ନୂଆଦିଲ୍ଲୀ,୧୦/୦୮:ଗ୍ରାହକଙ୍କ ପାଇଁ ଖୁସି ଖବର । ଇଲେକ୍ଟ୍ରିକ୍ ଗାଡ଼ି ଉପରେ ୨୦୨୮ ଯାଏଁ ମିଳିବ ସବ୍ସିଡି । ଯୋଜନାକୁ ୨ ବର୍ଷ ବଢ଼ାଇଲେ କେନ୍ଦ୍ର ସରକାର । ଏହି ଯୋଜନା ପାଇଁ ଆବଣ୍ଟିତ ଅର୍ଥ ରାଶିରେ କୌଣସି ପରିବର୍ତ୍ତନ କରାଯାଇନାହିଁ । ୧୦ ହଜାର ୯୦୦ କୋଟି ଟଙ୍କାର ଏହି ଯୋଜନା ୨୦୨୬ ମାର୍ଚ୍ଚରେ ଶେଷ ହୋଇଥାନ୍ତା । ବର୍ତ୍ତମାନ ଏହାକୁ ଆହୁରି ୨ ବର୍ଷକୁ ବୃଦ୍ଧି କରାଯାଇଛି ।
ଇଲେକ୍ଟ୍ରିକ୍ ଗାଡ଼ି କ୍ରୟକୁ ସୁଲଭ କରାଇବା ଉଦ୍ଦେଶ୍ୟରେ ସରକାରଙ୍କ ଦ୍ୱାରା ପିଏମ୍ ଇ-ଡ୍ରାଇଭ୍ ଯୋଜନା କାର୍ଯ୍ୟକାରୀ କରାଯାଉଛି । ଭାରୀ ଉଦ୍ୟୋଗ ମନ୍ତ୍ରଣାଳୟ ପ୍ରଧାନମନ୍ତ୍ରୀ ଇଲେକ୍ଟ୍ରିକ୍ ଡ୍ରାଇଭ୍ ରିଭୋଲ୍ୟୁସନ ଇନ୍ ଇନୋଭେଟିଭ୍ ଭେଇକଲ୍ ଏନହାନ୍ସମେଣ୍ଟ ଯୋଜନାକୁ ୨୦୨୮ ମାର୍ଚ୍ଚ ୩୧ ଯାଏ ବଢାଇବାକୁ ନିଷ୍ପତ୍ତି ନେଇଛନ୍ତି । ଏହି ଯୋଜନା ପାଇଁ ଆବଣ୍ଟିତ ଅର୍ଥ ରାଶିରେ କୌଣସି ପରିବର୍ତ୍ତନ କରାଯାଇ ନାହିଁ । ତେବେ କେନ୍ଦ୍ର ସରକାର ୨୦୨୪ ଅକ୍ଟୋବର ୧ରେ PM E-Drive ଯୋଜନା ଆରମ୍ଭ କରିଥିଲେ ।
୧୦,୯୦୦ କୋଟି ଟଙ୍କାର ଏହି ଯୋଜନା ୨୦୨୬ ମାର୍ଚ୍ଚରେ ଶେଷ ହୋଇଥାନ୍ତା । କିନ୍ତୁ ଏବେ ଏହି ଯୋଜନାକୁ ୨୦୨୮ ଯାଏ ବଢାଯାଇଛି, ଯାହା ଲାଭ ଇଲେକ୍ଟ୍ରକ୍ ଗାଡ଼ି କ୍ରେତାଙ୍କୁ ମିଳିବ । ପିଏମ୍ ଇ-ଡ୍ରାଇଭ୍ ଯୋଜନା କେବଳ ଗାଡ଼ି କିଣିବା ସମୟରେ ସବସିଡି ପ୍ରଦାନ କରେ ନାହିଁ, ବରଂ ପବ୍ଲିକ୍ ଚାର୍ଜିଂ ଭିତ୍ତିଭୂମି, ଟେଷ୍ଟିଂ ଫେସିଲିଟି ଓ ଇଲେକ୍ଟ୍ରିକ୍ ଭେଇକଲ୍ ଟେକ୍ନୋଲୋଜିର ସ୍ଥାନୀୟକରଣକୁ ବି ପ୍ରୋତ୍ସାହିତ କରୁଛି ।ମନ୍ତ୍ରଣାଳୟ ପକ୍ଷରୁ ଜାରି ଅଧିସୂଚନା ଅନୁସାରେ, ଇଲେକ୍ଟ୍ରିକ୍ ମୋବିଲିଟି ପ୍ରମୋସନ ସ୍କିମ୍ ୨୦୨୪କୁ ବି ପିଏମ୍-ଡ୍ରାଇଭ୍ ଯୋଜନାରେ ସାମିଲ କରାଯାଇଛି । ଏହି ଯୋଜନାର ଉଦ୍ଦେଶ୍ୟ ୪୦ ଲକ୍ଷରୁ ଅଧିକ ଜନସଂଖ୍ୟା ବିଶିଷ୍ଟ ୯ଟି ପ୍ରମୁଖ ସହରରେ ପ୍ରାୟ ୨୪.୮ ଲକ୍ଷ ଇକ୍ଟ୍ରେଲିକ୍ ଦୁଇ ଚକିଆ ଯାନ, ୩.୨ ଲକ୍ଷ ଇଲେକ୍ଟ୍ରିଲ୍ ତିନି ଚକିଆ ଗାଡ଼ି ଓ ୧୪,୦୦୦ରୁ ଅଧିକ ଇଲେକ୍ଟ୍ରିକ୍ ବସକୁ ସବ୍ସିଡି ପ୍ରଦାନ କରିବା । ତେବେ ଏହି ଯୋଜନା ଅଧିନରେ ଇଲେକ୍ଟ୍ରିକ୍ ଦୁଇ ଚକିଆ ଓ ତିନି ଚକିଆ ଗାଡ଼ିକୁ ଦିଆଯାଉଥିବା ସବସିଡି ୨୦୨୬ ମାର୍ଚ୍ଚ ୩୧ରେ ଶେଷ ହୋଇଯିବ । କିନ୍ତୁ ଇଲେକ୍ଟ୍ରିକ୍ ବସ୍, ଟ୍ରକ୍ ଓ ଆମ୍ୱୁଲାନ୍ସ ପାଇଁ ସବ୍ସିଡି ୨୦୨୮ ମାର୍ଚ୍ଚ ଯାଏ ଜାରି ରହିବ ।
