ପୁରୀ, ୧୬/୦୬: ଅସୁସ୍ଥ ଠାକୁରେ ବଡ଼ଦେଉଳ ଅଣସର ପିଣ୍ଡିରେ ବିଜେ । ସେଠାରେ ଚାଲିଛି ଶ୍ରୀବିଗ୍ରହଙ୍କ ଗୁପ୍ତ ପୂଜା । ମହାପ୍ରଭୁଙ୍କ ୧୫ ଦିନର ଅନନ୍ୟ ମାନବୀୟ ଲୀଳା । ସୋମବାର ଠାକୁରଙ୍କ ଫୁଲୁରୀ ତେଲ ଶ୍ରୀମନ୍ଦିରକୁ ବିଜେ ହେବ । ବଡ଼ଓଡ଼ିଆ ମଠରୁ ଫୁଲୁରୀ ତେଲ ଆସିବାର ଶ୍ରୀମନ୍ଦିର ପରମ୍ପରା ରହିଛି । ଏଣୁ ସମସ୍ତ ପ୍ରସ୍ତୁତି ସାରି ଶ୍ରୀମନ୍ଦିରରୁ ଡାକରାକୁ ଅପେକ୍ଷା କରିଛନ୍ତି ବଡ଼ଓଡ଼ିଆ ମଠ ମହନ୍ତ ଅଧିକାରୀ ବଂଶୀଧର ଦାସ ଗୋସ୍ୱାମୀ । ଜ୍ୱର ହେବାରେ ସ୍ନାନ ବସ୍ତ୍ର ଶ୍ରୀବିଗ୍ରହଙ୍କ ଶ୍ରୀଅଙ୍ଗରୁ ଫିଟିଲା । ଶ୍ରୀଅଙ୍ଗରେ ଲାଗି ହୋଇଥିବା ଚନ୍ଦନ ଓ କରାଳ ବାହାରିଛି । ଆଗକୁ ଫୁଲରୀ ତେଲ ଲାଗି ହୋଇ ଠାକୁରେ ଉପଶମ ଲଭିବେ ।
ବଡ଼ଓଡ଼ିଆ ମଠ ମହନ୍ତ ଅଧିକାରୀ ବଂଶୀଧର ଦାସ ଗୋସ୍ୱାମୀ କୁହନ୍ତି ଠାକୁରଙ୍କ କୃପା ରହିଛି । ଏଣୁ ଫୁଲୁରୀ ତେଲ ପ୍ରସ୍ତୁତିରେ କୌଣସି ସମସ୍ୟା ହୋଇନାହିଁ । ଠାକୁରଙ୍କ ଫୁଲୁରୀ ତେଲ ପ୍ରସ୍ତୁତ ହୋଇ ରହିଛି । ମଧ୍ୟାହ୍ନ ଧୂପ ସରିଲେ ଶ୍ରୀମନ୍ଦିରରୁ ଡାକରା ମଠରେ ପହଞ୍ଚିବ । ସେତେବେଳକୁ ତେଲ ପ୍ରସ୍ତୁତ କରି ରଖିଥିବେ ମହନ୍ତ । ଏହାପରେ ମଠାଧୀନ ସେବାକାରୀ ଅତ୍ୟନ୍ତ ଶୁଦ୍ଧପୂତ ଭାବେ ଫୁଲୁରୀ ତେଲ ନେଇ ଶ୍ରୀମନ୍ଦିରରେ ପହଞ୍ଚିବେ । ସନ୍ଧ୍ୟାରେ ପ୍ରାୟ ବଟଗଣେଷଙ୍କ ମନ୍ଦିର ନିକଟ ସର ଘର ରହିଛି । ସେହିଠାରେ ଦେଉଳକରଣ ଓ ନୀତି କମାଣ୍ଡର ମହନ୍ତଙ୍କଠାରୁ ତେଲ ସଂଗ୍ରହ କରିଥାନ୍ତି । ଗତବର୍ଷ ହେରାପଞ୍ଚମୀରୁ ବିଭିନ୍ନ ଦ୍ରବ୍ୟ ପଡ଼ି ରାଶି ତେଲ ମାଟିରେ ପୋତା ହୋଇଥିଲା। କାଳକ୍ରମେ ବିଭିନ୍ନ ଋତୁରେ ମିଳୁଥିବା ଅଲଗା ଉପାଦାନ ସେଥିରେ ପଡ଼ିଲା । ମୋଟ ୨୪ ପ୍ରକାର ଉପାଦାନରେ ଶ୍ରୀବିଗ୍ରହଙ୍କ ଫୁଲୁରୀ ତେଲ ପ୍ରସ୍ତୁତ ହୋଇଥାଏ ।
ହେରାପଞ୍ଚମୀରେ ମହାପ୍ରଭୁଙ୍କ ମଧ୍ୟାହ୍ନଧୂପ ସରିଲେ ସନ୍ଧ୍ୟା କାଳରେ ବଡ଼ ଓଡ଼ିଆ ମଠ ମହନ୍ତ ଓ ତାଙ୍କ ସାହାଯ୍ୟକାରୀ କିମ୍ବା ଉତ୍ତରାଧିକାରୀ ତେଲ ପ୍ରସ୍ତୁତି ଆରମ୍ଭ କରନ୍ତି । ମଠ ପରିସରରେ ସ୍ୱତନ୍ତ୍ର ତେଲ ବାଡ଼ି ମଧ୍ୟ ରହିଛି । ନିରୋଳା ସ୍ଥାନ ଖୋଜି ଏକ ନିର୍ଦ୍ଦିଷ୍ଟ ଜାଗାରେ ମାଟି ଖୋଳା ହୋଇ ପ୍ରସ୍ତୁତ ଥାଏ । ମାଟି ହାଣ୍ଡିରେ ଘଣା ପେଡ଼ା ରାଶି ତେଲ ସହ ବିଭିନ୍ନ ଦ୍ରବ୍ୟ ମିଶାଯାଇ ପୋତା ଯାଏ । ସେଥିରେ ଋତୁ ଅନୁସାରେ ମିଳୁଥିବା ବିଭିନ୍ନ ସୁବାସିତ ପୁଷ୍ପ ଓ ଚେରମୂଳି ପକାଯାଏ । ସେହି ଦିନଠାରୁ ତେଲ ରହିବା ସ୍ଥାନରେ ଫୁଲ ପାଣି ଦିଆଯାଏ । ସ୍ନାନପୂର୍ଣ୍ଣମୀ ପୂର୍ବ ଦିନ ଠାକୁରଙ୍କ ମଧ୍ୟାହ୍ନଧୂପ ସରିଲେ ସନ୍ଧ୍ୟାରେ ପ୍ରାୟ ପୋତା ସ୍ଥାନରୁ ବାହାରି ଏକ ନିର୍ଦ୍ଦିଷ୍ଟ କୋଠରୀରେ ମୁଦ ଦିଆଯାଇ ଉକ୍ତ ତେଲ ରଖାଯାଏ । ଉକ୍ତ ତେଲକୁ ଛଣା ଯାଇ ମାଟି ପାତ୍ରରେ ସଜଡ଼ା ହୋଇ ରହିଥିବ । ଶ୍ରୀମନ୍ଦିର ପ୍ରଶାସନ ପକ୍ଷରୁ ଡ଼ାକରା ଆସିଲା ପରେ ଫୁଲୁରୀ ତେଲ ଠାକୁରଙ୍କ ସେବା ପାଇଁ ଶ୍ରୀମନ୍ଦିରକୁ ବିଜେ କରିବ ।
