ନୂଆଦିଲ୍ଲୀ,୨୯/୦୬: ପହଲଗାମ୍ ଆତଙ୍କୀ ଆକ୍ରମଣର ଜବାବରେ ଗତ ମେ ମାସରେ ‘ଅପରେସନ୍ ସିନ୍ଦୂର’ରେ ଭାରତୀୟ ସେନା ପାକିସ୍ତାନ ଓ ପିଓକେରେ ଥିବା ଆତଙ୍କୀ କ୍ୟାମ୍ପ ଧ୍ୱଂସ କରିଥିଲା । ଏବେ ପାକିସ୍ତାନ ସେହି କ୍ୟାମ୍ପଗୁଡିକୁ ପୁଣି ପ୍ରତିଷ୍ଠା କରିବାକୁ ଜୋର୍ସୋରରେ ଉଦ୍ୟମ କରୁଛି । ଦେଶର ସେନା, ଗୁଇନ୍ଦା ଏଜେନ୍ସି ଆଇଏସ୍ଆଇ ଓ ସରକାର ଏଥିଲାଗି ମୋଟାଅଙ୍କର ପାଣ୍ଠି ଓ ପୂର୍ଣ୍ଣ ସମର୍ଥନ ଯୋଗାଇ ଦେଉଛନ୍ତି । ବିଶେଷକରି ପିଓକେ ଓ ତାର ଆଖପାଖ ଅଞ୍ଚଳରେ ଏହି ଆତଙ୍କୀ କ୍ୟାମ୍ପ ପ୍ରତିଷ୍ଠା ଲାଗି ସକ୍ରିୟ ଭାବେ କାର୍ଯ୍ୟ ଚାଲିଛି ।
ମେ ୭ରେ ପାକିସ୍ତାନ ଓ ପିଓକେରେ ଥିବା ୯ଟି ଆତଙ୍କୀ ଆଡ୍ଡା ଉପରେ ପ୍ରିସିସନ୍ (ଠିକ୍) ଆକ୍ରମଣ କରିଥିଲା ଭାରତୀୟ ସେନା । ସେହି ସମୟରେ ୩ଟି ପ୍ରମୁଖ ଆତଙ୍କୀ ସଂଗଠନ ଜୈସ୍ ଇ-ମହମ୍ମଦ, ଲସ୍କର-ଇ-ତାଇବା ଓ ହିଜବୁଲ୍ ମୁଜାହିଦ୍ଦିନ୍ର ଆତଙ୍କୀ ଭିତ୍ତିଭୂମିକୁ ଟାର୍ଗେଟ୍ କରାଯାଇଥିଲା । ଏପରିକି ଭାରତୀୟ ସେନାର ଆକ୍ରମଣରେ ବହାବଳପୁରସ୍ଥିତ ଜୈସ୍ର ମୁଖ୍ୟାଳୟ ନଷ୍ଟ ହୋଇଥିଲା । ଏହାପରେ ପାକିସ୍ତାନ ଏବେ ସେହି ସବୁ ଆତଙ୍କୀ କ୍ୟାମ୍ପର ପୁନଃ ନିର୍ମାଣ ଲାଗି ଉଦ୍ୟମ କରୁଛି ।
ଭାରତୀୟ ଗୁଇନ୍ଦା ଏଜେନ୍ସି ଅନୁସାରେ, ଏହି ଆତଙ୍କୀ କ୍ୟାମ୍ପଗୁଡ଼ିକ ଅତ୍ୟାଧୁନିକ ଟେକ୍ନୋଲୋଜିରେ ନିର୍ମାଣ ହେଉଛି । ପାକିସ୍ତାନର ଆତଙ୍କୀ ସଂଗଠନଗୁଡିକ ଆଇଏସ୍ଆଇ ସହିତ ମିଶି ନିୟନ୍ତ୍ରଣରେଖା(ଏଲଓସି) ନିକଟରେ ଘଞ୍ଚ ଜଙ୍ଗଲରେ ଛୋଟ ଛୋଟ ହାଇଟେକ୍ କ୍ୟାମ୍ପ ପ୍ରତିଷ୍ଠା କରିବାକୁ ଉଦ୍ୟମ କରୁଛନ୍ତି । ସର୍ଭିଲାନ୍ସ ଏବଂ ଏୟାରଷ୍ଟ୍ରାଇକ୍କୁ ଏଡ଼ାଇବା ଏହି ପଦକ୍ଷେପ ପଛର ଉଦ୍ଦେଶ୍ୟ । ପୁନି, ପୁଟୱାଲ, ତାଇପୁ ପୋଷ୍ଟ, ଜମିଲା ପୋଷ୍ଟ, ଉମ୍ରାନୱାଲି, ଚପରାର, ଫରୱାଦ କହୁଟା, ଛୋଟା ଚକ୍ ଓ ଜଙ୍ଗଲୋରା ଅଞ୍ଚଳରେ ଏଭଳି କ୍ୟାମ୍ପ ନିର୍ମାଣ ଚାଲିଛି । ସେହି କ୍ୟାମ୍ପଗୁଡି଼କୁ ଥର୍ମାଲ ଇମେଜର, ରାଡାର, ସାଟେଲାଇଟ୍ ସର୍ଭିଲାନ୍ସର ମୁକାବିଲା ଲାଗି ଉନ୍ନତ ପ୍ରଯୁକ୍ତିରେ ସଜ୍ଜିତ କରାଯାଇଥିବା ସୂଚନା ମିଳିଛି ।
