ଭୁବନେଶ୍ୱର,୨୩/୦୫: ମାଧ୍ୟମିକ ଶିକ୍ଷା ବୋର୍ଡ ପରିଚାଳିତ ମାଟ୍ରିକ୍ ପରୀକ୍ଷା ଫଳ ୨୦ ଦିନ ହେଲା ପ୍ରକାଶ ପାଇଲାଣି । କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ ପରିଚାଳିତ ଦଶମ ଶ୍ରେଣୀ ରେଜଲ୍ଟ ୧୦ ଦିନ ହେଲା ପ୍ରକାଶ ପାଇଲାଣି । ହେଲେ ଯୁକ୍ତ ଦୁଇ ନାମଲେଖା ପାଇଁ ଏଯାଏ ବିଜ୍ଞପ୍ତି ପ୍ରକାଶ ପାଇ ପାରିଲାନି । ରାଜ୍ୟରେ ଦଶମ ଶ୍ରେଣୀରେ ଉତ୍ତୀର୍ଣ୍ଣ ହୋଇଥିବା ୫ ଲକ୍ଷ ପିଲା ଯୁକ୍ତ ୨ରେ ନାମଲେଖାଇବା ପାଇଁ ଆବେଦନକୁ ଅପେକ୍ଷା କରିଛନ୍ତି । ଏ ବର୍ଷ ନାମଲେଖା ପ୍ରକ୍ରିୟାରେ ପଛରେ ପଡ଼ିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ । ପୂର୍ବ ବର୍ଷ ପରି ଏବର୍ଷ ବି ନାମଲେଖା ନଭେମ୍ବର ମାସ ଯାଏ ଚାଲିବ ବୋଲି ଶିକ୍ଷାବିତ୍ମାନେ ଆଶଙ୍କା କରିଛନ୍ତି । ପାଠପଢ଼ା, କୋର୍ସ ସରିବାରେ ମଧ୍ୟରେ ବିଳମ୍ବ ହେବ ବୋଲି ଆଶଙ୍କା ପ୍ରକାଶ ପାଇଛି ।
ନାମଲେଖା ପ୍ରକ୍ରିୟାରେ ସବୁଠୁ ଆଗରେ ରହିଛି ଉଚ୍ଚ ଶିକ୍ଷା ବିଭାଗ । ସ୍ନାତକ ଓ ଯୁକ୍ତ ଦୁଇ ପରୀକ୍ଷା ଫଳ ପ୍ରକାଶ ପୂର୍ବରୁ ଆରମ୍ଭ କରିସାରିଛି ଯୁକ୍ତ ତିନି, ସ୍ନାତକୋତ୍ତର, ବିଏଡ୍ ନାମଲେଖା ପ୍ରକ୍ରିୟା । ସ୍ନାତକୋତ୍ତର ନାମଲେଖା ପାଇଁ ପ୍ରବେଶିକା ପରୀକ୍ଷା ସରିଛି । ବିଏଡ୍ ପାଇଁ ଆବେଦନ ସରିଥିବା ବେଳେ ଜୁନ୍ ୧ରେ ପ୍ରବେଶିକା ପରୀକ୍ଷା ହେବ ।
ଯୁକ୍ତ ତିନି ନାମଲେଖା ଆବେଦନ ଚାଲିଛି, ଆସନ୍ତା ସପ୍ତାହରେ ଏହା ଶେଷ ହେବ । ଉଚ୍ଚଶିକ୍ଷା ବିଭାଗର ଆଗୁଆ ନାମଲେଖାର ଉଦ୍ଦେଶ୍ୟ ହେଉଛି ଯେ ପୂର୍ବ ବର୍ଷ ପରି ଏବର୍ଷ ନଭେମ୍ବର ଡିସେମ୍ବର ମାସ ଯାଏ ନାମଲେଖା ଚାଲିବନି । ଏହା ଦ୍ୱାରା ପାଠପଢ଼ାରେ ବାଧା ଉପଜୁଛି। ଏହାକୁ ଉଚ୍ଚଶିକ୍ଷା ମନ୍ତ୍ରୀ ମଧ୍ୟ ସ୍ୱୀକାର କରିଛନ୍ତି । କିନ୍ତୁ ଗଣଶିକ୍ଷା ବିଭାଗ ନାମଲେଖା ଶୀଘ୍ର ସାରିବା ଦିଗରେ ସେପରି କିଛି ଆଖି ଦୃଶିଆ ପଦକ୍ଷେପ ନେବା ପରି ଜଣାପଡ଼ୁନି । ବିଭାଗ ଏଯାବତ ନାମଲେଖା ବିଜ୍ଞପ୍ତି ପ୍ରକାଶ କରିନି । ଯାହାକୁ ନେଇ ଛାତ୍ରଛାତ୍ରୀମାନେ ଚିନ୍ତା ପ୍ରକଟ କରିଛନ୍ତି ।
ସୂଚନାଯୋଗ୍ୟ, ରାଜ୍ୟରେ ମାଧ୍ୟମିକ ଶିକ୍ଷା ବୋର୍ଡ ପରୀକ୍ଷାରେ ଚଳିତବର୍ଷ ୪ ଲକ୍ଷ ୮୪ ହଜାର ୮୬୩ ଜଣ ଉତ୍ତୀର୍ଣ୍ଣ ହୋଇଛନ୍ତି । ସେହିପରି ସିବିଏସ୍ଇ ପରିଚାଳିତ ଦଶମ ଶ୍ରେଣୀ ପରୀକ୍ଷାରେ ୫୫ ହଜାର ୭୩୪ଜଣ ପିଲା ଉତ୍ତୀର୍ଣ୍ଣ ହୋଇଛନ୍ତି ।ସାମ୍ସ ତଥ୍ୟ ଅନୁଯାୟୀ, ରାଜ୍ୟରେ ଯୁକ୍ତ ଦୁଇ ନାମଲେଖା ପାଇଁ ମୋଟ ୨୩୯୭ କଲେଜରେ ୫ ଲକ୍ଷ ୬୩ ହଜାର ୬୭୭ ସିଟ୍ ରହିଛି। ଏଥିରୁ କଳାରେ ୩ ଲକ୍ଷ ୧୭ ହଜାର ୭୦୮, ବିଜ୍ଞାନରେ ୧ ଲକ୍ଷ ୭୯ ହଜାର ୯୬୫, ବାଣିଜ୍ୟରେ ୪୧ ହଜାର ୯୧୨, ସଂସ୍କୃତରେ ୧୩ ହଜାର ୫୦୪, ଧନ୍ଦାମୂଳକ ଶିକ୍ଷାରେ ୧୦ ହଜାର ୫୮୮ ସିଟ୍ ରହିଛି । ଶିକ୍ଷାବିତ୍ଙ୍କ କହିବା କଥା, ଏପରି ଯଦି ନାମଲେଖା ପ୍ରକ୍ରିୟାରେ ବିଳମ୍ବ ହୁଏ ତେବେ ସିଟ୍ ଫାଙ୍କା ପଡ଼ିବ । ପିଲାମାନେ ହଇରାଣ ହେବେ । ଗତବର୍ଷ ଭଳି ଏବର୍ଷ ବି ନଭେମ୍ବର ମାସ ଯାଏ ନାମଲେଖା ପ୍ରକ୍ରିୟା ଚାଲିପାରେ ।
