ନୂଆଦିଲ୍ଲୀ,୧୮/୫: 'ତାରକ ମେହେତା କା ଉଲଟା ଚଷମା' ଅଭିନେତା ଗୁରୁଚରଣ ସିଂଙ୍କ ନିଖୋଜ ଘଟଣା। ୨୫ ଦିନ ପରେ ଘରକୁ ଫେରିଲେ ଅଭିନେତା । ତେବେ ଆଧ୍ୟାତ୍ମିକ ଯାତ୍ରାରେ ଯିବା ପାଇଁ ସେ ଘରୁ ଚାଲିଯାଇଥିବା ସେ ଦିଲ୍ଲୀ ପୋଲିସକୁ ସୂଚନା ଦେଇଛନ୍ତି  । ଏପ୍ରିଲ ୨୨ ତାରଖ ଦିନ ଗୁରୁଚରଣ ନିଖୋଜ ହୋଇଥିବା ନେଇ ପରିବାର ଲୋକେ ଥାନାରେ ଅଭିଯୋଗ କରିଥିଲେ । ବର୍ତ୍ତମାନ ସେ ଘରକୁ ଫେରିଛନ୍ତି ।

ସୂଚନା ମୁତାବକ, ଏପ୍ରିଲ ୨୨ ତାରିଖ ରେ ମୁମ୍ବାଇ ଅଭିମୁଖେ ଯାତ୍ରା କରିଥିଲେ ଗୁରୁ । କିନ୍ତୁ ଏପ୍ରିଲ ୨୬ ତାରିଖରେ ଗୁରୁଚରଣ ସିଂ ଙ୍କ ବାପା ପୋଲିସ ଷ୍ଟେସନରେ ପୁଅ ନିଖୋଜ ହେବା ନେଇ ଏକ ରିପୋର୍ଟ ଦାଖଲ କରିଥିଲେ ।  କିନ୍ତୁ ସେ ସେବେଠାରୁ ଆଉ ଘରକୁ ଫେରିନଥିଲେ ଏବଂ ଫୋନ ମଧ୍ୟ ବନ୍ଦ ରଖିଥିଲେ । ତେବେ ପରିବାର ଲୋକଙ୍କ ଅଭିଯୋଗ ପରେ ଦିଲ୍ଲୀ ପୋଲିସ ଏକ ଅପହରଣ ମାମଲା ରୁଜୁ କରି ଅଭିନେତାଙ୍କୁ ଖୋଜିବା ପାଇଁ ତଦନ୍ତ ଚଳାଇଥିଲା । ଗୁରୁଚରଣ ଅମୃତସର ଏବଂ ଲୁଧିଆନା ପରି ଅନେକ ସହରର ଗୁରୁଦ୍ୱାର ବୁଲିବା ପରେ ଘରକୁ ଫେରିଛନ୍ତି। 

ତେବେ ପୋଲିସର ଯାଞ୍ଚ ସମୟରେ ଗୁରଚରଣଙ୍କ ୧୦ରୁ ଅଧିକ ଆକାଉଣ୍ଟ ସାମ୍ନାକୁ ଆସିଛି। ଏଥିସହ ତାଙ୍କର ଏକାଧିକ ମେଲ ଆଇଡି ମଧ୍ୟ ରହିଛି। ତଦନ୍ତରୁ ଜଣାପଡିଛି ଅଭିନେତାଙ୍କ ଧର୍ମ ପ୍ରତି ବିଶ୍ବାସ ବଢିବାକୁ ଲାଗିଥିଲା। ସେ ତାଙ୍କର ଜଣେ ଘନିଷ୍ଠ ସାଙ୍ଗଙ୍କୁ ପାହାଡକୁ ଯିବାର ରାସ୍ତା ବିଷୟରେ ପଚାରି ବୁଝିଥିଲେ । ଶେଷଥର ପାଇଁ ତାଙ୍କୁ ଇରିକ୍ସାରେ ଚାଲିକି ଯାଉଥିବାର ଦେଖିବାକୁ ମିଳିଥିଲା । 'ତାରକ ମେହେତା କା ଉଲଟା ଚଷମା'ରେ ଗୁରୁଚରଣ ସିଂଙ୍କ ରୋଶନ ସିଂ ସୋଦି ଚରିତ୍ର ତାଙ୍କୁ ବେଶ ଲୋକପ୍ରିୟତା ଦେଇଥିଲା । ୨୦୧୩ରେ ସେ ଶୋ ଛାଡି ୨୦୧୪ରେ ପୁଣି ଫେରିଥିଲେ ।