ପୁରୀ,୧୬/୧୧: ସମୁଦ୍ର କୂଳ ଥାନା ଅଧୀନ ପେଣ୍ଠକଟା ଫାଣ୍ଡିରେ ନିଶାସେବନ କରିବା ମହଙ୍ଗା ପଡ଼ିଲା । ଫସିଲେ ପୁଲିସ ଅଧିକାରୀ ଓ କର୍ମଚାରୀ । ଜଣେ ଏଏସ୍ଆଇଙ୍କ ସହ ହାବିଲ୍ଦାର୍ ଓ କନ୍ଷ୍ଟେବଲଙ୍କୁ ନିଲମ୍ବନ କରିଛନ୍ତି ଏସ୍ପି ବିନୀତ ଅଗ୍ରୱାଲ୍ । ନିଲମ୍ବିତ ପୁଲିସ ଅଧିକାରୀ ଓ କର୍ମଚାରୀ ହେଲେ ଏଏସ୍ଆଇ ସରୋଜ ପ୍ରଧାନ, ହାବିଲଦାର୍ ବଳରାମ ମଲ୍ଲିକ ଏବଂ କନ୍ଷ୍ଟେବଲ ପୂର୍ଣ୍ଣଚନ୍ଦ୍ର ବେହେରା । ଖବର ଅନୁସାରେ ପେଣ୍ଠକଟା ଫାଣ୍ଡିରେ ନିୟମିତ ଭାବେ ମଦ ଆସର ଜମୁଥିବା ନେଇ ଅଭିଯୋଗ ହେଉଥିଲା ।
ଗତ ୬ ତାରିଖ ରାତିରେ ନିଶାସକ୍ତ ଅବସ୍ଥାରେ ଫାଣ୍ଡି ଭିତରୁ ବାହାରକୁ ଆସି ପୁଲିସ ବାବୁମାନେ ହୋହଲ୍ଲା କରିଥିଲେ । ସ୍ଥାନୀୟ ଲୋକେ ଏହି ଦୃଶ୍ୟ ଦେଖିବା ପରେ ଘଟଣା ପ୍ରଚାରିତ ହୋଇଥିଲା । ଏନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇଥିଲା । ଶେଷରେ କର୍ତ୍ତବ୍ୟରେ ଅବହେଳା କରିଥିବା ଅଭିଯୋଗରେ ଏସ୍ପି ଶ୍ରୀ ଅଗ୍ରୱାଲ୍ କାର୍ଯ୍ୟାନୁଷ୍ଠାନ ଗ୍ରହଣ କରି ୩ ଜଣଙ୍କୁ ନିଲମ୍ବନ କରିଛନ୍ତି ।
ସୂଚନାଯୋଗ୍ୟ ଯେ, ହାବିଲ୍ଦାର୍ ଶ୍ରୀ ମଲ୍ଲିକ ବିରୋଧରେ ଏକାଧିକବାର ସର୍ବସାଧାରଣ ସ୍ଥାନରେ କଳି ଝଗଡ଼ା କରିବା ନେଇ ମଧ୍ୟ ଅଭିଯୋଗ ରହିଥିବା ଜଣାପଡ଼ିଛି ।
