ଭୁବନେଶ୍ୱର,୨୧/୧୦: ଜାତୀୟ ରାଜପଥ ନଂ ୧୬ର ବ୍ଲାକ୍ ସ୍ପଟ୍ ପାଲଟିଥିବା ପଳାଶୁଣିରେ ଶୁକ୍ରବାର ସନ୍ଧ୍ୟାରେ ସିରିଜ ଦୁର୍ଘଟଣା ଘଟିଛି । ଏକ ହାଇୱା କାର୍କୁ ପିଟିବା ସହ ବିଏମ୍ସି ଅଳିଆ ବୁହା ଗାଡିକୁ ମଧ୍ୟ ଧକ୍କା ଦେଇଛି । ଦୁର୍ଘଟଣାରେ ବିଏମ୍ସି ଗାଡି ଓଲଟି ପଡିଥିବା ବେଳେ ୨ଜଣ ଆହତ ହୋଇଛନ୍ତି ।
ମଞ୍ଚେଶ୍ୱର ଥାନା ପୁଲିସ ସୂଚନା ମୁତାବକ, ସନ୍ଧ୍ୟା ସାଢ଼େ ୭ଟା ବେଳେ ରସୁଲଗଡ଼ ପଳାଶୁଣି ରାସ୍ତାରେ ପ୍ରବଳ ଟ୍ରାଫିକ୍ ଜାମ ଲାଗି ରହିଥିଲା । କଟକ ଆଡ଼େ ଦ୍ରୁତଗତିରେ ଯାଉଥିବା ଏକ ହାଇୱା ପଳାଶୁଣି ଛକରେ ପ୍ରଥମେ କାର୍କୁ ପଛପଟୁ ପିଟିଥିଲା । କାରଟି ଆଗରେ ଯାଉଥିବା ଏକ ଅଳିଆ ବୋଝେଇ ଗାଡି଼କୁ ଧକ୍କା ଦେଲା । ଦୁର୍ଘଟଣାରେ ଅଳିଆ ବୋଝେଇ ଗାଡି଼ଟି ରାସ୍ତା ଉପରେ ହିଁ ଓଲଟି ପଡି଼ଥିଲା । ପଛକୁ ପଛ କାର୍ ଓ ହାଇୱା ମଧ୍ୟ ରାସ୍ତା ମଝିରେ ଅଟକି ରହିଥିଲା । ତେବେ ସ୍ଥାନୀୟ ଲୋକ ଦୁର୍ଘଟଣାସ୍ଥଳରେ ପହଞ୍ଚିବା ଦେଖି ହାଇୱା ଚାଳକ ସେଠାରୁ ଧାଇଁ ପଳାଇଥିଲା । ୩ଟି ଗାଡି଼ ରାସ୍ତା ମଝିରେ ଅଟକି ରହିବାରୁ ଏନ୍ଏଚ୍-୧୬ରେ ପ୍ରବଳ ଟ୍ରାଫିକ୍ ଜାମ ଉପୁଜିଥିଲା । ପୁଲିସ ଘଟଣାସ୍ଥଳରେ ପହଞ୍ଚି ଟ୍ରାଫିକ୍ ପରିଚାଳନା କରିଥିଲା ।
