ପିପିଲି,୧୯/୦୮: ଦେହରେ ନିଆଁ ଲଗାଇ ଆତ୍ମହତ୍ୟା ଉଦ୍ୟମ କରିଥିବା ପୁରୀ ଜିଲ୍ଲା ପିପିଲିର ଅର୍ଚ୍ଚନା ଦାଶ (୩୫) ଭୁବନେଶ୍ୱର ଏମ୍ସରେ ଆଖି ବୁଜିଛନ୍ତି । ଜୟପୁର ଛକ ନିକଟରେ ଭଡ଼ା ଘରେ ରହୁଥିବା ଅର୍ଚ୍ଚନା ଗତ ୧୩ ତାରିଖ ସନ୍ଧ୍ୟାରେ କିରାସିନି ଢାଳି ଆତ୍ମହତ୍ୟା ଉଦ୍ୟମ କରିଥିଲେ । ତାଙ୍କ ଶରୀରର ୯୦ ପ୍ରତିଶତ ପୋଡ଼ି ଯାଇଥିଲା । ସଙ୍କଟାପନ୍ନ ଅବସ୍ଥାରେ ତାଙ୍କୁ ପ୍ରଥମେ ପିପିଲି ଡାକ୍ତରଖାନା ନିଆଯାଇଥିଲା । ସେଠାରୁ ଏମ୍ସ ସ୍ଥାନାନ୍ତର କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ସୋମବାର ସକାଳ ସାଢ଼େ ୬ଟାବେଳେ ମୃତ୍ୟୁ ଘଟିଛି । ଶବ ବ୍ୟବଚ୍ଛେଦ ପରେ ଅପରାହ୍ଣ ପ୍ରାୟ ୪ଟାରେ ମର ଶରୀର ପିପିଲିରେ ପହଞ୍ଚିଥିଲା । ପୁରୀ ସ୍ୱର୍ଗଦ୍ୱାରଠାରେ ଶେଷକୃତ୍ୟ ସମ୍ପନ୍ନ କରାଯାଇଛି ।
ସୂଚନାଯୋଗ୍ୟ, ଅର୍ଚ୍ଚନା ଆତ୍ମହତ୍ୟା ଉଦ୍ୟମ କରିବା ପରେ ପିପିଲି ଓ ପୁରୀ ଜିଲ୍ଲା ପୁଲିସ ଅଧିକାରୀ, ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ । ଘଟଣାସ୍ଥଳରୁ ସୁଇସାଇଡ୍ ନୋଟ୍, କିରାସିନି ବୋତଲ ଜବତ କରାଯାଇଥିଲା । ଅତ୍ୟଧିକ ଋଣ ଚାପରେ ମହିଳା ଆତ୍ମହତ୍ୟା ଉଦ୍ୟମ କରିଥିବା ନେଇ ପୁରୀ ଅତିରିକ୍ତ ଏସ୍ପି ସଚ୍ଚିନ ପଟେଲ ଗଣମାଧ୍ୟମକୁ ସୂଚନା ଦେଇଥିଲେ।
