ନୂଆଦିଲ୍ଲୀ,୦୬/୦୫: ସ୍କୁଲରେ ଏୟାର କଣ୍ଡିସନର (ଏସି) ଲାଗିଥିଲେ ଛାତ୍ରଛାତ୍ରୀଙ୍କ ଅଭିଭାବକଙ୍କୁ ଏହାର ଖର୍ଚ୍ଚ ଉଠାଇବାକୁ ପଡ଼ିବ ବୋଲି ଦିଲ୍ଲୀ ହାଇକୋର୍ଟ କହିଛନ୍ତି । ପିଲାଙ୍କ ସୁବିଧା ପାଇଁ ଏସି ଲଗାଯାଇଥାଏ । ତେଣୁ ଏହାର ଆର୍ଥିକ ବୋଝ କେବଳ ସ୍କୁଲ ମ୍ୟାନେମେଣ୍ଟ ଉପରେ ଲଦା ଯାଇପାରିବନି ବୋଲି ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ମନମୋହନ ଏବଂ ଜଷ୍ଟିସ୍ ମନମୀତ ପି.ଏସ୍ ଅରୋରାଙ୍କ ଖଣ୍ଡପୀଠ ଗତ ୨ ତାରିଖରେ ଏକ ପିଟିସନର ଶୁଣାଣି କରି କହିଛନ୍ତି । ଏସି ବାବଦ ଚାର୍ଜ ଲାବୋରେଟୋରୀ ଏବଂ ସ୍ମାର୍ଟ କ୍ଲାସ୍ ଫି’ ଭଳି ହାଇକୋର୍ଟ ଟିପ୍ପଣୀ ଦେବା ସହ ଅଭିଭାବକଙ୍କ ପକ୍ଷରୁ ଆଗତ ଉକ୍ତ ପିଟିସନକୁ ଖାରଜ କରିଦେଇଛନ୍ତି ।
ଦିଲ୍ଲୀର ଏକ ଘରୋଇ ସ୍କୁଲରେ ପଢ଼ୁଥିବା ଜଣେ ନବମ ଶ୍ରେଣୀ ଛାତ୍ରଙ୍କ ଅଭିଭାବକଙ୍କ ପକ୍ଷରୁ ଏହି ପିଟିସନ ଦାଖଲ କରାଯାଇଥିଲା । ଉକ୍ତ ସ୍କୁଲ ଏସି ସୁବିଧା ବାବଦକୁ ପ୍ରତିମାସରେ ୨ ହଜାର ଟଙ୍କା ଦାବି କରୁଥିବା ପିଟିସନରେ କୁହାଯାଇଥିଲା । ପିଲାମାନଙ୍କୁ ଏସି ସୁବିଧା ଦେବା ଦାୟିତ୍ୱ ସ୍କୁଲ ମ୍ୟାନେଜମେଣ୍ଟର । ତେଣୁ ସ୍କୁଲ ନିଜ ପାଣ୍ଠିରୁ ଏହି ଖର୍ଚ୍ଚ ଉଠାଇବା କଥା ବୋଲି ଅଭିଭାବକ ପିଟିସନରେ ଦର୍ଶାଇଥିଲେ । ହାଇକୋର୍ଟ ଏହି ପିଟିସନକୁ ଖାରଜ କରିବା ସହ କହିଥିଲେ, ୨୦୨୩-୨୪ ପାଇଁ ସ୍କୁଲ ଯେଉଁ ଫି’ ରସିଦ ଜାରି କରିଛି ସେଥିରେ ଏସି ବାବଦକୁ ଅଲଗା ଫି’ ଉଲ୍ଲେଖ ରହିଛି । ତେଣୁ ସ୍କୁଲ ବାଛିବା ପୂର୍ବରୁ ଅଭିଭାବକଙ୍କୁ ସେଠାରେ ମିଳୁଥିବା ସୁବିଧା ଏବଂ ସେ ବାବଦ ଫି’କୁ ଧ୍ୟାନରେ ରଖିବା କଥା।