କେନ୍ଦ୍ରାପଡ଼ା/ପଟ୍ଟାମୁଣ୍ଡାଇ,୦୮/୦୮: କାଠିଆପଡ଼ା କଲେଜ ଛାତ୍ରୀଙ୍କ ଆତ୍ମାହୁତି ମାମଲାରେ ସମୟ ଗଡ଼ିବା ସହ ନୂଆ ନୂଆ ତଥ୍ୟ ସାମ୍ନାକୁ ଆସିବାରେ ଲାଗିଛି । ଆତ୍ମଦାହ ବେଳେ କିରାସିନି ନୁହେଁ, ବରଂ ପେଟ୍ରୋଲ ବ୍ୟବହାର କରାଯାଇଥିବା ସୂଚନା ମିଳିଛି । ପୁଣି ପେଟ୍ରୋଲ ଏକ ଛୋଟ ପ୍ଲାଷ୍ଟିକ୍ ବୋତଲରେ ଅଣାଯାଇଥିଲା । ଯାହାକୁ ପୁଲିସ ଜବତ କରିଛି । ତେବେ ପେଟ୍ରୋଲ କେମିତି ଘରକୁ ଆସିଲା ତାକୁ ନେଇ ପ୍ରଶ୍ନ ଉଠିଛି । ଏତେ କମ୍ ପେଟ୍ରୋଲରେ କେମିତି ଆତ୍ମଦାହ ହେଲା ଓ ପୀଡ଼ିତା ପେଟ୍ରୋଲ କେଉଁଠାରୁ ପାଇଲେ? କୌଣସି ପେଟ୍ରୋଲ ପମ୍ପ୍ରେ ପ୍ଲାଷ୍ଟିକ୍ ବୋତଲରେ ପେଟ୍ରୋଲ ଅବା ଡିଜେଲ ଦେବା ପାଇଁ ଏବେ କଟକଣା ଜାରି ହୋଇଥିବା ବେଳେ ସମ୍ଭବତଃ ବାଇକ୍ ଅବା ଅନ୍ୟ କୌଣସି ମୋଟର ଯାନରୁ ପେଟ୍ରୋଲ ସଂଗ୍ରହ କରାଯାଇଥିବା କୁହାଯାଉଛି । ପୁଣି ବୋତଲଟି ମୃତା ଛାତ୍ରୀଙ୍କ ପାଖରେ ଶିଡ଼ିଘର ଚାନ୍ଦିନୀ ଚଟାଣରେ ପଡ଼ିଥିଲା ।
