ନୂଆଦିଲ୍ଲୀ: ଆପଣ କେବେ ନା କେବେ ଟ୍ରେନରେ ଯାତ୍ରା କରି ନିଜର ଗନ୍ତବ୍ୟସ୍ଥଳକୁ ଯାଇଥିବେ ନିଶ୍ଚୟ । ପ୍ରତିଦିନ ଭାରତୀୟ ରେଳର ବ୍ୟବହାର କରି ଲକ୍ଷଲକ୍ଷ ଲୋକ ନିଜ ଗନ୍ତବ୍ୟସ୍ଥଳରେ ପହଞ୍ଚିଥାନ୍ତି । ଏହାକୁ ନଜରରେ ରଖି ରେଳ ବିଭାଗ ସାରା ଦେଶରେ ହଜାର ହଜାର ଟ୍ରେନ ଚଲାଇଥାଏ । ତେବେ ଭାରତରେ ଯାତ୍ରୀମାନଙ୍କ ସଂଖ୍ୟା ବହୁତ ଅଧିକ ହୋଇଥିବାରୁ ଟ୍ରେନରେ ସାଧାରଣତଃ ଭିଡ ଅଧିକ ହୁଏ । ଆମ ଦେଶରେ ଯାତ୍ରୀ ଅନୁପାତରେ ଟ୍ରେନ ସଂଖ୍ୟା କମ ରହିଥିବାରୁ ଅକ୍ଟୋବର ଓ ନଭେମ୍ବର ମାସ ଭଳି ପାର୍ବଣ ଋତୁରେ ଟ୍ରେନରେ ସିଟ ମିଳିବା ତ ଦୂରର କଥା ଟ୍ରେନ୍ ଭତରକୁ ପଶିବା ବି କଷ୍ଟ ।
ଏହି ସବୁ କାରଣ ପାଇଁ ଲୋକମାନେ ପ୍ରଥମରୁ ପ୍ରାୟ ସମସ୍ତ ସିଟ ବୁକ୍ କରି ଦେଇଥାନ୍ତି । କୈଣସି କାରଣରୁ ଅଳ୍ପ କିଛି ସିଟ ବଞ୍ଚିଗଲେ ମଧ୍ୟ ଆମ ଦେଶରେ ନିମ୍ନ ମଧ୍ୟବିତ ବର୍ଗର ଲୋକଙ୍କ ସଂଖ୍ୟା ଅଧିକ ହୋଇଥିବାରୁ ସେମାନେ ଅଧିକ ମୂଲ୍ୟଯୁକ୍ତ ଟିକେଟ ନକିଣି ସାଧାରଣ ଶ୍ରେଣୀରେ ଯାତ୍ରା କରିବାକୁ ଅଧିକ ପସନ୍ଦ କରିଥାନ୍ତି । ସାଧାରଣ ଶ୍ରେଣୀରେ ପ୍ରଥମରୁ ଭିଡ ହେଉଥିବାରୁ କୈଣସିମତେ ନିଜ ଗନ୍ତବ୍ୟସ୍ଥଳରେ ପହଞ୍ଚିବା ପାଇଁ ଲୋକମାନେ ଟ୍ରେନର ଶୈଚାଳୟରେ ମଧ୍ୟ ଯାତ୍ରା କରିଥାନ୍ତି । ଏସବୁକୁ ନଜରରେ ରଖି ରେଳ ବିଭାଗ ସାଧାରଣ ଶ୍ରେଣୀରେ ଯାତ୍ରା କରୁଥିବା ଲୋକମାନଙ୍କ ନିମନ୍ତେ ଏକ ପ୍ରକଳ୍ପ ଉପରେ କାମ କରିବା ଆରମ୍ଭ କରିସାରିଲାଣି ।
ନିୟମିତ ରୁପେ ଚାଲୁଥିବା ବିଭିନ୍ନ ଟ୍ରେନରେ ନୂତନ ସାଧାରଣ ଡବା (ଜେନେରାଲ୍ ବଗି) ଯୋଡିବା କାମ ଆରମ୍ଭ କଲାଣି ରେଳ ବିଭାଗ । ଚଳିତ ନଭେମ୍ବର ମାସରେ ୩୭୦ଟି ନିୟମିତ ଚାଲୁଥିବା ଟ୍ରେନରେ ଏକ ହଜାରରୁ ଅଧିକ ସାଧାରଣ ଶ୍ରେଣୀର ଡବା ସଂଯୋଗ କରାଯିବ । ରେଳ ବିଭାଗର ଏହି ନିଷ୍ପତି ଯୋଗୁଁ ଏହି ଶ୍ରେଣୀରେ ଯାତ୍ରା କରୁଥିବା ଲୋକମାନଙ୍କୁ ପୂର୍ବ ତୁଳନାରେ ବର୍ତ୍ତମାନ ଅଧିକ ସିଟ ମିଳିବାର ସମ୍ଭାବନା ରହିବା ସହିତ ସେମାନେ ଏକ ସୁରକ୍ଷିତ ଯାତ୍ରା କରିପାରିବେ । “ଚେନ୍ନାଇର ଇଣ୍ଟିଗ୍ରାଲ୍ ଓ ରାୟବରେଲି କୋଚ ଫ୍ୟାକ୍ଟ୍ରିରେ ଏହି ବଗି ଗୁଡିକର ନିର୍ମାଣ କରାଯାଉଛି । ରେଳ ବିଭାଗ ଆସନ୍ତା ଦୁଇ ବର୍ଷରେ ୧୦,୦୦୦ ସାଧାରଣ ଶ୍ରେଣୀର ବଗି ତିଆରି କରିବାର ଲକ୍ଷ୍ୟ ରଖିଛି” ବୋଲି ରେଳ ବୋର୍ଡର କାର୍ଯ୍ୟକାରୀ ନିର୍ଦ୍ଦେଶକ ଦିଲୀପ କୁମାର କହିଛନ୍ତି ।
ଏହାବ୍ୟତୀତ ଜୁଲାଇରୁ ଅକ୍ଟୋବର ମାସ ମଧ୍ୟରେ ପାର୍ବଣରେ ହେବାକୁ ଥିବା ଭିଡକୁ ଲକ୍ଷ କରି ୫୮୩ଟି ନୂତନ ସାଧାରଣ ଶ୍ରେଣୀର କୋଚକୁ ୨୨୦ଟି ନିୟମିତ ଚାଲୁଥିବା ଟ୍ରେନରେ ଯୋଡାଯାଇ ଥିଲା । ରେଳବିଭାଗର ଏହି ନିଷ୍ପତ୍ତି ଆସନ୍ତା ସମୟରେ ସାଧାରଣ ଶ୍ରେଣୀରେ ଯାତ୍ରାକରୁଥିବା ଲୋକମାନଙ୍କ ପାଇଁ ବହୁତ ଲାଭଦାୟକ ହେବ ଯେଉଁଥିପାଇଁ ଲୋକମାନେ ଏକ ଆରାମଦାୟକ ଯାତ୍ରାର ଲାଭ ଉଠାଇବା ସହିତ ଶାନ୍ତିରେ ଯାତ୍ରା କରିପାରିବେ ।