ସେହିପରି ପାକିସ୍ତାନୀ ସେନା ଓ ଆଇଏସ୍ଆଇ ପିଓକେରେ ୧୩ଟି ଲଞ୍ଚ ପ୍ୟାଡ୍କୁ ପୁନଃ ବିକଶିତ କରୁଛି । ସେଗୁଡ଼ିକ କେଲ୍, ଶାରଡି, ଦୁଧନିୟାଲ, ଜୁରା, ଲିପା ଭ୍ୟାଲି, ପଚିବନ୍ ଚମନ୍, ଟାଣ୍ଡପାନି, ନୈୟାଲି, ଜାନକୋଟ୍, ଚାକୋଟି, ନିକୈଲ ଓ ଫରୱାଡ୍ କହୁଟା ଅଞ୍ଚଳରେ ରହିଛି । ଏସବୁ ବ୍ୟତୀତ ‘ଅପରେସନ୍ ସିନ୍ଦୂର’ରେ ଅନ୍ତଜାର୍ତୀୟ ସୀମା ନିକଟରେ ଧ୍ୱଂସ କରାଯାଇଥିବା ୪ଟି ଆତଙ୍କୀ ଲଞ୍ଚ୍ ପ୍ୟାଡ୍କୁ ବି ପୁନଃ କାର୍ଯ୍ୟକ୍ଷମ କରୁଛି ପାକିସ୍ତାନ । ଏଥିରେ ନିୟମିତ ପାକିସ୍ତାନୀ ରେଞ୍ଜରଙ୍କ ପୋଷ୍ଟ ବି ରହିଛି । ଅନ୍ୟପଟେ ଜମ୍ମୁ ସେକ୍ଟରରେ ଅନ୍ତଜାର୍ତୀୟ ସୀମା ନିକଟରେ ଆଇଏସ୍ଆଇ ୪ଟି ଲଞ୍ଚପ୍ୟାଡ୍ ପୁନଃ ବିକଶିତ କରୁଛି । ସେଗୁଡି଼କ ହେଲା ମସରୁର ବଡା ଭାଇ, ଚପରାର, ଲୁନି ଓ ଶଙ୍କରଗଡ଼ରେ ଏକ ଡ୍ରୋନ୍ କେନ୍ଦ୍ର ।
ଏସବୁ ଜରିଆରେ ଆଇଏସ୍ଆଇ ଏକ ନୂଆ ରଣନୀତି ପ୍ରସ୍ତୁତ କରୁଛି । ସେ ଅନୁସାରେ, ବଡ଼ ଆତଙ୍କୀ କ୍ୟାମ୍ପକୁ ଅନେକ ଛୋଟ କ୍ୟାମ୍ପରେ ବିଭାଜିତ କରାଯାଉଛି । ଗୋଟିଏ ସ୍ଥାନରେ ଅଧିକ ଆତଙ୍କବାଦୀଙ୍କ ଉପସ୍ଥିତିକୁ କମ୍ କରିବା ଏହି ଯୋଜନାର ଲକ୍ଷ୍ୟ । ଯେପରିକି ଏୟାରଷ୍ଟ୍ରାଇକ୍ ହେଲେ ସମ୍ଭାବ୍ୟ କ୍ଷତିକୁ କମାଯାଇପାରିବ । ଏହି ସବୁ ମିନି କ୍ୟାମ୍ପରେ ନିଜସ୍ୱ ସୁରକ୍ଷା ବ୍ୟବସ୍ଥା ରହିବ । ସ୍ୱତନ୍ତ୍ର ଭାବେ ତାଲିମପ୍ରାପ୍ତ ପାକିସ୍ତାନୀ ସେନା ଅଧିକାରୀ ତାର ସୁରକ୍ଷାକୁ ତଦାରଖ କରିବେ । ସେହି ଗାର୍ଡଙ୍କ ନିକଟରେ ଥର୍ମାଲ ସେନ୍ସର, ଲୋ ଫ୍ରିକୁଏନ୍ସି ରାଡାର ସିଷ୍ଟମ ଓ ଆଣ୍ଟି ଡ୍ରୋନ୍ ଟେକ୍ନୋଲୋଜି ରହିବ ।
ଆହୁରି ମଧ୍ୟ ଭାରତୀୟ ଗୁଇନ୍ଦା ଏଜେନ୍ସିଗୁଡି଼କ ନିକଟରେ ବହାବଳପୁରରେ ହୋଇଥିବା ଏକ ଉଚ୍ଚ ସ୍ତରୀୟ ବୈଠକର ଏଜେଣ୍ଡା ସଂପର୍କରେ ପ୍ରକାଶ କରିଛନ୍ତି । ସେହି ବୈଠକରେ ଆଇଏସ୍ଆଇ ଅଧିକାରୀଙ୍କ ସହିତ ଜୈସ୍, ଲସ୍କର, ହିଜବୁଲ ମୁଜାହିଦ୍ଦିନ୍ ଓ ଟିଆରଏଫ୍ର ବରିଷ୍ଠ କମାଣ୍ଡରମାନେ ଭାଗ ନେଇଥିଲେ । ବୈଠକ ସମୟରେ ଆଇଏସ୍ଆଇ ନଷ୍ଟ ହୋଇଯାଇଥିବା ଆତଙ୍କୀ ଭିତ୍ତିଭୂମିକୁ ପୁନଃ ବିକଶିତ କରିବା ଲାଗି ମୋଟା ଅଙ୍କର ଅର୍ଥ ଦେବାର ପ୍ରତିଶ୍ରୁତି ଦେଇଥିଲା ।
