ନୂଆଦିଲ୍ଲୀ,୦୭/୦୮: ପୋଲାଣ୍ଡରେ ଆୟୋଜିତ ଆଥଲେଟିକ୍ସ ମିଟ୍ରେ ଭାରତର ମହିଳା ଜାଭେଲିନ ତାରକା ଅନୁ ରାଣୀ ସ୍ୱର୍ଣ୍ଣ ପଦକ ଜିତିଛନ୍ତି । ସେ ନିଜର ଦ୍ୱିତୀୟ ପ୍ରୟାସରେ ସିଜନର ଶ୍ରେଷ୍ଠ ପ୍ରଦର୍ଶନ ୬୨.୫୯ମିଟର ଦୂର ଜାଭେଲିନ ଫିଙ୍ଗି ସ୍ୱର୍ଣ୍ଣ ପଦକ ପକ୍କା କରି ଦେଇଥିଲେ । ତାଙ୍କର ପ୍ରଥମ ପ୍ରୟୋସ ୬୦.୨୯ମିଟର ରହିଥିଲା । ସେହିପରି ଷଷ୍ଠ ତଥା ଅନ୍ତିମ ଥ୍ରୋରେ ମଧ୍ୟ ସେ ୬୦ମିଟର (୬୦.୦୭) ଅତିକ୍ରମ କରିଥିଲେ । ତାଙ୍କ ନାମରେ ପୂର୍ବରୁ ଜାତୀୟ ରେକର୍ଡ଼ ରହିଛି । ୨୦୨୨ରେ ସେ ୬୩.୮୨ମିଟର ସହ ଜାତୀୟ ରେକର୍ଡ଼ ସ୍ଥାପନ କରିଥିଲେ । ଯାହାକି ଏପର୍ଯ୍ୟନ୍ତ ଅତୁଟ ରହିଛି ।
ଅନୁ ପୋଲାଣ୍ଡରୁ ସ୍ୱଦେଶ ଫେରିବା ପରେ ଭୁବନେଶ୍ୱର ଆସିବାର କାର୍ଯ୍ୟକ୍ରମ ରହିଛି । ଏଠାରେ ସେ ବିଶ୍ୱ ଆଥଲେଟିକ୍ସ କଣ୍ଟିନେଣ୍ଟାଲ ଟୁର ମିଟ୍ରେ ଭାଗ ନେବେ । ଏହି ମିଟ ଆସନ୍ତା ୧୦ ତାରିଖରେ କଳିଙ୍ଗ ଷ୍ଟାଡିୟମରେ ଆୟୋଜିତ ହେବ । କଳିଙ୍ଗରେ ସେ ଟୋକିଓ ବିଶ୍ୱ ଚାମ୍ପିଅନସିପ୍ ଟିକେଟ୍ ହାସଲ କରିବା ନେଇ ଆଶାବାଦୀ ରହିଛନ୍ତି। ଆଗାମୀ ବିଶ୍ୱ ଚାମ୍ପିଅନସିପ୍ ପାଇଁ ଯୋଗ୍ୟତା ମାନଦଣ୍ଡ ୬୪ମିଟର ରହିଛି।
