ପାଟନା,୨୭।୮: ବିହାରର ଦରଭଙ୍ଗା ଜିଲ୍ଲାରେ ବୁଧବାର କଂଗ୍ରେସ ନେତା ରାହୁଲ ଗାନ୍ଧୀ ଭୋଟର ଅଧିକାର ଯାତ୍ରା ଆରମ୍ଭ କରିଛନ୍ତି। ତେବେ ଏହି ସମୟରେ ଏଭଳି ଆଉ ଏକ ଘଟଣା ଘଟିଛି, ଯାହାକୁ ନେଇ ଖୁବ୍ ଚର୍ଚ୍ଚା। ତାହା ହେଲା ଏହି ଯାତ୍ରା ବେଳେ ବହୁ ନେତାଙ୍କର ପକେଟ ମାର୍ ହୋଇଛି। ସିମରୀରେ ଯେତେବେଳେ ଇଣ୍ଡିଆ ମେଣ୍ଟର ନେତା ‘ଭୋଟ ଚୋର ଗାଦି ଛାଡ଼’ ନାରା ଲଗାଉଥିଲେ, ସେତେବେଳେ ପକେଟ ମାର ମାନେ ନିଜର ହାତ ସଫେଇ କରିନେଇଥିଲେ। ପୂର୍ବତନ କେନ୍ଦ୍ରମନ୍ତ୍ରୀ ମହମ୍ମଦ ଅଲ୍ଲୀ ଅଶରଫ୍ ଫାତମି ଓ ପୂର୍ବତନ ବିଧାୟକ ଭୋଲା ଯାଦବଙ୍କ ସହିତ ବହୁ ନେତା ଓ କର୍ମୀଙ୍କ ମୋବାଇଲ ଏବଂ ପର୍ସ ଚୋରି ହୋଇଛି। କୁହାଯାଉଛି ଯେ, ପକେଟମାରମାନେ ଶୋଭନ ଛକରୁ ନେଇ ଅତରବେଲ୍ ଛକ ପର୍ଯ୍ୟନ୍ତ ଆକ୍ଟିଭ ଥିଲେ। ଏହା ଭିତରେ କର୍ମୀମାନେ ଜଣେ ଯୁବକଙ୍କୁ ପକେଟମାର ଅଭିଯୋଗରେ ଗିରଫ କରିଛନ୍ତି। ଘଟଣାସ୍ଥଳରେ ପହଁଞ୍ଚିଥିବା ସିମରୀ ପୋଲିସ ତାଙ୍କୁ କଷ୍ଟଡିରେ ନେଇ ପଚରା ଉଚରା କରିଥିଲା।
ସିମରି ଥାନାଧ୍ୟକ୍ଷ ଅରବିନ୍ଦ କୁମାର କହିଛନ୍ତି, ଏହି ମାମଲାରେ କାର୍ଯ୍ୟାନୁଷ୍ଠାନ ପାଇଁ ଏପର୍ଯ୍ୟନ୍ତ ଆବେଦନ କରାଯାଇ ନାହିଁ। ମାମଲାର ଯାଞ୍ଚ କରାଯାଉଛି। କୁହାଯାଉଛି ଯେ, ଶୋଭନ ଛକରେ ବୁଧବାର ପୂର୍ବତନ କେନ୍ଦ୍ରମନ୍ତ୍ରୀ ଅଲ୍ଲୀ ଅଶରଫ୍ ଫତମି ସଡକ କଡରେ ସ୍ବାଗତ ପାଇଁ ଠିଆ ହୋଇଥିଲେ। ଏହି ସମୟରେ ପକେଟମାରମାନେ ତାଙ୍କର ପର୍ସ ବାହାର କରି ନେଇଯାଇଥିଲେ। କୁହାଯାଉଛି ପର୍ସରେ ନଗଦ ଟଙ୍କା ସହ ଏଟିଏମ କାର୍ଡ ଓ ଅନ୍ୟ କାଗଜପତ୍ର ଥିଲା।
ସେଭଳି ପୂର୍ବତନ ବିଧାୟକ ଭୋଲା ଯାଦବଙ୍କ ମୋବାଇଲ ଓ ପର୍ସ ମଧ୍ୟ ଗାଏବ ହୋଇଯାଇଥିଲା। ତାଙ୍କ ମୋବାଇଲ ନେଇ ଯାଉଥିବା ଯୁବକକୁ ଧରି ନେଇ ଥିଲେ ଦଳୀୟକର୍ମୀ। ଏହାପରେ ତାକୁ ସିମରୀ ଥାନା ପୋଲିସ ହାତରେ ଦେଇଥିଲେ। କେବଳ ସେତିକି ନୁହେଁ ନେତାଙ୍କ ବହୁ କର୍ମୀ ମୋବାଇଲ ଓ ଟଙ୍କା ପର୍ସ ମଧ୍ୟ ଚୋରି କରି ନିଆଯାଇଛି।
