ଭୁବନେଶ୍ୱର,୧୭/୦୧: ରୋଜଭ୍ୟାଲି ଚିଟ୍ଫଣ୍ଡ ମାମଲାରେ ଦୁଇ ଅଭିଯୁକ୍ତ ଗୌତମ କୁଣ୍ଡୁ ଓ ଶିବମୟ ଦତ୍ତାଙ୍କ ବିରୋଧରେ ସ୍ଥାନୀୟ ପିଏମ୍ଏଲଏ କୋର୍ଟ ଚାର୍ଜଫ୍ରେମ କରିଛନ୍ତି । ଫଳରେ ରୋଜଭ୍ୟାଲି ଚିଟ୍ଫଣ୍ଡ କ୍ଷତିଗ୍ରସ୍ତ ଜମାକାରୀମାନେ ଟଙ୍କା ଫେରସ୍ତ ପାଇବାର ଆଶା ଉଜ୍ୱଳ ହୋଇଛି ବୋଲି ଇଡି (ପ୍ରବର୍ତ୍ତନ ନିର୍ଦ୍ଦେଶାଳୟ) ପକ୍ଷରୁ ସୂଚନା ଦିଆଯାଇଛି ।
୨୦୧୪ ଓ ୨୦୧୫ରେ ଇଡି ଚିଟ୍ଫଣ୍ଟ କମ୍ପାନିର ବ୍ୟାଙ୍କ ଜମା ସମେତ ମୋଟ ୩୩୨ କୋଟି ଟଙ୍କାର ଅସ୍ଥାବର ସମ୍ପତ୍ତି ଜବତ କରିଥିଲା। ଯାହାକି ବର୍ତ୍ତମାନ ସୁଧକୁ ମିଶାଇ ୪୦୦ କୋଟିରୁ ଅଧିକ ଟଙ୍କା ହେବ । କୋର୍ଟ ଅନୁମତି ଦେଲେ ଜବତ ହୋଇଥିବା ସମ୍ପତ୍ତିକୁ କ୍ଷତିଗ୍ରସ୍ତ ଜମାକାରୀଙ୍କୁ ଫେରସ୍ତ କରାଯାଇପାରିବ । ୨୦୧୫ ମେ ୧୫ରେ କଲିକତା ହାଇକୋର୍ଟ ଗଠନ କରିଥିବା ଏଡିସି (ଆସେଟ୍ସ ଡିସ୍ପୋଜାଲ କମିଟି) କୋର୍ଟଙ୍କ ଅନୁମତି ମିଳିବା ପରେ ଏହି ଟଙ୍କାକୁ କ୍ଷତିଗ୍ରସ୍ତ ଜମାକାରୀଙ୍କୁ ଫେରସ୍ତ କରିବା ପ୍ରକ୍ରିୟା ଆରମ୍ଭ କରିବ । ମନି ଲଣ୍ଡରିଂ ନିବାରଣ ଆଇନ (ପିଏମ୍ଏଏଲ) ର ଧାରା ୮ (୮) ଅନୁସାରେ ବେଆଇନ ଭାବେ ସଂଗ୍ରହ କରାଯାଇଥିବା ଅର୍ଥକୁ କ୍ଷତିଗ୍ରସ୍ତ ଜମାକାରୀଙ୍କୁ କୋର୍ଟ ଫେରସ୍ତ କରିପାରିବେ ।
୨୦୧୬ରେ ଇଡି ରୋଜଭ୍ୟାଲି ଚିଟ୍ଫଣ୍ଡ କମ୍ପାନିର ଅଧ୍ୟକ୍ଷ ଗୌତମ କୁଣ୍ଡୁ ଓ ଅନ୍ୟ ସହଯୋଗୀଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା। ୨୦୧୫ ମାର୍ଚ୍ଚ ୨୫ରେ ଇଡି କୁଣ୍ଡୁଙ୍କୁ କୋଲକାତାରୁ ଗିରଫ କରିଥିଲା । ରୋଜଭ୍ୟାଲି କମ୍ପାନି ଓଡ଼ିଶାରୁ ପ୍ରାୟ ୪୭୬ କୋଟି ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଓଡ଼ିଶା ବ୍ୟତୀତ ପଶ୍ଚିମବଙ୍ଗ, ଆସାମ ଓ ତ୍ରିପୁରାରୁ ମଧ୍ୟ ରୋଜଭ୍ୟାଲି କମ୍ପାନି ଜମାକାରୀଙ୍କ ଠାରୁ ବିପୁଳ ଅର୍ଥ ଠକି ନେଇଛି ।
