ନୂଆଦିଲ୍ଲୀ: ଶୁକ୍ରବାର ଦିନ ଇରାକୀ କୁର୍ଦିସ୍ତାନର ସୁଲେମାନିଆହ ନିକଟରେ ଏକ ଉତ୍ସବରେ କୁର୍ଦିସ୍ତାନ ୱାର୍କର୍ସ ପାର୍ଟି (PKK) ର ଯୋଦ୍ଧା ମାନେ ସେମାନଙ୍କର ଅସ୍ତ୍ରଶସ୍ତ୍ର ପରିତ୍ୟାଗ କରିବା ଆରମ୍ଭ କରିଛନ୍ତି। ତୁର୍କୀ ବିରୁଦ୍ଧରେ ୪୦ ବର୍ଷର ସଶସ୍ତ୍ର ବିଦ୍ରୋହ ପରେ ଏହି ନିରସ୍ତ୍ରୀକରଣ ସମାରୋହ ଅନୁଷ୍ଠିତ ହୋଇଛି । ଏଥିରେ ୩୦ ଜଣ ପିକେକେ (PKK) ଯୋଦ୍ଧା ସାମିଲ ହୋଇଥିଲେ । ଏମାନଙ୍କ ମଧ୍ୟରୁ ଚାରି ଜଣ କମାଣ୍ଡର ଥିଲେ, ସେମାନେ ସେମାନଙ୍କର ଅସ୍ତ୍ରଶସ୍ତ୍ରକୁ ଜାଳି ଦେଇଥିଲେ । AFPର ଜଣେ ସମ୍ବାଦଦାତା ଏହି ରିପୋର୍ଟ କରିଛନ୍ତି । 

'ଶାନ୍ତି ଏବଂ ଗଣତାନ୍ତ୍ରିକ ସମାଜ' ପ୍ରକ୍ରିୟାର ସଫଳତା ସୁନିଶ୍ଚିତ କରିବା ପାଇଁ ଆମେ ସ୍ୱେଚ୍ଛାକୃତ ଭାବରେ ଆମର ଅସ୍ତ୍ରଶସ୍ତ୍ରକୁ ଦୃଢ଼ତାର ଏକ ପଦକ୍ଷେପ ଭାବରେ ନଷ୍ଟ କରୁଛୁ ବୋଲି ପିକେକେ କହିଛି । ଏହା ସହ କହିଛି କି,"ଆମେ ଇଚ୍ଛା କରୁ ଯେ ଏହି ପଦକ୍ଷେପ ଶାନ୍ତି ଏବଂ ସ୍ୱାଧୀନତା ଆଣିବ।"

୧୯୯୯ ମସିହାରୁ ଇସ୍ତାନବୁଲ ନିକଟରେ ଜେଲରେ ଥିବା ନେତା ଅବଦୁଲ୍ଲା ଓକାଲାନ ଫେବୃଆରୀରେ ତାଙ୍କ ଗୋଷ୍ଠୀକୁ ଡାକି ଆନୁଷ୍ଠାନିକ ଭାବରେ ଭାଙ୍ଗିବା ଏବଂ ନିରସ୍ତ୍ରୀକରଣ କରିବାକୁ ଅନୁରୋଧ କରିଥିଲେ । ଏହା ପରେ ପିକେକେ ମେ ମାସରେ ଘୋଷଣା କରିଥିଲା ଯେ, ଏହା ସଶସ୍ତ୍ର ସଂଘର୍ଷକୁ ଭାଙ୍ଗିବ ଏବଂ ପରିତ୍ୟାଗ କରିବ।

ଚଳିତ ସପ୍ତାହରେ ଓକଲାନ କହିଥିଲେ ଯେ,"ମୁଁ ଅସ୍ତ୍ରଶସ୍ତ୍ର ନୁହେଁ, ରାଜନୀତି ଏବଂ ସାମାଜିକ ଶାନ୍ତିର ଶକ୍ତିରେ ବିଶ୍ୱାସ କରେ । ମୁଁ ଆପଣଙ୍କୁ ଏହି ନୀତିକୁ କାର୍ଯ୍ୟକାରୀ କରିବାକୁ ଅନୁରୋଧ କରୁଛି,"। ନିରସ୍ତ୍ରୀକରଣ ପ୍ରକ୍ରିୟା "ଶୀଘ୍ର କାର୍ଯ୍ୟକାରୀ କରାଯିବ" ବୋଲି ପ୍ରତିଶ୍ରୁତି ଦେଇଥିଲେ ସେ। ଓକାଲାନ ତୁର୍କୀର ସଂସଦକୁ ନିରସ୍ତ୍ରୀକରଣ ତଦାରଖ ଏବଂ ଶାନ୍ତି ପ୍ରକ୍ରିୟା ପରିଚାଳନା ପାଇଁ ଏକ କମିଶନ ଗଠନ କରିବାକୁ ମଧ୍ୟ ଅନୁରୋଧ କରିଥିଲେ।

ଏବେ ଆସନ୍ତୁ ଜାଣିବା ଏହି ପିକେକେ କ'ଣ ?

କୁର୍ଦ୍ଦ ମାନେ ଅତି କମରେ ୩୦ ମିଲିୟନ ଲୋକଙ୍କର ଏକ ସାମ୍ପ୍ରଦାୟୀକ ଗୋଷ୍ଠୀ। ଯେଉଁ ମାନେ ପ୍ରଥମ ବିଶ୍ୱଯୁଦ୍ଧ ଶେଷ ହେବା ପରେ ପଶ୍ଚିମ ଦେଶ ମାନେ ସୀମା ପୁନଃନିର୍ମାଣ କରିବା ସମୟରେ ତୁର୍କୀ, ଇରାକ, ସିରିଆ ଏବଂ ଇରାନ ମଧ୍ୟରେ ବିଭକ୍ତ ହୋଇଥିଲେ। ୧୯୭୮ ମସିହାରେ ଏକ ସ୍ୱାଧୀନ କୁର୍ଦ୍ଦିସ୍ ରାଜ୍ୟ ହାସଲ କରିବା ପାଇଁ ନିର୍ଦ୍ଦିଷ୍ଟ ଲକ୍ଷ୍ୟ ସହିତ ପିକେକେ (PKK) ପ୍ରତିଷ୍ଠିତ ହୋଇଥିଲା। ହେଲେ ୧୯୯୦ ଦଶକରେ ସେମାନେ କେବଳ ତୁର୍କୀ ମଧ୍ୟରେ ସ୍ବାଧିନତା ଖୋଜିବା ପାଇଁ ପଥ ପରିବର୍ତ୍ତନ କରିଥିଲେ।

ଦଶନ୍ଧି ଧରି ତୁର୍କୀ ସୁରକ୍ଷା ସହିତ ସଶସ୍ତ୍ର ସଂଘର୍ଷ ଏବଂ ସାଧାରଣ ନାଗରିକଙ୍କ ଉପରେ ଆକ୍ରମଣ ଜାରି ରଖିଥିଲେ। ଏହି ଗୋଷ୍ଠୀକୁ ଯୁକ୍ତରାଷ୍ଟ୍ର ଏବଂ ୟୁରୋପୀୟ ସଂଘ ଦ୍ୱାରା ଏକ ଆତଙ୍କବାଦୀ ସଂଗଠନ ଭାବରେ ଆଖ୍ୟା ଦିଆଯାଇଥିଲା। ୪୦ ବର୍ଷର ସଂଘର୍ଷରେ ପ୍ରାୟ ୪୦ ହଜାର ଲୋକଙ୍କର ମୃତ୍ୟୁ ହୋଇଛି।