୟୀ, BLA ଜାଫର ଏକ୍ସପ୍ରେସ୍ ଟ୍ରେନ୍‌କୁ ଅପହରଣ କରିଛି ଏବଂ ଏଥିରେ ଥିବା ପ୍ରାୟ ୫ଶହ ଜଣ ଯାତ୍ରୀଙ୍କୁ ବନ୍ଧକ ରଖିଛି।

କୁହାଯାଉଛି ଯେ ଏହି ଟ୍ରେନରେ ସେନା ଏବଂ ପାକିସ୍ତାନ ଗୁଇନ୍ଦା ସଂସ୍ଥାର ଅନେକ ଅଧିକାରୀ ମଧ୍ୟ ଯାତ୍ରା କରୁଥିଲେ, ଯେଉଁମାନେ ଏବେ ବାଲୁଚ୍ ଲିବରେସନ୍ ଆର୍ମିର ହେପାଜତରେ ଅଛନ୍ତି। ଏପରି ଆତଙ୍କବାଦୀ ଘଟଣା ଗୁଡ଼ିକର ମୁକାବିଲା କରିବା ପାଇଁ, ପ୍ରତ୍ୟେକ ଦେଶରେ ଏକ ସ୍ୱତନ୍ତ୍ର ବାହିନୀ ରହିଛି, ଯାହା ବିମାନ ଅପହରଣ ଭଳି ଆତଙ୍କବାଦୀ ଘଟଣା ଗୁଡ଼ିକର ମୁକାବିଲା କରିବାରେ ବିଶେଷଜ୍ଞ। ଏବେ ପ୍ରଶ୍ନ ହେଉଛି ପାକିସ୍ତାନରେ ଆତଙ୍କବାଦୀ ଘଟଣା ସମୟରେ କେଉଁ ସ୍ୱତନ୍ତ୍ର ବାହିନୀକୁ ପଠାଯାଏ ?  ଏଠାରେ ସବୁଠାରୁ ଘାତକ କମାଣ୍ଡୋ ଫୋର୍ସ କେଉଁଟି ?...

ଭାରତରେ ବଡ ବଡ ଆତଙ୍କବାଦୀ ଘଟଣାର ମୁକାବିଲା କରିବା ପାଇଁ ଜାତୀୟ ସୁରକ୍ଷା ଗାର୍ଡ (NSG) ସ୍ଥାପନା କରାଯାଇଛି। NSGରେ ଅନ୍ତର୍ଭୁକ୍ତ କମାଣ୍ଡୋ ମାନଙ୍କୁ ସ୍ୱତନ୍ତ୍ର ପରିସ୍ଥିତିର ମୁକାବିଲା କରିବା ପାଇଁ ତାଲିମ ଦିଆଯାଇଥାଏ ଏବଂ ଏହି କମାଣ୍ଡୋ ମାନେ ଆତଙ୍କବାଦୀ ଆକ୍ରମଣର ଶୀଘ୍ର ଜବାବ ଦିଅନ୍ତି। ଏହି କମାଣ୍ଡୋ ମାନଙ୍କ ତାଲିମରେ ଅପହରଣ ପରିସ୍ଥିତିର ମୁକାବିଲା କରିବା ମଧ୍ୟ ଅନ୍ତର୍ଭୁକ୍ତ ରହିଥାଏ ।ଏବେ ଆମେ ଏଠାରେ ଆପଣଙ୍କୁ ଏକ ଘଟଣା ବାବଦରେ ମନେ ପକାଇ ଦେବାକୁ ଚାହିଁବୁ, ଯାହାକି ମୁମ୍ବାଇରେ ହୋଇଥିବା ତାଜ ଆକ୍ରମଣ… ଏହି ସମୟରେ, ଏହି NSG କମାଣ୍ଡୋ ମାନଙ୍କୁ ପଠାଯାଇଥିଲା, ଯେଉଁମାନେ ଭୟଙ୍କର ଆତଙ୍କବାଦୀ ମାନଙ୍କୁ ପରାସ୍ତ କରିଥିଲେ। 

ଭାରତରେ NSG ପରି, ପାକିସ୍ତାନରେ ମଧ୍ୟ ସ୍ୱତନ୍ତ୍ର ଅପରେସନ ପାଇଁ ଏକ କମାଣ୍ଡୋ ଫୋର୍ସ ଅଛି। ଏହି କମାଣ୍ଡୋ ବାହିନୀର ନାମ ହେଉଛି ସ୍ପେଶାଲ୍ ସର୍ଭିସ୍ ଗ୍ରୁପ୍ (SSG)। SSG କମାଣ୍ଡୋ ମାନଙ୍କ ତାଲିମ ମଧ୍ୟ ବହୁତ ବିପଜ୍ଜନକ ଏବଂ ଏହି କମାଣ୍ଡୋ ମାନଙ୍କୁ ସ୍ୱତନ୍ତ୍ର ଅପରେସନ ପାଇଁ ପ୍ରସ୍ତୁତ କରାଯାଇଥାଏ। ଏହି କମାଣ୍ଡୋ ମାନେ ଭିଆଇପି ଅତିଥି ମାନଙ୍କୁ ସୁରକ୍ଷା ଦେବା ଏବଂ ଆତଙ୍କବାଦୀ ଆକ୍ରମଣର ମୁକାବିଲା କରିବାରେ ବିଶେଷଜ୍ଞ। ଏହା ବ୍ୟତୀତ, ଏହି ପାକିସ୍ତାନୀ ବାହିନୀକୁ ଆଧୁନିକ ଅସ୍ତ୍ରଶସ୍ତ୍ର ବ୍ୟବହାର କରିବା ସହିତ ଅପହରଣ ଭଳି ଘଟଣାର ମୁକାବିଲା କରିବା ପାଇଁ ମଧ୍ୟ ତାଲିମ ଦିଆଯାଇଛି।

ପାକିସ୍ତାନର ସ୍ପେଶାଲ୍ ସର୍ଭିସ୍ ଗ୍ରୁପ୍‌ର ତାଲିମ ବହୁତ ବିପଦପୂର୍ଣ୍ଣ ଏବଂ ଏହା ୯ ମାସ ପର୍ଯ୍ୟନ୍ତ ଚାଲିଥାଏ। SSGର ଡ୍ରପ୍ ଆଉଟ୍ ହାର ୮୦ ରୁ ୯୦ ପ୍ରତିଶତ। ଏହାର ଅର୍ଥ ହେଉଛି ୧୦୦ ଜଣରୁ ୮୦-୯୦ ଜଣ ତାଲିମ ସମୟରେ ହାର ମାନିଯାଆନ୍ତି ଏବଂ ଏହି ସ୍ୱତନ୍ତ୍ର ବାହିନୀର ଅଂଶ ହେବାରୁ ଦୂରେଇ ରହନ୍ତି। ଏହି କମାଣ୍ଡୋ ମାନଙ୍କୁ ପ୍ରତ୍ୟେକ ପରିସ୍ଥିତି ପାଇଁ ଶାରୀରିକ ଏବଂ ମାନସିକ ଭାବରେ ପ୍ରସ୍ତୁତ କରାଯାଇଥାଏ ।