ଭୁବନେଶ୍ୱର ୦୭/୧୨: ବହୁଚର୍ଚ୍ଚିତ ଏସ୍ଆଇ ପରୀକ୍ଷା କେଳେଙ୍କାରୀ ମାମଲାରେ ସିବିଆଇ ଅନ୍ୟ ୨ଜଣ ଅଭିଯୁକ୍ତଙ୍କୁ ଗିରଫ କରିଛି । ସ୍କାମର ଅନ୍ୟତମ ମାଷ୍ଟରମାଇଣ୍ଡ ବିରଞ୍ଚି ନାୟକର ଖାସ୍ ସହଯୋଗୀ ନିମାଇଁ ଚରଣ ସାହୁ ଓ ଅର୍ଜୁନ ନାୟକଙ୍କୁ ହେପାଜତକୁ ନେଇଛି । ଅର୍ଜୁନ ଓ ନିମାଇଁ ହେଉଛନ୍ତି ସ୍ପେଶାଲ ସିକ୍ୟୁରିଟି ବାଟାଲିୟନ (ଏସଏସବି)ର ପୂର୍ବତନ ଯବାନ । ଉଭୟଙ୍କ ମଧ୍ୟରେ ଦୀର୍ଘଦିନର ବନ୍ଧୁତା ଥିଲା ।
ସିବିଆଇ ସୂତ୍ରରୁ ମିଳିଥିବା ତଥ୍ୟ ମୁତାବକ, ଅଭିଯୁକ୍ତ ବିରଞ୍ଚିକୁ ସିବିଆଇର ଏକ ସ୍ୱତନ୍ତ୍ର ଟିମ୍ ଜେରା କରୁଛନ୍ତି । ତା’ଠାରୁ ମିଳିଥିବା ତଥ୍ୟ ଆଧାରରେ ଏମାନେ ଧରାପଡି଼ଛନ୍ତି। କେନ୍ଦ୍ରାପଡ଼ାରେ ଅର୍ଜୁନ ଘର ହୋଇଥିବା ବେଳେ ବାଲେଶ୍ୱର ବାସିନ୍ଦା ହେଉଛି ନିମାଇଁ । ସିବିଆଇ ଉଭୟଙ୍କୁ ୪ ଦିନ ରିମାଣ୍ଡରେ ନେବାକୁ ଆବେଦନ କରିଥିଲା । ଅଦାଲତ ପକ୍ଷରୁ ୨ ଦିନିଆ ରିମାଣ୍ଡ ପାଇଁ ଅନୁମତି ଦିଆଯାଇଛି ।
ସିବିଆଇ ଉଭୟଙ୍କୁ ବିରଞ୍ଚି ସହ ସାମ୍ନାସାମ୍ନି ଜେରା କରାଇଛି । ଜେରାରୁ ଅନେକ ତଥ୍ୟ ମିଳିଛି । ଯେମିତିକି, ଅର୍ଜୁନ ପୂର୍ବତନ ମୁଖ୍ୟମନ୍ତ୍ରୀଙ୍କ ସୁରକ୍ଷା ଦଳ ସହ ଲୋକସେବା ଭବନରେ ସୁରକ୍ଷାକର୍ମୀ ଭାବେ କାମ କରିସାରିଥିଲା । ତେଣୁ ନିଜକୁ ଓଡ଼ିଶା ପୁଲିସ ନିଯୁକ୍ତି ବୋର୍ଡ (ଓପିଆର୍ବି) ଉପରିସ୍ଥ ଅଧିକାରୀଙ୍କ ସହ ଖାସ୍ ସମ୍ପର୍କ ଥିବା ନେଇ ଡାହା ଗପ ଶୁଣାଉଥିଲା । ସମ୍ପୃକ୍ତ ଅଧିକାରୀମାନଙ୍କ ସହ ଏଡିଟିଂ ହୋଇଥିବା କିଛି ଫଟୋଚିତ୍ର ଦେଖାଇ ଅନେକ ଆଶାୟୀଙ୍କୁ ଏହି ସ୍କାମ୍ରେ ସହଜରେ ଫସାଇ ପାରୁଥିଲା । ସେ ଭୁବନେଶ୍ୱର, କଟକ, ଖୋର୍ଦ୍ଧା, ନୟାଗଡ଼ରୁ ଯୋଗାଡୁଥିବା ଆଶାୟୀମାନଙ୍କୁ ସିଧାସଳଖ ନିମାଇଁ ପାଖରେ ପହଞ୍ଚାଉଥିଲା । ଏହି ବାବଦକୁ ମୋଟା ଅଙ୍କର କମିଶନ ମଧ୍ୟ ପକେଟରେ ପୁରାଉଥିଲା ।
ନିମାଇଁ ମଧ୍ୟ ଏସଏସ୍ବିରେ ୨୦୧୬ ଯାଏଁ ଯବାନ ଭାବେ କାମ କରୁଥିଲା । ଦିଘା ମଡ୍ୟୁଲ ପାଇଁ ଆଶାୟୀଙ୍କଠାରୁ ଟଙ୍କା କାରବାରର ଅନ୍ୟତମ ମାଧ୍ୟମ ସାଜିଥିଲା ସେ । ବିରଞ୍ଚିର ଅତି ଖାସ୍ ହୋଇଥିବାରୁ ତାକୁ ଆଶାୟୀଙ୍କ ସମସ୍ତ କାରବାର ବୁଝିବାର ଦାୟିତ୍ୱ ଦିଆଯାଇଥିଲା । ସିବିଆଇକୁ ଏସବୁ ଦିଗରେ ସୁରାକ ମିଳିଥିଲେ ହେଁ କୌଣସି ବୈଧ ଓ ବଳିଷ୍ଠ ପ୍ରମାଣପତ୍ର ହାତରେ ଲାଗିନାହିଁ । ଆସନ୍ତାକାଲି ଜେରା ବେଳେ ଉଭୟଙ୍କଠାରୁ ପ୍ରମାଣପତ୍ର ହାତେଇବା ପାଇଁ ନୂଆ କୌଶଳ ଆପଣାଇବ ସିବିଆଇ ଟିମ୍ । ଆସନ୍ତାକାଲି ବିରଞ୍ଚିର ରିମାଣ୍ଡ ଅବଧି ସରିବା ପରେ ଅଦାଲତରେ ହାଜର କରାଯିବ । ବିରଞ୍ଚିକୁ ଆହୁରି ୨ ଦିନ ରିମାଣ୍ଡରେ ନେବା ପାଇଁ ଆବେଦନ କରିପାରେ ସିବିଆଇ । ନିମାଇଁ ଓ ଅର୍ଜୁନକୁ ବାନ୍ଧିବା ପରେ ପୁଲିସ ଏସ୍ଆଇ ସ୍କାମ୍ରେ ଗିରଫଦାରି ସଂଖ୍ୟା ୧୨୮ରେ ପହଞ୍ଚିଛି । ସେହିପରି ଓପିଆର୍ବିଠାରୁ ଅଧିକ ତଥ୍ୟ ହାସଲ ପାଇଁ ଏକାଧିକ ଉଚ୍ଚପଦସ୍ଥ ଅଧିକାରୀଙ୍କୁ ପଚରାଉଚରା କରିବାକୁ ସିବିଆଇ ଯୋଜନା ରଖିଛି । ଏହି ସ୍କାମ୍ରେ ଅନ୍ୟ ଜଣଙ୍କୁ ଅଟକ ରଖି ପଚରାଉଚରା କରୁଛି ସିବିଆଇ।
